ޕީޕީއެމްގެ ރައީސްކަމުގެ މަޤާމުން ކުރީގެ ރައީސް މައުމޫން އަބްދުލްގައްޔޫމް ވަކި ކުރުމުގެ މަސައްކަތް ފަށާނެ ކަމަށް ޕީޕީއެމްގެ މުސްތަޝާރު، ރައީސް އަބްދުﷲ ޔާމީން ފެކްޝަނުން ބުނެފި އެވެ.
ޕީޕީއެމް އަދި އެމްޑީއޭ ގުޅީގެން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަަވަމުން، އިނގުރައިދޫ ދައިރާގެ މެންބަރު އިބްރާހިމް ފަހާލު ވިދާޅުވީ، ރައީސް މައުމޫނަށް ޕީޕީއެމްގެ ރައީސް ކަމުގެ މަގާމުގައި ހުންނެވުނީ، ރައީސް ޔާމީން އެމަނިކުފާނަށް ކުރައްވާ ތާއީދެއްގެ ބޮޑުކަމުން ކަަމަށެވެ. އަދި ޕީޖީން ބޭނުންވާ ނަމަ މިހާރު އެމަނިކުފާނު އެމަގާމުގައި ނުހުންނަވާނެ ކަމަށް އޭނާ ވިދާޅުވި އެވެ.
މަޖިލީހުގެ ރައީސް ކަމުގެ އިތުބާރު ނެތް ކަމަށް ނަގާ ވޯޓާ ގުޅޭ ގޮތުން ފަލާހު ވިދާޅުވީ، އިދިކޮޅު ފަރާތްތަކަށް ކާމިޔާބު ކުރެވޭނީ 12 ވޯޓު ކަމަށާއި 13 ވޯޓު ވެސް ކާމިޔާބު ކުރަން ނުކުރެވޭނެ ކަމަށެވެ.
ފަހާލު ވަނީ މާމިގިލި ދައިރާގެ މެންބަރު ގާސިމް އިބްރާހީމް ސިޔާސީ މައިދާނުގައި ނިންމަވާ ނިންމުންތަކަށް ވަރަށް ބޮޑަށް ފާޑުވިދާޅުވެފަ އެވެ.
" ގާސިމްއަކީ އަމިއްލަ އެދުމަށް މަސައްކަތް ކުރާ މީހެއް. އެމަނިކުފާނުގެ ގޮތް ޕީޕީއެމް އަށް ވަރަށް ރަގަޅަށް އިނގޭ. މާދަމާ ވެސް އޭނާ ލަންބާލެވޭނެ،" ފަލާހު ވިދާޅުވި އެވެ.
ގާސިމް އާއި ދިއްގަރު ދާއިރާގެ މެންބަރު ފާރިސް މައުމޫން ދެކެ އެ ދާއިރާތަކުގެ މެންބަރުން ވަރަށް ރުޅިގަދަވެފައިވާ ކަމަށާއި މިހާރު އޮތީ އެ ދާއިރާތަކަށް ނޭރޭ ގޮތަށް ކަމަށެވެ.
މި ނޫސްވެރިންގެ ބައްދަލުވުމުގައި، ގިނަ މެންބަރުންތަކެއް ވަނީ، މަޖީލީހުގެ ރައީސް މަޤާމު ހިފެހެއްޓުމަށް ދޭ ވޯޓު ކާމިޔާބު ކުރުމުގައި އިދިކޮޅު ފަރާތްތަކުގެ މަޖިލީސް މެންބަރުންގެ ވޯޓުވެސް ލިބޭނެ ކަމަށް ވިދާޅުވެފަ އެވެ. މި ޕްރެސްގައި ޕީޕީއެމް އަދި އެމްޑީއޭ އަށް ނިސްބަތްވާ 41 މެންބަރުން ވަނީ ބައިވެރިފަ އެވެ.
