އެންޓި ކޮރަޕްޝަން ކޮމިޝަން (އޭސީސީ) ގެ ކުރީގެ ސެކްރެޓްރީ ޖެނެރަލް ޢަބްދުﷲ ރަޝީދު އެ ކޮމިޝަނުގައި ގިނަ ދުވަސްތަކެއް ވަންދެން މަސައްކަތް ކުރި މުވައްޒަފަކު ވަޒީފާއިން ވަކިކުރުމާ ގުޅޭ ލިޔެކިޔުންތަކެއް ފޯރޖް ކުރިކަމުގެ ތުހުމަތަކީ ކަނޑައެޅިގެން ދޮގެއްކަމަށް އޭނާ ވިދާޅުވެއްޖެއެވެ.

ރާއްޖެއެމްވީއަށް އެނގިފައިވާ ގޮތުގައި އެ މުވައްޒަފު ކޮމިޝަނުން ވަކިކުރިއިރު، އޭސީސީގައި މަސައްކަތް ކުރަމުންދާތާ 5 އަހަރަށްވުރެ ގިނަ ދުވަސް ވަނީ ވެފައެވެ. އަދި މި މައްސަލަ 21 އޭޕްރިލް 2019 ގައި ވަޒީފާއާބެހޭ ޓްރައިބިއުނަލްއަށް ހުށައަޅާފައިވާއިރު، އޭސީސީން މުވައްޒަފަށް ލިއުމުން އިންޒާރު ދިންކަމުގެ ލިޔުމުގައި ސޮއި ކޮށްފައިވަނީ އެންޓި ކޮރަޕްޝަން ކޮމިޝަނުގެ ކުރީގެ ސެކްރެޓަރީ ޖެނެރަލް ޢަބްދުﷲ ރަޝީދުކަން އިތުބާރު ހުރި މަސްދަރަކުން ރާއްޖެއެމްވީއަށް ވަނީ ކަށަވަރު ކޮށްދެއްވާފައެވެ.

އެކަން ހިނގާ ދިޔަ ގޮތާ ގުޅޭގޮތުން ރާއްޖެއެމްވީއަށް މައުލޫމާތު ދެއްވަމުން އަބްދުﷲ ރަޝީދު ވިދާޅުވީ، އެ ލިއުމަކީ ކޮމިޝަންގެ މުވައްޒަފެއް މަސައްކަތުގައި ފަރުވާކުޑަ ކުރާތީ އޭނާއަށް ނަޞޭހަތް ދިނުމަށް ކޮމިޝަންގެ ބައްދަލުވުމެއްގައި އެޖެންޑާ ކުރެވި، އެގޮތަށް ނިންމާ ޔައުމިއްޔާކޮށް، އަނގަބަހުން ނަޞޭހަތްދީ ނަޞޭހަތް ދެވުނު ކަން ނޯޓުކޮށްފައިވާ ލިއުމެއް ކަމަށެވެ.

މިކަން އެކަން އެންމެ ރަނގަޅަށް ސާފުވާނީ ޓްރައިބިއުނަލްއަށް މައްސަލަ ހުށަހެޅި މުވައްޒަފުގެ ސުޕަވައިޒަރ އޭނާއަށް ދީފައިވާ އެޕްރައިޒަލްގެ ޕޮއިންޓަށް ބެލުމުންކަން އަބްދުﷲ ރަޝީދު ފާހަގަކުރެއްވިއެވެ. އެގޮތުން ޖެހިގެން ގިނަ ކްއާޓަރތަކެއްގައި، ހާޒިރީއަށް ފަރުވާކުޑަވުމާއި، އޮފީހުން ބޭރުގައި އަމިއްލަ ކަންކަމުގައި ވަގުތު ހޭދަކުރުމާއި، ޙަވާލުކުރާ މަސައްކަތް ނުކުރުމުގެ ސަބަބުން އެތައް ކްއާޓަރއެއްގައި އޭނާގެ ޕަރފޮރމަންސް 70 ޕޮއިންޓަށްވެސް ނާރާކަމަށް އޭނާ ވިދާޅުވިއެވެ.

