ހިތާއި ސިކުނޑިއަށް ލިބޭ ވޭނަކީ ފުން ޒަހަމަކަށް ވުރެ ބޮޑު ވޭނެއް: ނައިބް ރައީސް
11 އޮކްޓޯބަރު 2020 | އާދީއްތަ 04:01ކޮވިޑުގެ ސަބަބުން ނަފްސާނީ ހިތްދަތި ކަމުގެ މައްޗަށް އަލިއަޅުއްވައިލެއްވި
ނައިބް ރައީސް ފައިސަލް ނަސީމް
ހިތާއި ސިކުނޑިއަށް ލިބޭ ވޭނަކީ ހަށިގަނޑަށް ލިބޭ ފުން ޒަހަމަކަށް ވުރެ ތަހައްމަލު ކުރަން އުދަނގޫ ބޮޑު ވޭނެއް ކަމަށް ނައިބް ރައީސް ފައިސަލް ނަސީމް ވިދާޅުވެއްޖެއެވެ.
ނައިބް ރައީސް މިހެން ވިދާޅުވީ، ހޮނިހިރު ދުވަހު ފާހަގަކުރި ދުނިޔޭގެ ނަފްސާނީ ދުޅަހެޔޮ ކަމުގެ ދުވަހުގެ މުނާސަބަތުގައި ހެލްތް އިމަރޖެންސީ އޮޕަރޭޝަން ސެންޓަރު (އެޗްއީއޯސީ) ގައި ބޭއްވެވި ބައްދަލުވުމެއްގައެވެ.
އެ ބައްދަލުވުމުގައި ނައިބް ރައީސް ވިދާޅުވީ، ނަފްސާނީ ގޮތުން ނުލިބޭ ވަރުގެ ހިތް ދަތިކަން ކޮވިޑް-19 ގެ ސަބަބުން މުޅި ދުނިޔެ އަދި ރާއްޖޭގެ ރައްޔިތުންނަށްވެސް ލިބެމުންދާ ކަމަށާއި، ވަޒީފާތައް ގެއްލި ސްކޫލްތައް ބަންދުވެ ދަރިވަރުންގެ ކިޔެވުމުގެ ފުރުސަތު ހަނިވެ، ވިޔަފާރިތައް ހީނަރުވުމުގެ އިތުރުން ރިސޯޓްތައް ބަންދުކުރަން ޖެހުމުން އިޖްތިމާއީ ގުޅުމާއި އާއިލީ ގުޅުންތަކަށް ބުރޫ އަރައިގެން ދިޔުމަކީ ކެތްކުރަން ދަތިކަމެއްގެ ގޮތުގައި ކަމަށެވެ.
އައިޖީއެމްއެޗްގައި ސެންޓަރ ފޯ މެންޓަލް ހެލްތުގެ ނަމުގައި ސެންޓަރެއް ގާއިމުކޮށް ނަފްސާނީ ދާއިރާ ކުރިއަރުވައި، ގިނަބަޔަކަށް ފަރުވާދެމުން ކަން ފާހަގަކޮށް ނައިބު ރައީސް ވިދާޅުވީ، ސަރުކާރުގެ އަމާޒަކީ ނަފްސާނީ ގޮތުން ދުޅަހެޔޮ މުޖްތަމައެއް ގާއިމް ކުރުން ކަމަށެވެ.
އެކަކު އަނެކަކަށް އަޅާލައި އޯގާތެރިވުމުގެ މުހިންމުކަމުގެ މައްޗަށް އަލިއަޅުއްވާލައްވައި ވާހަކަ ދައްކަވަމުން ނައިބް ރައީސް ވިދާޅުވީ، އުމުރުން ދުވަސްވީ މީހުންގެ ހަޔާތުގައި އެންމެ ބޮޑަށް އަޅާލުމާއި އެހިތެރިކަން ބޭނުންވާ ވަގުތަކީ، މިފަދަ ދަނޑިވަޅުތަކުގައި ކަމަށެވެ. އަދި ކުޑަކުދިންނަށް އޯގާތެރިވެ އާއިލާގެ ލޯބި ހޯދައި ދިނުމާއި، އަންހެން ބޭފުޅުންނަށް ގަދަރުކޮށް އިހްތިރާމް ކުރާބަޔަކަށް ވުމަށް ނައިބް ރައީސް ގޮވައިލެއްވިއެވެ. ރާއްޖެއަކީ ކުޑަ ގައުމަކަށް ނިސްބަތްވާ މުސްލިމް އެކުވެރި ބަޔަކަށް ވީ ހިނދު އެކުގައި މަސައްކަތް ކުރުމުގެ މުހިންމުކަންވެސް ނައިބް ރައީސް ފާހަގަކުރެއްވިއެވެ.
