ވަކި ކަމެއް ކުށެއްގެ ގޮތުގައި ކަނޑަނާޅާ އޮތުމަކީ ތަހުގީގު ނުކުރެވެން ޖެހޭ ސަބަބެއް ނޫން: އިންތި
'ނުހައްގު މުއްސަނދިކަން ހޯދުން' ކުށެއްގެ ގޮތުގައި ކަނޑަނާޅާ އޮތުމަކީ ތަހުގީގު ނުކުރެވެންވީ ސަބަބެއް ނޫން: އިންތި
މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)
ވަކި ކަމެއް ކުށެއްގެ ގޮތުގައި ކަނޑަނާޅާ އޮތުމަކީ އެ މައްސަލައެއް ތަހުގީގު ނުކުރެވެން ޖެހޭ ސަބަބެއް ނޫން ކަމަށް ވިދާޅުވެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ނުރުހުން ފާޅުކުރައްވައިފިއެވެ.
ނުހައްގު މުއްސަނދިކަން ހޯދާ ލިބިގަތުމަކީ ކުށެއްގެ ގޮތުގައި ކަނޑައެޅުމަށް ގާނޫނުލް އުގޫބާތަށް ހުށައަޅާފައިވާ އިސްލާހަށް ބަހުސް ކުރައްވަމުން އިންތި ވަނީ މައްސަލަތަކުގެ ތަހުގީގުތައް ލަސްވާތީ ތަގުގީގީ އިދާރާތަކަށް ފާޑުވިދާޅުވެފައެވެ.
އިންތި ވިދާޅުވީ ކޮރަޕްޝަންގެ އަމަލުތަކާއި، ދައުލަތަށް އަނބުރާ ހޯދަން ޖެހޭ ފައިސާ ނުހޯދި ލަސްވަމުން ދަނީ 'ނުހައްގު މުއްސަނދިކަން ހޯދުން' ކުށެއްގެ ގޮތުގައި ކަނޑަނާޅާ އޮތުމަކީ ތަހުގީގު ނުކުރެވެންވީ ސަބަބެއް ނޫން ކަމަށެވެ. އަދި ކުށެއްގެ ގޮތުގައި ކަނޑަނާޅައިގެން ދައުލަތަށް ހޯދަން ޖެހޭ ފައިސާއެއް ނުހޯދާ ތިބުމަކީ ގަބޫލުކުރެވޭނެ ކަމެއް ނޫން ކަމަށް ވިދާޅުވިއެވެ.
މެމްބަރު ވިދާޅުވީ މިފަދަ މައްސަލަތައް ބެލުމަށް އެ އިދާރާތަކަށް ގާނޫނީ ގޮތުން ބާރު ލިބިފައިވާ ކަމަށެވެ. މި އިސްލާހަށް ބަހުސް ކުރައްވަމުން އިންތި ވަނީ އެންޓި ކޮރަޕްޝަން ކޮމިޝަން (އޭސީސީ) އަށް ވެސް ވަރަށް ބޮޑަށް ފާޑުވިދާޅުވެފައެވެ. އަދި ބޮޑެތި ކޮރަޕްޝަންގެ މައްސަލަތަކުގެ ތަހުގީގު ހިންގުމަށް އެ އިދާރާ ނުކުޅެދިފައިވާ ކަމަށް ވެސް ވިދާޅުވިއެވެ.
ކޮރަޕްޝަން ފަދަ ކުށްތައް ތަހުޤީޤުކޮށް ފިޔަވަޅު އެޅުމަށް ޤާނޫނުން މަތިކޮށްފައިވާ މުއައްސަސާއަކީ އޭސީސީ ނަމަވެސް، އެ ކޮމިޝަނުގެ ޒިންމާތައް އެންމެ ފުރިހަމައަށް އަދާ ނުކުރާ ކަމުގެ ޝަކުވާއަކީ އާންމުންވެސް ކުރަމުންދާ ޝަކުވާއެކެވެ.