މި މައްސަލައިގައި ފޯރޖްކުރި ކަމުގެ ތުހުމަތު ކުރެވޭ ލިޔުމުގައި އެފަދަ އެހެން ލިޔުންތަކާ ތަފާތު އެތައްކަމެއް ފާހަގަ ކުރެވިފައިވުމާއި، އެ ލިއުމާ ޙަވާލުވި މީހެއް އެނގެން ނެތުމާއި، ލިޔުމުގެ ލެޓަރހެޑް ވެސް އެހެން ލިޔުންތަކާ ތަފާތުކަން ރާއްޖެއެމްވީއަށް މައުލޫމާތުދިން ފަރާތުން ވިދާޅުވިއެވެ.

އެކަމާ ގުޅޭގޮތުން އަބްދުﷲ ރަޝީދު ވިދާޅުވީ، ފޯރޖް ކޮށްފައިވާކަމުގެ ތުހުމަތު ކުރެވޭ ޑޮކިއުމަންޓަކީ އޭސީސީގެ ގަވާއިދުގެ 44 ވަނަ މާއްދާގެ (ށ) ގައި މުވައްޒަފުންނަށް އަނގަބަހުންނާއި، ލިއުމުން އިންޒާރުދެވޭނެކަމާއި އަދި އެކަންކަމުގެ ރެކޯޑް ލިޔެކިއުމުން ބަލަހައްޓަން ވާނެކަމަށް ބަޔާންކޮށްފައިވާއިރު، އަނގަބަހުން ނަސޭހަތްދީ އެ ނަޞޭހަތް ދިން ފަރާތުން އެކަމުގެ ރެކޯޑު ބެލެހެއްޓުމަށް ރެކޯޑުކޮށްފައިވާ ލިއުމެއްކަމަށެވެ. އަދި އެފަދަ ލިއުންތައް ކޮމިޝަނުން ދޫކުރަނީ ވަކި ލެޓަރހެޑެއްގައިކަމަށާއި، އެއީ ކޮމިޝަނުގެ ރެކޯޑަށް ކުރާ ކަމެއްކަން އޭނާ ފާހަގަ ކުރެއްވިއެވެ.

އަބްދުﷲ ރަޝީދު ވިދާޅުވީ، އޭސީސީގެ ސެކްރެޓަރީ ޖެނެރަލްއަކީ އޭސީސީގެ ޤާނޫނުގެ 29 ވަނަ މާއްދާގައި ބުނާގޮތުން ކޮމިޝަން އިދާރީގޮތުން ހިންގާ ފަރާތްކަމަށް ވުމާއެކު، ޤާނޫނީގޮތުން އޭނާއަށް ލިބިފައިވާ ބާރުގެ ދަށުން މަސައްކަތައް ފަރުވާކުޑަކުރާ މުވައްޒަފަށް އަނގަބަހުން ނަޞޭހަތްދީ އެކަން ލިއުމުން ރެކޯޑުކުރުމަކީ ލިއުމެއް ފޯރޖުކުރުން ކަމަށްވާނެ ޤާނޫނީ ހަމައެއް ނެތް ކަމަށެވެ.

އަބްދުﷲ ރަޝީދު އިތުރަށް ވިދާޅުވީ، އޭސީސީގެ މުވައްޒަފަކަށް ނަޞޭހަތެއް ދިނަސް އިންޒާރެއްދިނަސް އެކަން ކުރާނީ ކޮމިޝަންގެ މެންބަރުންގެ ބައްދަލުވުމަކުން ނިންމައިގެން ކަމަށެވެ. އެއީ 2014 ވަނައަހަރުގެ ޖުލައި މަހުގެ 07 އިން އޮކްޓޯބަރ 2019 އަށް އެކަން ކޮށްފައިވާނެ ގޮތްކަން ފާހަގަ ކުރައްވައި އޭނާ ވިދާޅުވީ، މުވައްޒަފަށް ނަޞޭހަތްދީފައިވާނަމަ އެކަން ކޮށްފައިވާނީވެސް ކޮމިޝަންގެ އިދާރީ ބައްދަލުވުމަކުން އެ ފިޔަވަޅު އަޅަން ނިންމައިގެން ކަމަށާއި، އެ ކަމުގެ ރެކޯޑުތައް ކޮމިޝަންގައި ހުންނާނެ ކަމަށެވެ.

