ޚިދުމަތްދޭ ރަށްތަކުގެ ތެރެއިން 44 ޕަސެންޓް އިޔާދަކުރަނިވި ހަކަަތައަށް 2022 ވަނަ އަހަރު ބަދަލު ކުރެވޭނެ: ފެނަކަ
17 އޮކްޓޯބަރު 2020 | ހޮނިހިރު 08:06ޕްލޭންއާ އެއްގޮތަށް މަސައްކަތްތައް ކުރިއަށްދާނަމަ ޕްލޭން ކޮށްފައިވާ ތާރީހަށްވުރެ އަވަހަށް މަސައްކަތް ނިމެނޭ
ފެނަކައިގެ މެނޭޖިން ޑިރެކްޓަރު އަހުމަދު ސައީދު، މަޝްރޫއު އިތުރަށް ފުޅާ ކުރެވިގެންދާނެ ކަމަށް ވިދާޅުވެފައިވޭ
ފެނަކަ ކޯޕްރޭޝަން ލިމިޓެޑުން ކަރަންޓް ޚިދުމަތްދޭ ރަށްތަކުގެ ތެރެއިން 44 ޕަސެންޓް އިޔާދަކުރަނިވި ހަކަަތައަށް 2022 ވަނަ އަހަރު ބަދަލު ކުރެވިގެންދާނެ ކަމަށް އެ ކުންފުނިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި، ފެނަކައިން ކަރަންޓްގެ ޚިދުމަތް ދޭ 22 ރަށެއްގައި 12 މެގަވޯޓުގެ ސޯލާ ޕީވީ ހަރުކުރުމަށް މަޝްރޫއާ ބެހޭ ގޮތުން މެނޭޖިން ޑިރެކްޓަރު އަހުމަދު ސައީދު ވިދާޅުވީ އަމާޒަކީ 2022 ވަަނަ އަހަރުގެ މެދުތެރޭގައި މަޝްރޫއު އިން ކަރަންޓްގެ ޚިދުމަތް ދިނުން ކަމަށެވެ. ޕްލޭންއާ އެއްގޮތަށް މަސައްކަތްތައް ކުރިއަށް ގެންދެވިއްޖެ ކަމުގައިވާނަމަ މަސައްކަތް ނިންމަން ޖެހޭ ތަރީހަށްވުރެ ކުރިއަށް ނިމެނޭ ކަމަށް ސައީދު ވިދާޅުވިއެވެ.
އިޔާދަކުރަނިވި ހަކަތައިގެ މަޝްރޫއިން ތެލަށް ކުރާ ހަރަދު ވަރަށް ބޮޑުތަނުން ކުޑަވާނެކަން ފާހަގަކުރައްވައި ސައީދު ވިދާޅުވީ ކުރިއަށް އޮތްތަނުގައި މި މަޝްރޫއު ފުޅާ ކުރުމުގެ މަސައްކަތްތައް ކުރިއަށް ގެންދާނެ ކަމަށެވެ. އަދި މި 12 މެގަވޮޓް ކަރަންޓަށް ސޯލަރ ޕީވީއާއެކު، ފެނަކައިގެ ކަރަންޓުގެ ޚިދުމަތްދޭ ރަށްތަކުގެ ތެރެއިން 44 ޕަސެންޓް އިޔާދަކުރަނިވި ހަކަތައަށް ބަދަލު ކުރެވިގެންދާނެ ކަމަށް ސައީދު ވިދާޅުވިއެވެ.
ސައީދު ވިދާޅުވީ 12 މެގަވޮޓްގެ ސޯލާ ޕީވީއިން ވެސް ތެލަށް ކުރާ ޚަރަދު ވަރަށް ބޮޑު ބަޔެއް ރައްކާ ކުރެވިގެންދާނެ ކަމަށެވެ. އަދި އަހަރެއްގެ މައްޗަށް ގާތްގަނޑަކަށް 47 މިލިއަން ރުފިޔާ ސަލާމަތް ކުރެވިގެންދާނެ ކަަމަށެވެ.
ފެނަކައިން މިހާރު ވެސް ދަނީ އަތޮޅުތެރޭގެ ރަށްތަކުގައި މީހުން ދިރިއުޅޭ ހިސާބުގައި ހުންނަ އިންޖީނުގެތަށް މީހުން ދިރިނޫޅޭ ހިސާބުތަކަށް ބަދަލު ކުރުމާއި، ކަރަންޓުގެ ޚިދުމަތްތަކަށް ދިމާ މައްސަލަތަށް ހައްލު ކުރުމަށް ގިނަ މަސައްކަތްތަކެއް ކުރަމުންނެވެ. އަދި ދެމެހެއްޓެނެވި ގޮތެއްގައި ޚިދުމަތްތައް ފޯރުކޮށްދިނުމަކީ ފެނަކައިގެ އެއް އަމާޒެވެ.
