ސީރިއާގެ ދާހިލީ ހަނގުރާމައިގައި ބައިވެރިވުމަށްފަހު ރާއްޖެ އައި ކަމުގެ ތުހުމަތުގައި ހައްޔަރުކުރި މީހާގެ ބަންދަށް 7 ދުވަސް ޖަހައިފިއެވެ.

މިކަމާއި ގުޅިގެން ފުލުހުން ބުނީ، ޓެރެރިސްޓް ޖަމާއަތްތަކާއި އެކު ސީރިއާގެ ދާހިލީ ހަނގުރާމައިގައި ބައިވެރިވުމަށް ސީރިއާއަށް ދަތުރުކުރި ކަމުގެ ތުހުމަތުގައި ހައްޔަރުކުރި މީހާ ބަންދުގައި ބަހައްޓައިގެން ތަހުގީގު ކުރިޔަށް ގެންދިއުމަށް 7 ދުވަހުގެ މުއްދަތެއް ކޯޓުން ދީފައިވާކަމަށެވެ.

މި މައްސަލައިގައި ފުލުހުން ބުރާސްފަތި ދުވަހުގެ ރޭ ހިނގި ހާއްސަ އޮޕަރޭޝަނެއްގައި ހައްޔަރުކޮށްފައި ވަނީ 34 އަހަރުގެ ދިވެހި ފިރިހެނެކެވެ. އަދި ކޯޓު އަމުރެއްގެ ދަށުން އޭނާ ދިރިއުޅެމުން ދިޔަ ތަން ބަލާފާސްކޮށްފައިވާ ކަމަށް ފުލުހުން ވަނީ ބުނެފައެވެ.

އެ ވަގުތު އެތަނުގައި ހަރަކާތްތެރިވި "ރާއްޖެއެމްވީ" ގެ ނޫސްވެރިން ބުނެފައިވާ ގޮތުގައި އެ ގެ ބަލާފާސްކުރުމަށް ފަހު މާ ބައިވަރު ސާމާނެއް ނުގެންދެއެވެ. މައުލޫމާތު ލިބިފައިވާ ގޮތުގައި އޭނާ އަނބުރާ ރާއްޖެއަށް އައިސްފައިވަނީ މީގެ ހަފްތާއެއްހާ ދުވަސް ކުރިންނެވެ. އަދި އޭނާ ދިރިއުޅެމުން ދިޔައީ ކުއްޔަށް ނަގާފައި ހުރި ތަނެއްގައެވެ.

ފުލުހުން އެންމެ ފަހުން އާންމުކޮށްފައިވާ މައުލޫމާތަށް ބަލާއިރު، ސީރިޔާގެ ދާހިލީ ހަނގުރާމައިގައި ބައިވެރިވުމަށް ރާއްޖެއިން 173 ގޮސްފައިވެއެވެ. އަދި މީގެ ތެރެއިން ބައެއް ފަރާތްތައް އަނބުރާ ރާއްޖެ އައުމަށް އެދެމުން އަންނަ އިރު، އޭގެ ތެރޭގައި ގިނައީ ހުވަފަތްވެފައިވާ އަންހެނުންނާއި ޔަތީމް ކުދިން ކަމަށް ވަނީ މައުލޫމާތު ލިބިފައެވެ.

މި ހަނގުރާމައަށް ދިޔަ މީހުންގެ ތެރެއިން އަނބުރާ ގައުމަށް އަންނަން އެ ފަރާތްތަކުންނާއި، އެ ފަރާތްތަކުގެ އާއިލާއިން ސަރުކާރުގައި ވަނީ އެދިފައެވެ. ރާއްޖެ އަންނަން ބޭނުންވެފައި ތިބި މީހުންގެ ތެރޭގައި ހުވަފަތްވެފައިވާ އަންހެނުންނާއި ޔަތީމް ކުދިން ހިމެނޭ ކަމަށް ވަނީ މައުލޫމާތު ލިބިފައެވެ.

ސަރުކާރުން އަންނަނީ ބޭރުގެ ދައުލަތްތަކާ ގުޅިގެން މި ފަރާތްތައް ރިހެބިލިޓޭޓް ކުރުމަށް އަނބުރާ ގައުމަށް ގެނައުމުގެ މަސައްކަތް ކުރަމުންނެވެ. ނަމަވެސް ކޮވިޑް-19 އާއި ސީރިއާގައި ހިނގަމުންދާ ހަނގުރާމަައިގެ ސަބަބުން މި މަސައްކަތަށް ވަނީ އިތުރު ހުރަސްތަކެއް ކުރިމަތިވެފައެވެ.