ސަރުކާރުން މާލީ އިދާރާތަކަށް ފޯރުކޮށްދީފައިވާ ދައުލަތުގެ އައުޓްސްޓޭންޑިންގް ބެލެންސް ދިމާ ނުވާކަމަށް އޮޑިޓު ރިޕޯޓުން ހާމަވެއްޖެއެވެ.
މިކަން މަޖިލީހުގެ ސަމާލުކަމަށް ގެންނަވާ މަޖިލީހުގެ ރައީސް މުހައްމަދު ނަޝީދު ހޯމަ ދުވަހުގެ ޖަލްސާގައި ވާހަކަދައްކަވަމުން ވިދާޅުވީ މަޖިލީހަށް ދެ އޮޑިޓު ރިޕޯޓެއް ލިބިފައިވާ ކަމަށެވެ. އޭގެ ތެރެއިން ދައުލަތުގެ ގެރެންޓީތަކާއި ގުޅިގެން އެކުލަވާލެވިފައިވާ އޮޑިޓް ރިޕޯޓާއި ގުޅިގެން ރައީސް ނަޝީދު ވިދާޅުވީ މިނިސްޓްރީ އޮފް ފިނޭންސްގެ އައުޓްސްޓޭންޑިންގް ބެލެންސްއާއި ފައިނޭންސިންގް ފަރާތްތަކުގެ އައުޓްސްޓޭންޑިންގް ބެލެންސްގައި ފަރަގު ހުރި ކަމަށް ރިފޯޓުން ފާހަގަވާ ކަމަށެވެ. އެގޮތުން، 31 ޑިސެމްބަރު 2018 ގެ ނިޔަލަށް ބެލެންސުގެ ގޮތުގައި ހުރި 164 މިލިއަނަށް ވުރެ ގިނަ ރުފިޔާއަކީ ސައްހަ އަދަދެއްކަން ކަށަވަރު ކުރެވިފައިނުވާ ކަމަށެވެ.
އޮޑިޓަރ ޖެނެރަލް އެބަ ފާހަގަކުރައްވާ ދައުލަތުން ގެރެންޓީތައް ދީފައިވާ ލޯނުގެ ދަށުން ހިންގާފައިވާ މަޝްރޫއުތަކުގެ މިނިސްޓްރީ އޮފް ފިނޭންސްގެ އައުޓްސްޓޭންޑިންގް ބެލެންސްއާއި ފައިނޭންސިންގް ފަރާތްތަކުގެ އައުޓްސްޓޭންޑިންގް ބެލެންސިން ގައި ފަރަގު ހުރި ކަމަށް. ފަރަގު ހުރުމުން 31 ޑިސެމްބަރު 2018 ގެ ނިޔަލަށް ބެލެންސުގެ ގޮތުގައި 164،564،083 ރުފިޔާއަކީ ސައްހަ އަދަދެއް ކަމަށް ކަށަވަރު ނުވާކަމަށް.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
މީގެ އިތުރުން، ރައީސް ނަޝީދު ވިދާޅުވީ ދައުލަތުގެ ނަމުގައި ގެރެންޓީ ދޫކުރުމުގެ އުސޫލުގެ ދަށުން ގެރެންޓީކޮށްފައިވާ ލޯނުގެ ދަށުން ހިންގޭ މަޝްރޫއުތަކުގެ ސްޓޭޓަސް ކޮންމެ ހަތަރު މަހުން އެއް ފަހަރު މިނިސްޓްރީ އޮފް ފިނޭންސްއަށް ހުށައެޅުމަށް ބަޔާންކޮށްފައިވާއިރު ލޯނުތައް ބެލެހެއްޓުމާއި ގުޅޭ މައްސަލަތަކެއް ފާހަގަވެފައިވާ ކަމަށެވެ. އެގޮތުން ދެ ގެރެންޓީއެއްގެ މައްސަލަ ފާހަގަވެފައިވާ ކަމަށެވެ.
އޮޑިޓަރ ޖެނެރަލް އެބަ ވިދާޅުވޭ ދައުލަތުގެ ނަމުގައި ގެރެންޓީ ދޫކުރުމުގެ އުސޫލުގެ 13 ވަނަ މާއްދާގެ (ދެވަނަ ނަންބަރުގެ) ގައި ގެރެންޓީކޮށްފައިވާ ލޯނުގެ ދަށުން ހިންގޭ މަޝްރޫއުގެ ސްޓޭޓަސް ކޮންމެ ހަތަރު މަހުން އެއް ފަހަރު މިނިސްޓްރީ އޮފް ފިނޭންސް އަށް ހުށައެޅުމަށް ބަޔާންކޮށްފައިވީ ހިނދު އެ މައުލޫމާތު، ލޯނުތައް ބެލެހެއްޓުމުގެ މައްސަލައެއް ފާހަގަކުރައްވާ އޮޑިޓަރ ޖެނެރަލް. ހަމަ އެއާއި އެކީގައި އެނގިވަޑައިގަންނަވާނެ ދެ ގެރެންޓީއެއް މިތަނަށް ފާހަގަވި. އެ ދެ ގަރަންޓީ ޓްރެޝަރީ އިން ވަނީ ބާތިލުކޮށްފަ.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ދެ ގެރެންޓީއެއް ބާތިލުކޮށްފައި ވާކަން ފާހަގަކުރައްވާ ރައީސް ނަޝީދު ވިދާޅުވީ ގެރެންޓީގެ އެގްރީމެންޓުގެ ދެވަނަ މާއްދާގައި ވާގޮތުން ބޭންކް ގެރެންޓީއެއް ބާތިލުކޮށްފި ނަމަ އެ ގެރެންޓީ އަނބުރާ ގެނެސް ޓްރެޝަރީއާއި ހަވާލުކުރަންޖެހޭ ކަމަށެވެ. އެހެންނަމަވެސް، އެ ގެރެންޓީތަކުގެ މައުލޫމާތު ފިނޭންސް މިނިސްޓްރީއަށް ލިބިފައިނުވާކަމަށެވެ.
ރައީސް ނަޝީދު ފާހަގަކުރެއްވި ދެ ގެރެންޓީއަކީ ހުޅުމާލޭގައި 5000 ސޯޝަލް ހައުސިންގ ޔުނިޓް ޢިމާރާތްކުރުމުގެ މަޝްރޫޢު ކުރިއަށް ގެންދިޔުމަށްޓަކައި، 22 އޮގަސްޓް 2016 ގައި އޮޒްޓާރކް ހޯލްޑިންގސްއަށް ދައުލަތުގެ ނަމުގައި ދޫކޮށްފައިވާ 327.8 މިލިއަން އެމެރިކާ ޑޮލަރުގެ ގެރެންޓީއެކެވެ.
ދެވަނަ ގެރެންޓީއަކީ ހުޅުމާލެ ދެވަނަ ފިޔަވަހީގައި 1000 ސޯޝަލް ހައުސިންގ ޔުނިޓް ޢިމާރާތްކުރުމުގެ މަޝްރޫޢު ކުރިއަށް ގެންދިޔުމަށްޓަކައި، 29 ނޮވްމްބަރު 2016 ގައި ވީ ވިތް ނޭޗަރ ލަންކާ އިންވެސްޓްމަންޓް ޕްރައިވެޓް ލިމިޓެޑްއަށް ދައުލަތުގެ ނަމުގައި ދޫކޮށްފައިވާ 65.2 މިލިއަން އެމެރިކާ ޑޮލަރުގެ ގެރެންޓީ އެކެވެ.
