މުޅި ރާއްޖޭގެ ހަކުރުބަލީގެ ޑޭޓާބޭސްއެއް ތައްޔާރު ކުރުމުގެ މަސައްކަތް ދަނީ ކުރަމުން: ނެޝަނަލް ޑައެބެޓީސް ސެންޓަރ

މުޅި ރާއްޖޭގެ ހަކަުރުބަލީގެ ޑޭޓާބޭސްއެއް ތައްޔާރު ކުރުމުގެ މަސައްކަތް ކުރިއަށްދާ ކަމަށް އިންދިރާގާންދީ މެމޯރިއަލް ހޮސްޕިޓަލްގެ ނެޝަނަލް ޑައެބެޓީސް ސެންޓަރ އިން ބުނެފިއެވެ.

އަންގާރަ ދުވަހުގެރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އައިޖީއެމްއެޗްގެ ޑިރެކްޓަރ އޮފް މެޑިކަލް ސާރވިސަސް ޑރ އަލީ ނަޒީމު ވިދާޅުވީ ރާއްޖޭގައި ގައިން ގަޔަށް ނާރާ ބަލި ތަކުގެ ތެރެއިން އެންމެ އާންމު އެއް ބައްޔަކީ ހަކުރު ބަލި ކަމަށެވެ.

Advertisement

އަލަށް ހުޅުވުނު ނެޝަނަލް ޑައެބެޓީސް ސެންޓަރަކީ ވަން ސްޓޮޕް ޝޮޕެއް ކަމަށާއި އެ ސެންޓަރުން ހުރިހާ ޚިދުމަތްތަކެއް ލިބިގެންދާނެ ކަމަށެވެ.

ޑރ ނަޒީމް ވިދާޅުވީ ހަކުުރުބަލީގެ އަލާމާތްތަކާއި، ހަކުރުބަލި ދެނެގަންނާނެ ގޮތްތަކާއި، ހަކުުރުބަލިން ލިބޭ ގެއްލުންތަކަށް އާންމުން ހޭލުންތެރިވެފައި ވީނަމަވެސް ބަލިމީހާ ބައިވެރިވެގެން ފަރުވާ ދެވޭނެ އިންތިޒާމްތައް އިތުރަށް ފުޅާކުރަންޖެހޭ ކަމަށެވެ.

ހަކުރުބަލީގެ ސެންޓަރެއް ޤާއިމް ކުުރުމުގެ އެންމެ މުހިއްމު މަޤްސަދަކީ މިހާރަށްވުރެން ވެސް ބޮޑަށް މީހުން ހޭލުންތެރި ކުރުވުމާއި މި ބަލީގައި ދިމާވާ ތަކުލީފުތައް ވީހާވެސް ބޮޑަށް މީހުންނަށް އިނގޭނެ ގޮތް މެދެވެރި ކޮށްދިނުންކަން އޭނާ ފާހަގަ ކުރެއްވިއެވެ.

މަސައްކަތް ކޮށްފިނަމަ މާލޭގެ އިތުރުން އަތޮޅު ތެރޭގެ ހޮސްޕިޓަލް ތަކާއި ހެލްތް ސެންޓަރު ތަކުގައި ވެސް ވަރަށް ގިނަ ޚިދުމަތްތައް ފުޅާކޮށް ކުރިއަށް ގެންދެވޭނެކަން މި ކޮވިޑް ތެރޭގައި ވެސް ކަށަވަރު ވެގެން ގޮސްފައިވާ ކަމަށް އޭނާ ވިދާޅުވިއެވެ.

ނަޒީމް ވިދާޅުވީ ކުރިއަށް އޮތްތާނގައިވެސް ގައުމީ ސެންޓަރުން އަތޮޅު ތެރޭގެ ހޮސްޕިޓަލްތަކުގައި ޚިދުމަތްތައް ފުޅާ ކުރުމަށް މަސައްކަތް ކުރަމުންދާނެ ކަމަށެވެ.

ހާލަތަށް ރިއާޔަތްކޮށް ޓެލެމެޑިސިން މިހާރުކުރިއަށް ގެންދިޔަ ނަމަވެސް ކުރިއަށް އޮތްތާނގައި ސެންޓަރުތަކަށް ޒިޔާރަތްކޮށް ސްކްރީނިން ޕްރޮގްތާމުތައް ހިންގުމާއި އެންމެ ފަހުގެ ދިރާސާތަކަށް ބަލައި ހުރިހާ އުމުރުފުރާއެއްގެ ހުރިހާ ލެވެލްއެއްގެ މީހުން ތަމްރީން ކުރުމުގެ މަސައްކަތް ކުރިއަށްދާނެ ކަމަށް ވިދާޅުވިއެވެ.

މީގެ އިތުރުރެން އެލްޖީއޭ މެދުވެރިކޮށް ކައުންސިލްތަކާއި މަޝްވަރާކޮށް ހަކުރުބަލީގެ ޑޭޓާބޭސް އެއް ތައްޔާރުކުުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވިއެވެ. އެ މަސައްކަތް ތިން ނުވަތަ ހަތަރު މަސް ތެރޭގައި ފުރިހަމަ ކުރެވޭނެ ކަމަށް ވެސް ވިދާޅުވިއެވެ.