ދެ އަހަރުތެރޭގައި ރާއްޖެ އަށް ބޭނުންވާ މިންވަރަށް ދަނޑުވެރިކަމުގެ ބާވަތްތައް އުފެއްދޭނެ: އެގްރޯ މޯލްޑިވްސް
ދަނޑުވެރިކަމުގެ ސިނާޢަތް ކުރިއަރުވަން މި ސަރުކާރުން މަސައްކަތް ކުރަމުންދާކަން ފާހަގަކުރެއްވި
އއ. ތޮއްޑޫ ކަރާ ދަނޑުތައް
ކުރިއަށް އޮތް ދެއަހަރެއްހާ ދުވަސްތެރޭގައި ރާއްޖޭގެ ރައްޔިތުންނަށް ބޭނުންވާ މިންވަރަށް ދަނޑުވެރިކަމުން އުފެއްދޭނެ ކަަމަށް އެގްރޯ ނެޝެނަލް ކޯޕަރޭޝަންއިން ބުނެފިއެވެ.
ހޮނިހިރު ދުވަހުގެރޭ ރާއްޖެ ޓީވީގެ "ފަލަ ސުރުޚީ" ޕްރޮގްރާމުގައި ވާހަކަ ދައްކަވަމުން އެކުންފުނީގެ މެނޭޖިން ޑިރެކްޓަރ ހާރޫން ރަޝީދު ވިދާޅުވީ ފާއިތުވި ސަރުކާރުތަކުގައި ދަނޑުވެރިކަން އާލާކުރުމުގެ ކަންކަން ވަކި ނިޒާމެއްގެ ތެރެއިން ރޭވިފައިނުވާ ކަމަށެވެ.
ނަމަވެސް މި ސަރުކާރުން ދަނޑުވެރިކަމުގެ ސިނާއަތު ކުރިއެރުވުމުގައި މަގްސަދުގައި ކުންފުންޏެއް އުފައްދައި ދަނޑުވެރިކަމުގެ ސިނާއަތް ކުރިއެރުވުމަށް މަސައްކަތް ކުރަމުންދާ ކަމަށެވެ.
ރަނގަޅު ޕްލޭނެއްގެ ތެރެއިން ރާއްޖޭގެ ފުޑް ސެކިއުރިޓީ ބެލެހެއްޓުމުގެ މުހިއްމު ކަމުގެ މައްޗަށް ހާރޫން ވަނީ އަލިއަޅުއްވާލައްވާފައެވެ.
އެގޮތުން ދިވެހިންނަކީ އިމްޕޯޓަށް ވަރަށް ބޮޑަށް ބަރޯސާވެފައިވާ ބައެއްކަން ފާހަގަ ކުރައްވާ އޭނާ ވިދާޅުވީ ރާއްޖޭގައި ފުޑް ސެކިއުރިޓީ ޤާއިމް ކުރަންޖެހޭ ކަމަށާއި، ރާއްޖޭގެ އުފެއްދުންތައް ގިނަކުރަން ޖެހޭ ކަމަށެވެ.
ހާރޫން ވިދާޅުވީ މިހާރުއޮތް ޕްލޭނާއި އެއްގޮތަށް ކަންކަން ހިނގަމުންދާނަމަ އަންނަ އަހަރުގެ ޖެނުއަރީ މަހު ދަނޑުތަކުގެ އަމަލީ މަސައްކަތް ރާއްޖޭގެ ރަށްތަކުން ފެނިގެންދާނެ ކަމަށެވެ. އަދި ދަނޑުވެރިން ހައްދާ ތަކެތިން ބޮޑު މާކެޓެއް އުފައްދައި ދެއަހަރު ތެރޭގައި ރައްޔިތުންނަށް ވީހާވެސް ބޮޑަށް އޭގެ މަންފާ ލިބިގެންދާނެ ކަމަށެވެ.
