އައްޑޫ ފްލައިންގ ސްކޫލާއި ގުޅިގެން ދަރިވަރުންގެ މައްސަލަ ދަނީ ހައްލުކުރަމުން: މިނިސްޓަރ
11 އޮކްޓޯބަރު 2020 | އާދީއްތަ 04:14މައްސަލަ ހައްލުކުރުމުގެ ގޮތުން ސިވިލް އޭވިއޭޝަން އޮތޯރިޓީގައި ވަނީ އެދިފައި
އައްޑޫ ފްލައިންގ ސްކޫލް؛ އައްޑޫ ފްލައިންގ ސްކޫލް ދަރިވަރުންގެ ކަންބޮޑުވުންތަކާއިއެކު ހަޅުތާލަކަށް ދިއުމަން ވަނީ ނިންމާފައި
އައްޑޫ ފްލައިންގ ސްކޫލާއި ގުޅިގެން އެތަނުގައި ތަމްރީނު ހޯދަމުންދާ ދަރިވަރުންގެ ކަންބޮޑުވުންތަކަށް އެކި ގޮތްގޮތުން ހައްލު ހޯދައިދެވޭތޯ ކެނޑިނޭޅި މަސައްކަތްކުރަމުންދާ ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.
ހަޔަރ އެޑިއުކޭޝަން މިނިސްޓަރ މިހެން ވިދާޅުވީ އޭޝިއަން އެކަޑަމީ އެއިރޮނޯޓިކްސް (އައްޑޫ ފްލައިންގ ސްކޫލް) ދަރިވަރުންގެ ކަންބޮޑުވުންތަކާއިއެކު ހަޅުތާލުކުރުމަށް ނިންމާފައިވާތީ، އެކަމާއި ގުޅިގެން އައްޑު މީދޫ ދާއިރާގެ މެންބަރު ރޮޒައިނާ އާދަމް މިނިސްޓަރާއެކު ކުރެއްވި މަޝްވަރާގެ ތެރެއިންނެވެ.
މެންބަރު ރޮޒައިނާ ކުރެއްވި ޓްވީޓެއްގައި ވިދާޅުވީ އެ މައްސަލަ ހައްލުކުރުމުގެ މަސައްކަތް މިނިސްޓްރީން ކުރައްވަމުން ގެންދަވާ ކަމުގެ ފުރިހަމަ ޔަގީންކަން މިނިސްޓަރު ދެއްވާފައިވާ ކަމަށެވެ. ރޮޒައިނާ ވަނީ މިނިސްޓަރު މިކަމާއި ގުޅިގެން ފޮނުއްވި މެސެޖްވެސް ޓްވިޓަރގައި ހިއްސާ ކުރައްވާފައެވެ.
މެސެޖުގައި މިނިސްޓަރ ވިދާޅުވީ މައްސަލަ ހައްލުކުރުމުގެ ގޮތުން ސިވިލް އޭވިއޭޝަން އޮތޯރިޓީގައި އެކަން ބައްލަވައިދެއްވުމަށް އެދިފައިވާނެ ކަމަށާއި، ރާއްޖޭގައި ކިޔެވުމަށް ދޫކުރާ ލޯނުގައި އެ ސްކޫލްގައި ކިޔަވަމުންދިޔަ ދަރިވަރުން ރާއްޖޭއިން ބޭރުގައި ކިޔެވުމަށް ހުއްދަ ދީފައި ވާނެ ކަމަށެވެ. އަދި ދަރިވަރުންގެ ކަންބޮޑުވުންތައް ސްކޫލާއި އެކި ފަހަރުމަތީން ހިއްސާކޮށް، ހައްލު ހޯދައިދިނުމަށް އެދިފައިވާނެ ކަމަށް ވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އެއްމެ ފަހުން މިނިސްޓްރީން ސްކޫލާއި ބައްދަލުކުރީ 27 އޮގަސްޓްގައި ކަމަށާއި، އެ ދުވަހުގެ ބައްދަލުވުމުގައި އެފަރާތުން ދެއްވި ޖަވާބަކީ ކުރީ ސަރުކާރުގެ އެދުމުގެ މަތިން ޖާގައަށްވުރެ ގިނަ ދަރިވަރުން ނަގާފައިވުން ކަމަށެވެ. އެހެންނަމަވެސް، އެއްވެސް ދަރިވަރަކަށް ކޯސް ފުރިހަމަކުރުމަށް ދައްޗެއް ދިމާނުވާނެކަމަށެވެ.
