ގެސްޓްހައުސް ހުންނަ ރަށްތަކުން ކަރަންޓީން ނުވެ ދަތުދުކުރެވޭނީ ވަކި ހާލަތްތަކެއްގައި
13 އޮކްޓޯބަރު 2020 | އަންގާރަ 04:13ގެސްޓްހައުސްތައް ހުޅުވާލުމަށް ހަމަޖެހިފައިވަނީ މިމަހުގެ 15 ގައި
އެޗްއީއޯސީގެ ތަރުޖަމާނު ޑރ. ނަޒްލާ ރަފީޤު
ގެސްޓްހައުސް ހުންނަ ރަށްރަށުން ގެސްޓްހައުުސް އޮޕަރޭޓް ނުކުރާ ރަށްރަށާއި ދެމެދު ދަތުރުކުރެވޭނީ ވަކި ހާލަތްތަކެއްގައި ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފިއެވެ.
ހޯމަ ދުވަހުގެރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވި ގޮތުގައި، އެ ހާލަތްތަކުގެ ތެރޭގައި ހިމެނެނީ ސިއްޚީ ޚިދުމަތެއް ހޯދުމަށް، އާއިލާގެ މެންބަރަކު ބަލިވެގެން ޒިޔާރަތް ކުުރުމަށް، ބޭންކްގެ އެކި ކަހަލަ ޚިދުމަތް ހޯދުމަށް، ރަށްރަށުގައި ހައްދާ ތަކެތި ނުވަތަ ބޭނުންވާ ޒަރޫރީ ތަކެތި ވިއްކުމަށް ރަށަކަށް ދިއުމަށް، ބައެއް ހާލަތްތަކުގައި ކޯޓަށް ހާޒިރުވުމަށް އަދި ސްކޫލަށް ދިއުމަށް ދެރަށް ދެމެދުގައި ކުރާ ދަތުރުތަކެވެ.
ގެސްޓްހައުސް އޮޕަރޭޓްކުރާ ރަށަކުން ގެސްޓްހައުސް އޮޕަރޭޓް ނުކުރާ ރަށަކަށް އާންމު އުސޫލުން ދަތުރު ކުރާނަމަ 14 ދުވަހުގެ ކަރަންޓީން މުއްދަތު ފުރިހަމަ ކުރަންޖޭހޭ ގޮތަށް އެޗްޕީއޭއިން ވަނީ ކަނޑައަޅާފައެވެ. އަދި ގެސްޓްހައުސް އޮޕަރޭޓްކުރާ ރަށްރަށުގައި އަމަލުކުރަންޖެހޭ ގައިޑްލައިންއެއް ވަނީ އެކުލަވާލާފައެވެ.
މި ގައިޑްލައިންއަށް ރައްޔިތުން އަހުލުވެރިކުރުމުގެ މުހިއްމު ކަމާއި ގުޅޭގޮތުން ވާހަކަދައްކަވަމުން ޑރ. ނަޒްލާ ވަނީ ގައިޑްލައިން ތަންފީޒުކުރާނެ ގޮތްތައް ރާވާ ރަނގަޅަށް މޮނިޓަރ ކުރުމަށް ޓާސްކްފޯސްތަކަށް ގޮވާލައްވާފައެވެ. މި ޓާސްކްފޯސްތަކަކީ ގެސްޓްހައުސްތައް ހުޅުވަން ހުއްދަދޭ ރަށްރަށުގައި އެކުލަވާލަންޖެހޭ ޓާސްކްފޯސްއެކެވެ.
މި މަހުގެ 15 ގައި އަތޮޅުތެރޭގައި ގެސްޓްހައުސްތައް ހުޅުވާލުމަށް ހުއްދަ ދިން ނަމަވެސް ގްރޭޓަރ މާލޭ ސަރައްހައްދުގައި ގެސްޓްހައުސްތައް ހުޅުވާނެ ތާރީޚެއް އަދި އިއުލާން ކޮށްފައެއް ނުވެއެވެ.
