ރަށްރަށުގައި ވެސް މާސްކް އެޅުން އިސްތިސްނާވާ ފަރާތްތައް ހިމެނޭ
ހޮޓާ ރެސްޓޯރެންޓް އަދި ކެފޭތަކުގައި ކާގަޑީގައި އެކަނި މާސްކް ނެގޭނީ
ރަށަކަށް ޗުއްޓީ ހޭދަކޮށްލުމަށް ގޮސްތިބި އާއިލާއެއް މަގުމަތީގައި ފޮޓޯ ނަގަނީ
ރަށްރަށުގައި ގެސްޓްހައުސްތައް އޮޕަރޭޓް ކުރަން ބުދަ ދުވަހު ފަށާފައިވާ އިރު، އެ ރަށްރަށުގައި މާސްކް އެޅުން މަޖުބުރޫ ނަމަވެސް އިސްތިސްނާވާ ފަރާތްތައް ހިމެނޭ ކަމަށް ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ ގެސްޓް ހައުސް ހިންގާ ރަށްރަށުގައި މާސްކް އެޅުން މަޖުބޫރު ކުރި މަގްސަދަކީ އެ ރަށްރަށަށް އަންނަ އިރުގައި އެ ރަށްރަށުގެ ތެރޭގައި ބަލި ފެތުރުމުގެ ފުރުސަތު ވީހާވެސް ކުޑަކުރުން ކަމަށެވެ. އަދި މާލެއެކޭ އެއްފަދައިން ލޯކަލް ޓުއަރިޒަމް ހިދުމަތްދޭ ރަށްރަށުގައި އާންމު ތަންތަނުގައި އުޅޭ އިރު އަނގަޔާއި ނޭފަތާއި ދަތްދޮޅި ނިވާވާ ވަރަށް މާސްކް އަޅަން ޖެހޭނެ ކަމަށެވެ.
ނަމަވެސް މާލޭގެ މާސްއެޅުމާ އެއްގޮތަށް މާސްކް އެޅުމުން އިސްތިސްނާވާ ފަރާތްތައް މީގެ ތެރޭގައި ހިމެނޭ ކަމަށާއި، އެއީ 2 އަހަރުން ދަށުގެ ކުޑަކުދިންނާއި، ކަސްރަތު ކުރަން އުޅޭ ވަގުތު ކަސްރަތު ކުރާ މީހުން އަދި އެހެން މީހުންގެ އެހީގައި މާސްކް އަޅާ މާކްސް ނުނެގޭ ފަރާތްތައް ކަމަށެވެ. މީގެ އިތުރުން ހޮޓާ ކެފޭ ރެސްޓޯރަންޓްތަކުގައި ކާ ވަގުތު އެކަނި މާސްކް އަޅަން ނުޖެހޭނެ ކަމަށާއި، އެހެން ހުރިހާ ހާލަތެއްގައި މާސްކް އަޅައިގެން ތިބުން މުހިންމު ކަމަށެވެ.
ގެސްޓް ހައުސްތައް ބުދަ ދުވަހު ރަސްމީކޮށް އަލިން އޮޕަރޭޓް ކުރަން ފަށާފައިވާ އިރު، އެޗްއީއޯސީން ވަނީ ހުރިހާ ފަރާތްތަކުން ވެސް ރައްކާތެރިކަމުގެ ފިޔަވަޅުތައް އެޅުމާއެކު ހެދިފައިވާ ގައިޑްލައިނާ އެއްގޮތަށް އަމަލުކުރުމަށް އިލްތިމާސްކޮށްފައެވެ. އަދި ގައިޑްލައިންގައިވާ ކަންކަން ފުރިހަމަ ކުރުމަށް ކަމާބެހޭ ހުރިހާ އިދާރާތަކަށާއި ފަރާތްތަކަށް އެ ސެންޓަރުން ވަނީ ގޮވާލާފައެވެ.
ބުދަ ދުވަހު ގެސްޓްހައުސްތައް އަލުން އޮޕަރޭޓް ކުރަން ފަށާފައިވާ އިރު، 9 ކައުންސިލަކުން ތައްޔާރު ކަމަށް ޓޫރިޒަމް މިނިސްޓްރީން ވަނީ ހާމަކޮށްފައެވެ. އަދި މިހާތަނަށް 35 ގެސްޓްހައުސް އެއް ހުޅުވުމުގެ ހުއްދަ ޓޫރިޒަމް މިނިސްޓްރީ އިން ދީފައިވެއެވެ.
ގެސްޓްހައުސްތައް ހުޅުވުމުގެ ހުއްދަ ދޭއިރު، އެންމެ ފުރަތަމަ މިނިސްޓްރީން ބަލާ އެއް ކަމަކީ އާންމުކޮށްފައިވާ ގައިޑްލައިންގައިވާ ގޮތަށް ރަށު ލެވަލްގައި ވާންޖެހޭ ތައްޔާރީތައް ވެފައިވޭތޯއެވެ. އެގޮތުން އެއީ ކަރަންޓީން އަދި އައިސޮލޭޝަން އެރޭޖްމެންޓާއި ރަށުގައި ސިއްހީ ގޮތުން ފުރިހަމަ ކުރަން ޖެހޭ ކަންކަން ފުރިހަމަކޮށް، މިކަންތައްތައް ފުރިހަމަކަމަށް އެރަށެއްގެ ރަށު ކައުންސިލުން މިނިސްޓްރީ އަށް އެކަންތައް ކަށަވަރުކޮށްދީ ފަތުރުވެރިންނަށް ރަށް ހުޅުވާލުމުގެ އިއުތިރާޒެއް ނެތް ކަމަށް ކައުންސިލުން މިނިސްޓްރީއަށް ދޭން ޖެހެއެވެ. އަދި، ހުއްދަ ދިނުމުގެ ކުރިން، ރަށުގެ ވަކިވަކި ގެސްޓްހައުސްތަކުން މިނިސްޓްރީގެ ގައިޑްލައިނާ އެއްގޮތަށް ތައްޔާރު ކޮށްފައިވާ އެސްއޯޕީ ވެސް ބަލައި ފާސް ކުރެއެވެ.
