ގާނޫނުލް އުގޫބާތަކީ އިސްލާމީ އުސޫލުތަކާއި ގާނޫނު އަސާސީ އާއި އެއްގޮތް އެއްޗެއް ކަމަށް ގިނަ ބަޔަކު ދެކޭ: ނަޝީދު
13 އޮކްޓޯބަރު 2020 | އަންގާރަ 09:24ގާނޫނުލްއުގޫބާތް ތައާރަފްވެގެން އައިގޮތާއި ގުޅިގެން ވާހަކަދެއްކެވި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރާއްޖޭގެ ގާނޫނުލް އުގޫބާތަކީ އިސްލާމީ އުސޫލުތަކާއި ރާއްޖޭގެ ގާނޫނު އަސާސީ އާއި އެއްގޮތް އެއްޗެއް ކަމަށް ގިނަ ބަޔަކު ދެކޭ ކަމަށް ރައްޔިތުންގެ މަޖިލީހުގެ ރައީސް ވިދާޅުވެއްޖެއެވެ.
އަންގާރަ ދުވަހުގެ ޖަލްސާގައި ރައީސް ނަޝީދު ވަނީ ރާއްޖޭގެ ގާނޫނުލް އުގޫބާތް ތައާރަފްވެގެން އައިގޮތާއި ގުޅިގެން ވާހަކަ ދައްކަވާފައެވެ.
ރައީސް ނަޝީދު ވިދާޅުވީ ގާނޫނު އަސާސީ އިސްލާހު ކުރުމުގެ ރޫހާއި ގިނަ ޕާޓީ އެކުލެވޭ ސިޔާސީ ނިޒާމުގެ ރޫހާއި އެކު ގާނޫނުލް އުގޫބާތަށް ޒަމާނީ ބަދަލުތަކެއް ގެނެސްފައިވާ ކަމަށެވެ. އަދި ރާއްޖޭގެ ގާނޫނުލް އުގޫބާތަކީ ދިވެހިރާއްޖޭގެ ގާނޫނު އަސާސީގަ ބުނާ އިސްލާމީ އުސޫލުތަކާއި އެއްގޮތް ކަމަށް ގިނަ ބަޔަކު ގަބޫލުކުރައްވާ ކަމަށް ވިދާޅުވިއެވެ.
މިހާރުވެސް ގާނޫނުލް އުގޫބާތަށް އިސްލާހު ގެނައުމުގެ މަސައްކަތް މަޖިލީހުގައި ކުރިއަށް އެބަދެއެވެ. ގާނޫނުލް އުގޫބާތަށް އިސްލާހު ގެނައުމުގެ މަސައްކަތަކީ ކޮރަޕްޝަންގެ ޢަމަލުތައް ހިންގުން އިތުރުވަމުންދިޔުމާއި، އެފަދަ ޢަމަލުތައް ހިނގަމުންދާގޮތް ބަދަލުވެ، ޒަމާނީވަމުންދާ ދަނޑިވަޅެއްގައި، ކޮރަޕްޝަން ހުއްޓުވުމާއި މަނާކުރުމުގެ ޤާނޫނުގައި ކޮރަޕްޝަންގެ ގޮތުގައި ކަނޑައަޅާފައިވާ ކުށް ކުށަކީ ޒަމާނާ ނުބައްދަލު ކުށްތަކެއް ކަމުގައި ވާތީ، އެ ފަދަ ކުށްތައް މިހާރަށް ފެތޭގޮތަށް ބަދަލުކޮށް ގާނޫނުލްއުގޫބަތުގައި ހިމެނުމަށް ކުރަމުން ގެންދާ މަސައްކަތެއް ކަމަށް ސަރުކާރުން ވަނީ މައުލޫމާތު ދީފައެވެ.
