100 ކިލޯގެ މަސްތުވާތަކެތީގެ ބޮޑު އޮޕަރޭޝަން: ހައްޔަރުކުރި 14 މީހުންގެ ތެރެއިން 8 މީހަކު ދޫކޮށްލައިފި

މިދިއަ ހޮނިހިރު ދުވަހު، ފުލުހުން ހިންގި ހާއްސަ އޮޕަރޭޝަނުގައި 100 ކިލޯއެއްހާ މަސްތުވާތަކެތީގެ މައްސަލާގައި ފުލުހުން ހައްޔަރުކުރި 14 މީހުންގެ ތެރެއިން 8 މީހަކު ބަންދުން ދޫކޮށްލައިފިއެވެ.

ހުކުރު ދުވަހު ފުލުހުން މީޑިއާ އޮޕިޝަލް ރާއްޖެއެމްވީއަށް ވިދާޅުވީ، އައްޑޫ ސިޓީގައި ފުލުހުން ހިންގި މަސްތުވާތަކެތީގެ ހާއްސަ އޮޕަރޭޝަނާ ގުޅިގެން ހައްޔަރުކުރި މީހުންގެ ތެރެއިން ތަހުގީގަށް އިތުރަށް ބަންދުގައި ބައިތިއްބަން ނުފެންނާތީ، 8 މީހަކު ހުކުރު ދުވަހު ދޫކޮށްލާފައިވާ ކަމަށެވެ. ދޫކޮށްލި މީހުންގެ ތެރޭގައި މި މައްސަލާގައި ހައްޔަރުކުރި، ކުރީގެ މަޝްހޫރު ފުޓްބޯޅަ ކުޅުންތެރިޔާ ޝަމްވީލް ގާސިމް (ބޮންޑާ) ވެސް ހިމެނެއެވެ.

މި މަހުގެ 3 ވަނަ ދުވަހު ފުލުހުން ހިންގި ހާއްސަ އޮޕަރޭޝަނުގައި ހައްޔަރުކުރި 14 މީހުންގެ ތެރެއިން، ޝަރީއަތް ނިމެންދެން ބަންދުކުރީ މި މަސްތުވާތަކެތި އެތެރެކުރުމުގައި އިސްކޮށް އުޅުނު ކަމަށް ތުހުމަތުކުރެވޭ ސ. ހިތަދޫ ފިނިފަރު އަބްދުﷲ އިބްރާހިމް، (އަބުޗާ) 33، އާއި ސ. ހިތަދޫ ކޯޅި މުހައްމަދު ޔާމިން ނަސީރު، 23، އެވެ.

ދެން ތިބި މީހުންގެ ބަންދަށް ފަސް ދުވަސް ޖަހާފައިވާތީ، އެ މީހުންގެ ބަންދުގެ މުއްދަތު ހުކުރު ދުވަހަށް މިވަނީ ހަމަވެފައެވެ. އޭގެ ތެރެއިން، ފުލުހުންގެ ތަހުގީގަށް އިތުރަށް ބަންދުގައި ބައިތިއްބަން ބޭނުންނުވާތީ، 8 މީހަކު ދޫކޮށްލާފައިވަނީ ކޯޓަށް ހާޒިރު ކުރުމަކާ ނުލައެވެ. ފުލުހުންގެ މީޑިއާ އޮފިޝަލް ވިދާޅުވީ، ބާކީ ތިބި 4 މީހުންގެ ބަންދާމެދު ގޮތެއް ނިންމުގެ މަސައްކަތް ކުރަމުންދާ ކަމަށެވެ.

މި އޮޕަރޭޝަނުގައި ފުލުހުން ވަނީ 98.6 ކިލޯގެ މަސްތުވާތަކެތި އަތުލައިގަނެ، 14 މީހަކު ހައްޔަރުކޮށްފައެވެ. ފުލުހުން ހައްޔަރުކުރި މީހުންގެ ތެރޭގައި ހިމެނެނީ 23 އަހަރާއި 40 އަހަރާ ދެމެދުގެ ފިރިހެނުންނެވެ.