މިނިސްޓަރ ވިދާޅުވީ މިނިސްޓްރީއަށް ލިބޭ ޝަކުވާއިން މިއީ ތެދު މައުލޫމާތުކަމާއިމެދު ޝައްކު އުފެދޭތީ، މިކަމާއި ގުޅުންހުރި ލިޔެކިޔުން ހުށަހެޅުމަށް އެފަރާތުގައި އެދިފައިވާނެ ކަމަށެވެ. ނަމަވެސް، މިކަމަށް އެއްވެސް ޖަވާބެއް ލިބިފައިނެތުމުން ނިމިދިޔަ ހަފްތާގައިވެސް އެފަރާތާއި މުއާމަލާތުކޮށް މައުލޫމާތު ހުށަހެޅުމަށް ފުރުސަތުދެވުނު އިރު، މިއަދާއި ހަމައަށްވެސް ފުރިހަމަ ލިޔެކިޔުން ހުށަހަޅާފައިނުވާތީ، މިމައްސަލަ ބެލުމުގައި ދަތިތަކެއް އެބަހުރި ކަމަށެވެ.
އެހެންނަމަވެސް، މިކަމާއި ގުޅިގެން ކުރަންޖެހޭ މަސައްކަތްތައް ކުރުމަށް ކަމާގުޅުންހުރި އިދާރާތަކާއިއެކު މަސައްކަތްކުރަމުން އަދި މިކަމަށް އަވަސް ހައްލެއް ހޯދައިދޭނެކަމުގެ ޔަގީންކަން މިނިސްޓަރު ވަނީ ދެއްވާފައެވެ.
އައްޑޫ ފްލައިންގ ސްކޫލުގެ ދަރިވަރުން އެ ސްކޫލަށް ފޮނުވާފައިވާ ސިޓީގައި ދަރިވަރުންގެ ފަރާތުން ބޮޑެތި ކަންބޮޑުވުންތަކެއް ވަނީ ހިއްސާކޮށްފައެވެ. އެގޮތުން ކޯސް ނިންމުމަށް ތާވަލުކޮށްފައިވާ މުއްދަތުގައި ކޯސް މިފަހުގެ ތާރީހުގައި ނިންމި ދަރިވަރެއް ނެތް ކަމަށާއި، ގިނަ ދަރިވަރުންނަކީ މިހާރު އިމްތިހާނު ނިންމާފަވާ ދަރިވަރުން ކަމަށެވެ. ނަމަވެސް ނަތީޖާ ނުލިބި ގިނަ ދުވަސްތަކެއް ވަމުން އަންނަ ކަމަށް ދަރިވަރުން ވަނީ ފާހަގަކޮށްފައެވެ. އައްޑޫ ފްލައިންގ ސްކޫލްގެ ދަރިވަރުން ވަނީ އެ ދަރިވަރުންގެ ކަންބޮޑުވުންތައް ސިވިލް އޭޝިއަންއާވެސް ހިއްސާކޮށްފައެވެ.
ދަރިވަރުންގެ ޝަކުވާތަކުގައި ސްކޫލްގެ ކަންކަން މިވަގުތު ހުރި ގޮތުން ދަރިވަރުންނަށް ކުރިއެރުމެއް ލިބޭގޮތް ނުވާ ކަމަށާއި، އެގޮތުން މިހާރު ހެދިފައިވާ ޕެޓިޝަނުގައި 80 އަށްވުރެ ގިނަ ދަރިވަރުން ސޮއިކޮށްފައިވާއިރު 115 އަށްވުރެ ގިނަ ދަރިވަރުން މިކަމުގައި ހަރަކާތްތެރިވަމުން އަންނަ ކަމަށެވެ. އަދި މިކަމަށް ހައްލެއް ހޯދުމަށް ސިޓީގެ ޒަރިއްޔާއިން ސަރުކާރުގެ ކަމާއިބެހޭ ފަރާތްތަކުގެ ސަމާލުކަމަށް ގެނަސްފައިވާ ކަމަށެވެ.
