މިނިސްޓްރީ އޮފް އިސްލާމިކް އެފެއާޒްގެ ފަރާތުން އިންތިޒާމްކޮށްގެން އިސްލާމްދީނާމެދު އުފެދިފައިވާ ޝުބުޙަތައް އާއްމުންނަށް އޮޅުން ފިލުވައިދިނުމަށްޓަކައި ވެބިނަރއެއް ބޭއްވުމަށް ނިންމައިފިއެވެ.
ޑިރެކްޓަރ އޮފް ރިސަރޗް އެންޑް ޓްރެއިނިންގް، ދަޢުވާ އިންސްޓިޓިއުޓް އޮފް ނައިޖީރިއާގެ ބައިނަލްއަޤްވާމީ އިލްމުވެރިޔާ އަލްއުސްތާޒް ނޫރުއްދީން ލޭމޫ ތަގުރީރު ކުރައްވާ މި ވެބިނާ ހުށަހަޅައިދެއްވާނީ އައްޝައިޚް ހަސަން ތައުފީގެވެ.
މި ވެބިނަރ ބޭއްވުމަށް ހަމަޖެހިފައިވަނީ 16 އޮކްޓޯބަރ 2020 ވާ ހުކުރު ދުވަހުގެ 21:00 ގައެވެ. އިސްލާމިކް މިނިސްޓްރީގެ ފޭސްބުކް ޕޭޖް އަދި ޔޫޓިއުބް ޗެނަލްއިން މި ވެބިނަރ ލައިވްކޮށް ގެނެސްދިނުމަށް ހަމަޖެހިފައިވާއިރު، އާއްމުން ފޮނުވާފައިވާ ސުވާލުތަކަށް ޖަވާބު ދިނުން ވެސް ކުރިއަށް ގެންދިއުމަށް ވަނީ ހަމަޖެހިފައެވެ.
މިގޮތަށް ބޭއްވޭ ވެބިނާތަކުގެ މައިގަނޑު މަގުސަދަކީ ދިވެހި ރައްޔިތުންގެ ދީނީ މައުލޫމާތު މުއްސަންދިކޮށް، ސައްހަ އަގީދާ ފޯރުކޮށްދިނުން ކަމަށް މިނިސްޓްރީން ބުނެއެވެ.
