ސުއަރޭޒްގެ ބަދަލުގައި އައު ފޯވާޑެއް ނުހޯދުމަކީ ބާސާއިން ހެދި ބޮޑު ގޯހެއް: ރިވާލްޑޯ

އުރުގުއޭގެ ފޯވާޑް ލުއިސް ސުއަރޭޒްގެ ބަދަލުގައި މި ނިމުނު ޓްރާންސްފާގައި އައު ފޯވާޑެއް ނުހޯދުމަކީ ބާސެލޯނާއިން ހެދި ބޮޑު ގޯހެއް ކަމަށް އެ ޓީމުގެ ކުރީގެ ތަރި ރިވާލްޑޯ ބުނެފިއެވެ.

ބާސާއިން އުމުރުން 33 އަހަރުގެ ސުއަރޭޒް ވިއްކާލީ ސުއަރޭޒްގެ އުމުރު ދޮށިވުމާއި، އެޓީމުގެ ކޯޗު ރޮނާލްޑް ކޫމަނުގެ ޕްލޭނުގައި ސުއަރޭޒް ނުހިމެނޭތީ ކަމަށް މީޑިއާތަކުގައި ވަނީ ރިޕޯޓުކޮށްފައެވެ. ބާސާ ދޫކޮށް ދެ އަހަރު ދުވަހުގެ އެއްބަސްވުމެއްގެ ދަށުން ސުއަރޭޒް ބަދަލުވީ ވާދަވެރި އެތުލެޓިކޯ މެޑްރިޑަށެވެ. ރިޕޯޓުތައް ބުނާ ގޮތުން ސުއަރޭޒްގެ ސޮއި ހޯދުމަށް އެތުލެޓިކޯއިން ބާސާއަށް ހަ މިލިޔަން ޔޫރޯ ވަނީ ދައްކާފައެވެ.

މި ނިމުނު ޓްރާންސްފާގައި ބާސާއިން ވަނީ ލިޔޯނަށް ކުޅެމުން އަންނަ ނެދަލެންޑްސްގެ ފޯވާޑް މެމްފިސް ޑިޕާއި ހޯދުމަށް މަސައްކަތް ކޮށްފައެވެ. އުމުރުން 26 އަހަރުގެ ޑީޕާއި އަކީ ބާސާގެ މިހާރުގެ ކޯޗު ރޮނާލްޑް ކޫމަން، ނެދަލެންޑްސްގެ ގައުމީ ފުޓްބޯޅަ ޓީމުގައި އިރުޝާދު ދީފައިވާ ކުޅުންތެރިއެކެވެ. ކޫމަނުގެ އެދުމުގެ މަތިން ބާސާއިން މި ނިމުނު ޓްރާންސްފާގައި ޑިޕާއި ހޯދުމަށް ވަނީ މަސައްކަތް ކޮށްފައެވެ. ޑިޕާއި އަމިއްލަ ގޮތުން ބާސާއަށް ބަދަލުވުމަށް އެއްބަސްވި ނަމަވެސް، ބާސާ އާއި ލިޔޯނާ ދެމެދު ރަސްމީކޮށް އެއްބަސްވުމަކަށް އައިސްފައެއް ނުވެއެވެ.

ބާސާގެ މިހާރުގެ ރައީސް ޖޯސެފް މާރިއާ ބާޓޮމެއޫއަށް އެންމެ ބޮޑަށް ފާޑުކިޔާ މީހުންގެ ތެރޭގައި ހިމެނޭ ރިވާލްޑޯ ބުނީ ސުއަރޭޒް ދޫކޮށްލިއިރު، ބާސާއިން އޭނާގެ ބަދަލުގައި ގެންނާނެ ކުޅުންތެރިއެއް ވިސްނާފައި ނެތުމަކީ ދެރަ ކަމެއް ކަމަށެވެ. އަދި އިތުރު ގޮތްތަކެއް ހޯދަން ދެން ވަގުތު ފާއިތުވެއްޖެ ކަމަށާއި، ކުލަބަށް ބަދަލުތަކެއް އަންނަން ޖެހޭ ކަމަށްވެސް ބުންޏެވެ. ރިވާލްޑޯ އިތުރަށް ބުނީ ސުއަރޭޒް ނެތްތަން ލީގު މެޗެއްގައި ނުދައްކަފާނެ ކަމަށާއި، އެކަމަކު ޔުއެފާ ޗެމްޕިއަންސް ލީގު ފަދަ ބޮޑު މުބާރާތެއްގައި އެފަދަ ކުޅުންތެރިއެއްގެ ބޭނުން ބާސާއަށް ޖެހޭނެ ކަމަށެވެ.

ބާސާއިން ސުއަރޭޒް ވިއްކާލިއިރު، ކޫމަނުގެ އިރުޝާދުގެ ދަށުން ބާސާއިން މިހާތަނަށް ކުޅުނު މެޗުތަކުގައި އެ ޓީމުގެ އެންމެ ކުރީގައި ހަރަކާތްތެރިވަނީ ކެޕްޓަން ލިއޮނެލް މެސީއެވެ.

ލިވަޕޫލް ދޫކޮށް 2014 ވަނަ އަހަރު 65 މިލިޔަން ޕައުންޑަށް ބާސާއާ ގުޅުނު ފޯވާޑް ހަ ސީޒަނަށްފަހު އެ ކުލަބު ދޫކޮށްލިއިރު، އޭނާ ވަނީ ބާސާއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ސުއަރޭޒް ބާސާއަށް ކުޅެދިން 283 މެޗުގައި 198 ލަނޑު ކާމިޔާބުކޮށްފައިވާއިރު، އޭނާ އަކީ ބާސާގެ ތާރީޚުގައި ތިންވަނައަށް އެންމެ ގިނަ ލަނޑު ޖެހި ކުޅުންތެރިޔާއެވެ. އަދި ސުއަރޭޒް ވަނީ ބާސާއާއެކު 13 ތަށި އުފުލާލާފައެވެ. އޭގެ ތެރޭގައި ސްޕެނިޝް ލީގު ހަތަރު ފަހަރު އަދި ޔުއެފާ ޗެމްޕިއަންސް ލީގު އެއް ފަހަރު ހިމެނެއެވެ.