ކަރަންޓީނާ ގުޅިގެން ކަވާނީއަށް އިތުރު އިންތިޒާރެއް

އިންގްލެންޑުގެ މެންޗެސްޓާގައި ކަރަންޓީނުވާން ޖެހުމުން ނިއުކާސަލް ޔުނައިޓެޑާ ދެކޮޅަށް މެންޗެސްޓާ ޔުނައިޓެޑް ކުޅޭ މެޗުގައި އެ ޓީމާ ދާދި ފަހުން ގުޅުނު އުރުގުއޭގެ ފޯވާޑް އެޑިންސަން ކަވާނީއަށް ނުކުޅެވޭނެކަން ޔަގީންވެއްޖެއެވެ.

އިނގިރޭސި ޕްރިމިއާ ލީގުގައި ޔުނައިޓެޑުން ރަށުން ބޭރުގައި ނިއުކާސަލާ ދެކޮޅަށް ނުކުންނާނީ އަންނަ ހޮނިހިރު ދުވަހުގެރެއެވެ.

ކޮވިޑް-19 އާ ގުޅިގެން އިނގިރޭސިވިލާތުގެ ސަރުކާރުން ކަނޑައަޅާފައިވާ އުސޫލުތަކުގެ ދަށުން 14 ދުވަހުގެ ކަރަންޓީން ކަވާނީ ފުރިހަމަކުރަން ޖެހެއެވެ. ފްރާންސްގައި ހުރުމަށްފަހު އިންގްލެންޑަށް ކަވާނީ ގޮސްފައިވަނީ މި މަހުގެ ފަސްވަނަ ދުވަހުއެވެ. އެހެންކަމުން އޭނާގެ ކަރަންޓީނުގެ މުއްދަތު މިމަހުގެ 19 ވަނަ ދުވަހު ހަމަވާއިރު، އޭނާއަށް ނިއުކާސަލް މެޗުގައި ކުޅުމަށް ޓީމާއެކު ނުދެވޭނެއެވެ.

އުމުރުން 33 އަހަރުގެ ކަވާނީ ޕީއެސްޖީއާއެކު ހަދާފައިވާ އެއްބަސްވުން ހަމަވެފައި އޮތުމުން، ޔުނައިޓެޑާ ގުޅުނީ ހިލޭ ޓްރާންސްފާއެއްގެ ދަށުންނެވެ. ޔުނައިޓެޑާއެކު އޭނާ ވަނީ އެއް އަހަރުގެ އެއްބަސްވުމެއް ހަދާފައެވެ. އެކަމަކު އެއްބަސްވުމުގެ މުއްދަތު އިތުރު ކުރުމުގެ ފުރުސަތު އޮންނާނެއެވެ.

ކަވާނީ ޔުނައިޓެޑަށް ސޮއިކުރިއިރު، މީގެ ކުރިން މި ސީޒަނުގެ އިނގިރޭސި ޕްރިމިއާ ލީގަށް ޕްރޮމޯޓުވި ލީޑްސް ޔުނައިޓެޑުންވެސް ވަނީ ކަވާނީއަށް ޝައުގުވެރިކަން ފާޅުކޮށްފައެވެ.

އިޓަލީގެ ނާޕޮލީން 2013 ވަނަ އަހަރު ޕީއެސްޖީއާ ގުޅުނު ކަވާނީ އެ ކުލަބު ދޫކޮށްލާފައިވާއިރު، އޭނާ ވަނީ ޕީއެސްޖީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޕީއެސްޖީއަށް ކުޅެދިން 301 މެޗުން 200 ލަނޑު ޖަހައިދީފައިވާ ކަވާނީ ވަނީ ޕީއެސްޖީއާއެކު ފްރެންޗް ލީގު ހަ ފަހަރު ހޯދާފައެވެ. އަދި ވަނީ އެ ކުލަބާއެކު ފްރެންޗް ކަޕް ހަތަރު ފަހަރު އަދި ފްރެންޗް ލީގު ކަޕް ފަސް ފަހަރު ކާމިޔާބުކޮށްފައެވެ.