ތަރުކާރީއާއި މޭވާ ވިއްކުމުގެ ވިޔަފާރި ހަރަކާތް ރަޖިސްޓަރީ ކުރުމުގެ ގަވާއިދަށް އަމަލު ކުރަން ފަށައިފި
މި ތަންތަނުގެ ސާފުތާހިރު ކަމާއި ވިއްކާތަކެތީގެ ރައްކާތެރިކަން މިނިސްޓްރީ އިން ކަށަވަރުކުރަން ބޭނުންވޭ
ތަރުކާރީ އާއި މޭވާ ވިއްކަން ބަހައްޓާފައި
ތަރުކާރީއާއި މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރި ހަރަކާތް ރަޖިސްޓަރީ ކުރުމުގެ ގަވާއިދަށް އިކޮނޮމިކް މިނިސްޓްރީ އިން އަމަލު ކުރަން ފަށައިފިއެވެ.
އިކޮނޮމިކް މިނިސްޓްރީން ބުނީ އެ ޤަވާއިދަށް ޢަމަލު ކުރަން ފަށާފައިވަނީ 03 އޮކްޓޯބަރ 2020 ގައި ކަމަށާއި, ވިޔަފާރި ހަރަކާތް ރަޖިސްޓްރީ ކުރެވޭނީ އޮންލައިންކޮށް، އެ މިނިސްޓްރީގެ އޮންލައިން ޕޯޓަލްhttps://business.egov.mvމެދުވެރިކޮށް ކަމަށެވެ.
މިނިސްޓްރީން މިފަދަ ޤަވާއިދެއް ހަދާ އަމަލު ކުރަން ފަށާފައިވަނީ މުދާ ވިއްކާ ފިހާރަ، ބޭކަރީ، ކެންޓީނު، ސައިހޮޓާ، ކެފޭ، ރެސްޓޯރަންޓް، ކެފެޓީރިއާ ފަދަ ތަންތަން ފިޔަވައި، ހަމައެކަނި ތަރުކާރީއާއި މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރިކުރާ ތަންތަން މޮނިޓަރ ކޮށް ރެގިއުލޭޓް ކުރުމަށް އެ މިނިސްޓްރީ އިން ބޭނުންވާތީއެވެ.
މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރި ހަރަކާތް ރަޖިސްޓަރީ ކުރުމުގެ ގަވާއިދުގައިވާ ގޮތުން، މި ގަވާއިދަށް ޢަމަލު ކުރަން ޖެހޭނީ، މުދާ ވިއްކާ ފިހާރަ، ބޭކަރީ، ކެންޓީނު، ސައިހޮޓާ، ކެފޭ، ރެސްޓޯރަންޓް، ކެފެޓީރިއާ ފަދަ ތަންތަން ފިޔަވައި، ތަރުކާރީއާއި މޭވާ ހިމެނޭ ގޮތަށް ކާބޯތަކެތީގެ ބާވަތްތައް ވިއްކުމުގެ ވިޔަފާރި ހިންގާ ފަރާތްތަކުންނެވެ.
އެގޮތުން، ތަނެއްގައި ޤާއިމުވެގެން، ތަރުކާރީ ނުވަތަ މޭވާ އާންމުންނަށް ވިއްކާ ފަރާތްތަކާއި، ތަނެއްގައި ޤާއިމު ނުވެ، އެހެންނަމަވެސް ތަރުކާރީއެއް ނުވަތަ މޭވާއެއް އާންމުންނަށް ވިއްކާ ފަރާތްތަކާއި، އެއްވެސް ބާވަތެއްގެ ތަރުކާރީއެއް ނުވަތަ މޭވާއެއް ހިމެނޭ ގޮތަށް އެކި ބާވަތްތަކުގެ މުދާ ވިއްކާ ފަރާތްތަކާއި، އިލެކްޓްރޯނިކް ޒަރީޢާއިން އާންމުންނަށް ތަރުކާރީ ނުވަތަ މޭވާ ވިއްކާ ފަރާތްތަކުގެ އިތުރުން، އެއް ފަރާތަށް ވުރެ ގިނަ ފަރާތުން، ވަގުތީގޮތުން ނުވަތަ ދާއިމީ ގޮތަކަށް ވަކި ތަނެއްގައި ތިބެގެން ތަރުކާރީ ނުވަތަ މޭވާ ވިއްކާ ފަރާތްތަކުން ވިޔަފާރި ރަޖިސްޓަރީ ކުރުމުގެ ޤާނޫނުގެ 4 ވަނަ މާއްދާގައި ބަޔާންކޮށްފައިވާ ގޮތަކުން ކުރެ ގޮތަކަށް ވިޔަފާރި ކުރާ ތަނެއްގެ ގޮތުގައި، އަމިއްލަ ފަރުދުންގެ ވިޔަފާރިއެއް ނުވަތަ ކުންފުންޏެއް ނުވަތަ ޕާރޓްނަރޝިޕެއް ނުވަތަ ކޯޕަރޭޓިވް ސޮސައިޓީއެއްގެ ގޮތުގައި ރަޖިސްޓްރީކުރުމަށް ފަހު، މިނިސްޓްރީގެ ގަވާއިދުގައިވާ ގޮތަށް ތަރުކާރީ އާއި މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރި ހަރަކާތް ރަޖިސްޓަރީ ކުރަން ޖެހެއެވެ.
ތަރުކާރީއާއި މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރި ހަރަކާތްތައް ކްލެސިފައި ކުރެވޭނީ ރީޓެއިލް ފިހާރަ، ހޯލްސޭލް ފިހާރަ، ފްރެޝް މާރުކޭޓު ނުވަތަ އޮންލައިން ޝޮޕެއްގެ ގޮތުގައި ކަަމަށް މިނިސްޓްރީ އިން ފާހަގަކުރެއެވެ.
ޤަވާއިދު އެކުލަވާލާފައި ވަނީ ތަރުކާރީއާއި މޭވާ ފަދަ ކާބޯތަކެތީގެ ބާވަތްތައް ވިއްކުމުގެ ވިޔަފާރި ކުރާ ތަންތަން މޮނިޓަރ ކޮށް ރެގިއުލޭޓް ކުރުމުގެ މަޤްސަދުގައެވެ.
