ކޮވިޑް-19 އާ ގުޅިގެން އައިޖީއެމްއެޗުން މެދުކަނޑާލި ބައެއް ޚިދުމަތްތައް އަލުން ފަށައިފި
15 އޮކްޓޯބަރު 2020 | ބުރާސްފަތި 17:47އޮންލައިން އޯޕީޑީގެ އިތުރުން ހޮސްޕިޓަލުގެ އޯޕީޑީގެ ޚިދުމަތް ލިބޭނެ
ކޮވިޑް-19 އާ ގުޅިގެން އައިޖީއެމްއެޗްގެ ޚިދުމަތްތަކަށް ވަނީ ބަދަލު ގެނެސްފައި
ކޮވިޑް-19 އާ ގުޅިގެން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން މެދުކަނޑާލި ބައެއް ޚިދުމަތްތައް އަލުން ފަށައިފިއެވެ.
އައިޖީއެމްއެޗުން ބުނީ ކޮވިޑް-19 އާއި ގުޅިގެން ހެލްތް ޕްރޮޓެކްޝަން އެޖެންސީ (އެޗް.ޕީ.އޭ) އިން އެޅި ރައްކާތެރިކަމުގެ ފިޔަވަޅުތަކަށް ގެނެވުނު ލުއިތަކާއިއެކު ހޮސްޕިޓަލުން މެދުކަނޑާލެވުނު ޚިދުމަތްތައް ފަށައި، ހޮސްޕިޓަލުގެ ހިންގާ އޯޕީޑީތަކާއި އެހެނިހެން ޚިދުމަތްތަކަށް މިމަހުގެ 19 އިން ފެށިގެން ބަދަލުތައް ގެނައުމަށް ނިންމާފައިވާ ކަަމަށެވެ.
އެގޮތުން އޮންލައިން އޯޕީޑީގެ އިތުރުން ހޮސްޕިޓަލުގެ އޯޕީޑީގައި ޑޮކްޓަރުން ބަލިމީހުން ބައްލަވާނީ ހެނދުނު 09:00ން 12:00ށް އަދި މެންދުރުފަހު 13:00ން 16:00 އަށެވެ. ޓެލެފިޒިއޯ ކްލިނިކްތަކުގެ އިތުރުން ބަލިމީހުން ގެނެސްގެން ދެވޭ ފިޒިއޮތެރަޕީގެ ޚިދުމަތްދިނުން ހުކުރު ދުވަސް ފިޔަވާ ހުރިހާ ދުވަހެއްގެ 09:00ން 16:00 އަށް ކުރިއަށް ގެންދެވޭނެ ކަމަށް އައިޖީއެމްއެޗުން ބުނެއެވެ.
ސްޕީޗް ތެރަޕީ ކްލިނިކްތަކުގެ އިތުރުން ބަލިމީހުން ގެނެސްގެން ދެވޭ ސްޕީޗް ތެރަޕީ ޚިދުމަތްދިނުން ހުކުރު ދުވަސް ފިޔަވާ ހުރިހާ ދުވަހެއްގެ 09:00ން 16:00ށް ކުރިއަށް ގެންދެވޭއެވެ. އަދި ޑައެޓެޓިކްސް އޮންލައިން ކްލިނިކް ހުކުރު ދުވަސް ފިޔަވާ ހުރިހާ ދުވަހެއްގެ 09:00ން 13:00ށް ކުރިއަށް ގެންދެވޭއިރު، ހަފުތާއަކު ދެ ދުވަހު ބަލިމީހުން ގެނެސްގެން ހިންގޭ ޑައެޓެޓިކްސް ކްލިނިކް ހިންގޭނެއެވެ.
އައިޖީއެމްއެޗުން ބުނީ 11 އޮކްޓޯބަރު 2020ން ފެށިގެން ދުރާލާ ރާވައިގެން ކުރަމުންގެންދާ އޮޕަރޭޝަންތައް ކުރަން ފެށިފައިވާ ކަމަށެވެ. އަދި ކުރިއެކޭ ވެސް އެއްފަދައިން ރޭޑިއޯލޮޖީ ޑިޕާޓްމަންޓުގެ ޚިދުމަތްތައް ހުކުރު ދުވަސް ފިޔަވާ ހުރިހާ ދުވަހެއްގެ 09:00ން 16:00ށް ކުރިއަށް ގެންދެވޭނެ ކަމަށާއި، ލެބޯޓްރީ ޓެސްޓްތައް ހެދުން ހުކުރު ދުވަސް ފިޔަވާ ހުރިހާ ދުވަހެއްގެ 08:00ން 16:00ށް ކުރިއަށްދާނެ ކަމަށެވެ.
އެމަޖެންސީގެ ޚިދުމަތްތައް 24 ގަޑިއިރު މެދުކެނޑުމެއްނެތި ކުރިއަށް ގެންދާކަން ފާހަގަކޮށް އައިޖީއެމްއެޗުން ވަނީ ކޮވިޑް-19 ގެ ސަބަބުން އެޗްޕީއޭއިން އެޅި ރައްކާތެރިކަމުގެ ފިޔަވަޅުތަކައް ލުއިތަކެއް ގެނެވުނު ނަމަވެސް، އެނދުމަތިކުރެވިފައިވާ ބަލިމީހުންނާއިއެކު އެއް އެހީތެރިޔަކަށް ވުރެ އިތުރަށް މަޑު ނުކުރުމަށާއި، ބަލިމީހުންނަށް ޒިޔާރަތް ނުކުރުމަށް އަދި ކުޑަ ކުދިންނާއި އުމުރުން ދުވަސްވީ މީހުން ކޮންމެހެން މަޖުބޫރު ހާލަތެއްގައި މެނުވީ ހޮސްޕިޓަލަށް ޒިޔާރަތް ނުކުރުމަށް އިލްތިމާސްކޮށްފައެވެ.
