ދުވާފަރުގެ ބޮޑެތި މަގުތައް ހެދުމުގެ މަޝްރޫއުގެ 77 އިންސައްތަ މަސައްކަތް ނިމިއްޖެ
މި މަޝްރޫޢުއަކީ 37.8 މިލިއަން ރުފިޔާގެ މަޝްރޫޢުއެއް
ރ. ދުވާފަރުގައި މަގުތަކުގައި ތާރު އެޅުމުގެ މަޝްރޫއު
ރ. ދުވާފަރު ގެ ބޮޑެތި މަގުތައް ހެދުމުގެ މަޝްރޫއު އަކީ އެރަށު އެތައް ބައެއްގެ އުއްމީދާ ގުޅިފައިވާ ކަމެއް ކަމަށް އެ ރަށު ކައުންސިލް ގެ ނައިބު ވިދާޅުވެއްޖެއެވެ.
އެގޮތުން ދުވާފަރު ކައުންސިލްގެ ނައިބު ރައީސް ހައްވާ ސަމީލާ ރާއްޖެއެމްވީއަށް މައުލޫމާތު ދެއްވަމުން ވިދާޅުވީ މި ކަމަކީ އެތައް ބައެއްގެ އުއްމީދާ ގުޅިފައިވާ ކަމެއް ކަމުގައެވެ.
ދުވާފަރު މަގު ހެދުމުގެ މަޝްރޫއުގެ ފުރަތަމަ ފިޔަވަހި ފަށާފައިވަނީ މިދިޔަ އަހަރުގެ ޖޫން މަހުގެ 12 ގައެވެ. މި މަޝްރޫއުގެ މަސައްކަތުގެ 77 އިންސައްތަ މިހާރު ވަނީ ނިމިފައެވެ.
އެގޮތުން، މިހާރު އެތަނުގައި ކުރިއަށްދަނީ ތާރު އެޅުމުގެ މަސައްކަތްކަން ފާހަގަކޮށް އެމްޓީސީސީން ބުނީ، މި އަހަރުގެ ޑިސެމްބަރު މަހުގެ ތެރޭގައި ފުރަތަމަ ފިޔަވަހީގެ މަސައްކަތް އެއްކޮށް ނިންމާލެވޭނެ ކަމަަށެވެ.
ސަމީލާ ވިދާޅުވީ ދުވާފަރަކީ އާބާދީ ބޮޑު ރަށެއް ކަމަށާ އެރަށުގައި ގިނަ އަދަދެއްގެ ކާރާ ސައިކަލު ދުއްވާއިރު މަގު ހެދުމުގެ ކުރިން ނުހަނު ގިނަ ދަތިތަކާ ކުރިމަތި ވާކަމަށެވެ. މި އުޅަނދުތައް ދުއްވުމުގައި ގިނަ އުނދަގޫތަކާ ކުރިމަތިލާން ޖެހޭ ކަމުގައެވެ.
އޭނާ އިތުރަށް ވިދާޅުވީ އުއްމީދަކީ ބޮޑެތި ހުރިހާ މަގުތަކެއްވެސް މިފަދަ ފެންވަރެއްގައި ހެދިގެން ދިއުން ކަމަށެވެ. ސެޕްޓެމްބަރު މަހުގެ 9 ވަނަ ދުވަހު ސޮއި ކުރެވުނު މި މަޝްރޫޢު އަކީ 37.8 މިލިއަން ރުފިޔާގެ މަޝްރޫއެކެވެ.
ދެވަނަ ފިޔަވަހީގެ ދަށުން ކުރެވޭ މަސައްކަތްތަކުގެ ތެރޭގައި ފައިމަގުގައި ހިނގޭ ގޮތަށް 4960 އަކަމީޓަރުގެ ސަރަހައްދެއް ޤާއިމް ކުރުމާއި މަގުގައި ދުއްވޭ ގޮތަށް 17690 އަކަމީޓަރުގެ ސަރަހައްދެއް ޤާއިމް ކުުރުމާއި، ކޭބަލް ހޮޅި ވަޅުލުމާއި، މަގުބައްތި ނިޝާން ހަރުކުރުމުގެ މަސައްކަތް ހިމެނެއެވެ. މި މަސައްކަތް ނިންމާލެވޭނެ ކަމަށް އެމްޓީސީސީން ލަފާކޮށްފައިވަނީ 300 ދުވަސް ތެރޭގައެވެ.
