ފިޔަވަތިން ހުޅުމާލެ މެޑިކަލް ފެސިލިޓީއަށް ބަދަލު ކުރި ކުއްޖާގެ ހާލު ރަނގަޅު: ޖެންޑަރ މިނިސްޓްރީ
ޖުމްލަ 8 ކުދިން ވަނީ ވައިރަސްއަށް ޕޮޒިޓިވްވެފައި
ހުޅުމާލެ ފިޔަވަތި
ހުޅުމާލެ ފިޔަވަތިން ހުޅުމާލޭ މެޑިކަލް ފެސިލިޓީއަށް ބަދަލުކުރި ކުއްޖާގެ ހާލު ރަނގަޅު ކަމަށް ޖެންޑަރ މިނިސްޓްރީން ބުނެފިއެވެ.
ރާއްޖެއެމްވީއަށް މައުލޫމާތު ދެމުން ޖެންޑަރ މިނިސްޓްރީން ބުނީ މެޑިކަލް ފެސިލިޓީއަށް ބަދަލުކުރި ކުއްޖާގެ އިތުރުން ވައިރަސްއަށް ޕޮޒިޓިވްވި 7 ކުދިންގެ ހާލު ރަނގަޅު ކަމަށެވެ.
ފިޔަވަތިން ކުދިން ޕޮޒިޓިވްވެފައިވަނީ ސެޕްޓެމްބަރ 30 ގައި ފިޔަވަތީގައި މަސައްކަތް ކުރާ މުވައްޒަފެއް، ރޯގާގެ އަލާމާތްތައް ހުރުމާއި ގުޅިގެން ފްލޫ ކްލިނިކްއަށް ދައްކާ ޓެސްޓް ކުރުމުން ކޮވިޑް-19 އަށް ފޮޒިޓިވް ވުމުންނެވެ. އެފަރާތަކީ 10 އަހަރާއި 13 އަހަރުގެ ފިރިހެން ކުދިން ބަހައްޓާފައިވާ ފަންގިފިލާގައި މަސައްކަތް ކުރާ މުވައްޒަފެއް ކަމުން އެ ފަންގިފިލާގެ ކުދިން ވަނީ ކަރަންޓީން ކޮށްފައެވެ. އަދި އެ ކުދިން ވަނީ ހެލްތް ޕްރޮޓެކްޝަން އޭޖެންސީ އަދި ހެލްތް އިމަރޖެންސީ އޮޕަރޭޝަން ސެންޓަރގެ އިރުޝާދުގެ ދަށުން ފެސިލިޓީއަކަށް ބަދަލު ކޮށްފައެވެ.
ފިޔަވަތި އަކީ ގިނަ ކުދިން އެތަނެއްގައި ތިބޭ ޖާގައިގެ ދަތިކަން ހުރިތަނެއް ކަމުގައިވުމުން، އެޗްޕީއޭ އަދި އެޗްއީއޯސީއިން ވަނީ ކުދިންގެ ސިއްޚީ ރައްކާތެރިކަން ކަށަވަރު ކުރުމަށް އެ ސަރވިސްއަށް އިރުޝާދު ދީފައި ކަމަށް ޖެންޑަރ މިނިސްޓްރީން ބުންޏެވެ. އަދި މި އިރުޝާދުގެ ދަށުން މި ސަރވިސްއިން ވަނީ ކަމާއި ގުޅުން ހުރި އިދާރާތަކާއި މޮނިޓަރ ކުރުމުގެ ޒިންމާ އަދާކުރާ ފަރާތްތަކަށް އެންގުމަށްފަހު، ކަރަންޓީން ކުރެވުނު ފަންގިފިލާގައި ހިމެނޭ 26 ކުދިން ކެއަރވޯކަރުންނާއި އެކު އިތުރު ތަނަކަށް ބަދަލު ކުރުމަށް ނިންމާފައިވާ ކަމަށް އެ މިނިސްޓްރީން ބުންޏެވެ.
އެތަނަކީ 3 ފަންގިފިލާއަށް ހުރި 12 ކޮޓަރި ހިމެނޭ ތަނަކަށް ވެފައި، ކުދިންނަށް ބޭނުންވާ ރައްކާތެރިކަން ލިބޭނެކަން ޔަޤީންކޮށްދޭ ކަމަށާއި އަދި ކުދިންގެ ތަޢުލީމީ ކަންކަންވެސް އެތަނުގައި ކަށަވަރުކުރެވޭނެ ކަމަށް ޖެންޑަރ މިނިސްޓްރީން ބުނެއެވެ. އަދި ފިޔަވަތީގައި ތިބި ކުދިންގެ ބެލެނިވެރިންނަށް އެ ކުދިންގެ މަޢުލޫމާތު ދެމުން ގެންދާނެ ކަމަށްވެސް ޖެންޑަރ މިނިސްޓްރީން ބުންޏެވެ.