މުވައްޒަފު ވަޒީފާއިން ވަކިކުރި މައްސަލައިގައި ވަޒީފާއާބެހޭ ޓަރައިބިއުނަލްއަށް ހުށަހެޅި ހިނގަމުންދާ މައްސަލައިގައި އޭސީސީގެ ފަރާތުން ވަކާލާތު ކުރުމަށް ޢަބްދުﷲ ރަޝީދު ވަޑައިގަތުމުން އެ މައްސަލައިގައި ޢަބްދުﷲ ރަޝީދަށް އޭސީސީ ތަމްސީލް ނުކުރެވޭނެ ކަމަށް 17 އޮކްޓޯބަރ 2019 ގައި ވަޒީފާއާބެހޭ ޓްރައިބިއުނަލުން ވަނީ ނިންމާފައެވެ.

އެކަމާ ގުޅޭގޮތުން އޭނާ ވިދާޅުވީ، 2014 ޖުލައި މަހުން ފެށިގެން 2019 ޑިސެމްބަރ މަހާއި ހަމައަށް އޭސީސީގެ އެއްވެސް މުވައްޒަފެއް ޤާނޫނާ ޚިލާފަށް ވަޒީފާއިން ވަކި ކޮށްފައިވާކަމަށް ކަނޑައަޅާފައި ނުވާ ކަމަށެވެ. އަދި ކޮމިޝަންގެ ސެކްރެޓަރީ ޖެނެރަލްއަކީ ޤާނޫނީ ވަކީލެއް ކަމަށް ވުމާއެކު، ކޮމިޝަންގެ ފަރާތުން ކޯޓުތަކާއި ޓްރައިބިއުނަލްތަކުގައި ވަކީލެއްގެ ޙައިސިއްޔަތުން ކޮމިޝަންގެ ސެކްރެޓަރީ ޖެނެރަލް އެތަންތަނަށް ފޮނުވުމަށް ނިންމަނީ ކޮމިޝަނުން ފާސްކުރާ ޤަރާރަކުން ކަމަށް އޭނާ ވިދާޅުވިއެވެ.

ވަޒީފާއާބެހޭ ގިނަ މައްސަލަތަކުގައި ކޮމިޝަން ތަމްސީލު ކުރަނީވެސް ކޮމިޝަންގެ ސެކްރެޓަރީ ޖެނެރަލް ކަމަށާއި، ކޮމިޝަނުން އެގޮތަށް ނިންމަނީ ކޮމިޝަންގެ މުވައްޒަފުންގެ ކަންކަމުގައި މުވައްޒަފުންގެ ކްލާސްމޭޓުން ނުވަތަ އެކުގައި މަސައްކަތްކުރާ މުވައްޒަފުން ކޯޓާއި ޓްރައިބިއުނަލްއަށް ހާޒިރުވުމަށް އުޒުރުވެރިވެ ތަނާޒުލުވާތީކަމަށް އޭނާ ވިދާޅުވިއެވެ.

ރަޝީދު ވިދާޅުވީ، މި މައްސަލައިގައި އޭނާއަށް ވަކާލާތު ނުކުރެވޭނެކަމަށް ޓްރައިބިއުނަލްއިން ނިންމީ މައްސަލައިގައި ހެއްކެއްގެ ގޮތުގައި ހާޒިރުވާންޖެހޭ ފަރާތެއް ވަކީލެއްގެ ގޮތުގައި ހާޒިރު ނުވެވޭނެކަމަށް ބަޔާންކުރާ ޤާނޫނީ އުސޫލުގެ ދަށުން ކަމަށެވެ. އަބްދުﷲ ރަޝީދު ވަނީ އޭސީސީގައި ފަސް އަހަރަށްވުރެ ދިގު މުއްދަތެއް ހޭދަ ކުރައްވާފައެވެ.