ރާއްޖޭގެ ބޮޑު ބަޔަކަށް މޫސުން ގޯސްވެ ޔެލޯ އެލާރޓް ނެރެފި
15 އޮކްޓޯބަރު 2020 | ބުރާސްފަތި 03:01އެލާރޓް ނެރެފައިވަނީ ށ އަތޮޅުން އދ. އަތޮޅަށް
ވިއްސާރަ ދުވަހެއްގެ މަންޒަރު ދައްކުވައިދޭ ފޮޓޯއެއް
ރާއްޖޭގެ ބޮޑު ބަޔަކަށް މޫސުން ގޯސްވުމުގެ ސަބަބުން ޔެލޯ އެލާރޓް ނެރެފިއެވެ.
މޫސުން ގޯސްވުމުގެ ސަބަބުން މޫސުމާއި ބެހޭ ގައުމީ އިދާރާއިން ބުރާސްފަތި ދުވަހު ހެނދުނު ރީނދޫ އެލާރޓް ނެރެފައިވަނީ ށ. އަތޮޅުން އދ. އަތޮޅާއި ދެމެދުގެ އަތޮޅުތަކަށެވެ.
އެ ސަރަހައްދަށް ރީނދޫ އެލާރޓް ނެރެފައިވަނީ ބުރާސްފަތި ދުވަހު ހެނދުނު 7:45ން 11:45ށެވެ.
މޫސުމާއި ބެހޭ ގައުމީ އީދާރާއިން ބުނީ އެ ސަރަހައްދުގެ ރަށްތަކަށް ބޯކޮށް ވާރޭ ވެހުމާއި އެކު ގުގުރުން އެކަށީގެންވާ ކަމަށެވެ.
ގަޑިއަކު 25 މޭލާއި 30 މޭލާއި ދެމެދުގެ ބާރު މިނުގައި ވައިޖެހި ވިލާގަނޑުގައި 50 މޭލަށް ވައި ގަދަވެ ކަނޑުތައް ގަދަވާނެ ކަމަށް މޫސުމާއި ބެހޭ ގައުމީ އިދާރާ އިން މައުލޫމާތުދެއެވެ.
މި ދުވަސްވަރަކީ ރާއްޖޭގެ އެކި ކަންކޮޅުތަކަށް ވިއްސާރަ ކުރަމުންދާ ދުވަސްވަރަކަށް ވުމުން މޫސުމާއި ބެހޭ ގައުމީ އިދާރާ އިން ދަނީ މޫސުމަށް ސަމާލުވުމަށް އެދެމުންނެވެ.
އަދި ޚާއްސަކޮށް ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސް ކޮށްފައެވެ.
