އިތުރު މީހުންނަށް ފުރުސަތު ދިނުމުގެ ގޮތުން ޓާޝިއަރީ ހޮސްޕިޓަލަށް ބިޑް ކުރުމުގެ މުއްދަތު އަނެއްކާވެސް އިތުރު ކޮށްފިއެެވެ.
ކޮންޓްރެކްޓަރ ފައިނޭންސްގެ ދަށުން ޑިޒައިން އެންޑް ބިލްޑް އުސޫލުން ހދ. ކުޅުދުއްފުށީ އަދި ގދ. ތިނަދޫ ޓާޝިއަރީ ހޮސްޕިޓަލެއް ޢިމާރާތް ކުރުމުގެ މަސައްކަތް އަދި ކޮންޓްރެކްޓަރ ފައިނޭންސްގެ ދަށުން ނ. މަނަދޫ އަތޮޅު ހޮސްޕިޓަލް ޢިމާރާތް ކުރުމުގެ މަސައްކަތް ކޮށްދޭނެ ފަރާތެއް ހޯދުމަށް އިއުލާން ކޮށްފައި މިވަނީ ތިން ވަނަ ފަހަރަށެވެ.
ރާއްޖެއެމްވީއަށް މައުލޫމާތު ދެއްވަމުން ފައިނޭންސް މިނިސްޓްރީގެ މީޑިއާ އެގްޒެކްޓިވް މުހައްމަދު ޝަނޫން ވިދާޅުވީ ފުރަތަމަ ފަހަރު ކުރި އިއުލާން އުވާލަން މެދުވެރި ސަބަބަކީ އަދަދު ތަކުގައި ކުޑަ މައްސަލައެއް ދިމާވުމާއި ގުޅިގެން ކަމަށެވެ. އަދި ސެޕްޓެމްބަރ މަހުގައި ކޮށްފައިވާ އިއުލާން ބާތިލު ކޮށްފައި މިވަނީ އިތުރު ބޭފުޅުންނަށް ބިޑް ހުށައެޅުމަށް ފުރުސަތު ދިނުމަށް ކަމަށް ވިދާޅުވިއެވެ.
މިނިސްޓްރީ އޮފް ހެލްތުގެ އެދިލެއްވުމުގެ މަތިން، މިނިސްޓްރީ އޮފް ފިނޭންސުން ކޮށްފައިވާ އިއުލާނެއްގައި ބުނެފައިވަނީ، މި މަސައްކަތްތަކަށް ބީލަން ހުށަހެޅުމުގެ ފުރުޞަތު މިކަމަށް ޝަރުޠު ހަމަވާ ހުރިހާ ފަރާތްތަކަށް ހުޅުވާލާ ކަމަށެވެ. އެގޮތުން، ކުޅުދުފުއްޓާއި ތިނަދޫގައި ޓާޝިއަރީ ހޮސްޕިޓަލް އިމާރާތް ކުރުމުގެ މަސައްކަތުގެ، ޕްރޮޖެކްޓް ބިޑް ސެކިއުރިޓީގެ ގޮތުގައި ދެ މިލިއަން ތިންލައްކަ ރުފިޔާ ދައްކަން ޖެހޭ ކަމަށް އިއުލާނުގައި ބުނެފައި ވެއެވެ.
މީގެއިތުރުން، މަނަދޫ އަތޮޅު ހޮސްޕިޓަލް އިމާރާތް ކުރުމުގެ މަސައްކަތުގެ، ޕްރޮޖެކްޓް ބިޑް ސެކިއުރިޓީގެ ގޮތުގައި އެއްމިލިއަން ދެލައްކަ ފަންސާސްހާސް ރުފިޔާ ދައްކަން ޖެހޭ ކަމަށް ވެސް އިއުލާނުގައި ބުނެފައި ވެއެވެ.
ކޮންމެ ބީލަމެއްގައި ބައިވެރިވުމަށް 1,500ރ (ފަނަރަ ސަތޭކަ ރުފިޔާ) ނުވަތަ އެއަދަށްވާ 100 ޔޫ.އެސް ޑޮލަރގެ ނޮން-ރިފަންޑަބަލް ރަޖިސްޓްރޭޝަން ފީއެއް ދައްކަވަން ޖެހޭނެ ކަމަށް ވެސް އިއުލާނުގައި ބުނެފައި ވެއެވެ. އެ ފައިސާ ބަލައި ގަންނާނީ އަންނަ އޮކްޓޫބަރު މަހުގެ 21 ވަނަ ދުވަހުގެ ނިޔަލަށް ފިނޭންސް މިނިސްޓްރީގެ އޮންލައިން ޕޭމަންޓް ޕޯޓަލް - ބަނޑޭރި ޕޭ (https://bandeyripay.finance.gov.mv) މެދުވެރި ކޮށެވެ. އަދި ފައިސާ ދެއްކުމަށްފަހު، ބީލަމަށް ރަޖިސްޓްރީވުމަށް އެދޭ ފަރާތުގެ ނަމާއި އެޑްރެސް، ގުޅޭނެ ނަންބަރާއި އީ-މެއިލް އެޑްރެސް އަދި ފައިސާ ދެއްކި ރަސީދުގެ ކޮޕީ ފިނޭންސް މިނިސްޓްރީގެ އީމެއިލް އެޑްރެހަށް ފޮނުއްވަންވާނެ ކަމަށް ވެސް ބުނެފައި ވެއެވެ.
މި ޕްރޮޖެކްޓުތަކުގެ ބިޑް ސެކިޔުރިޓީގެ މުއްދަތަކީ ބިޑު ހުޅުވާ ތާރީޚުން ފެށިގެން 148 ދުވަހެވެ.
ބިޑް ހުށައެޅުމުގެ ސުންގަޑިއަކީ 18 ނޮވެމްބަރ 2020 ވަނަ ދުވަހުގެ 10:00 ގައި ކަމަށް ފިނޭންސް މިނިސްޓްރީގެ ނެޝަނަލް ޓެންޑަރގެ ޖަލްސާ ކުރާ މާލަމުގައި ކަމަށް ވެސް އިއުލާނުގައި ބުނެފައި ވެއެވެ.
