ރާއްޖެއިން ކޮވިޑް ޖެހުނު 89 ޕަސެންޓު މީހުންގެ ބަލި ފަސޭހަވެއްޖެ
ބުދަ ދުވަހު 81 މީހަކު ބަލިން ރަނގަޅުވެފައިވޭ
އާރުއާރުޓީ އިން ކޮވިޑް-19 ސާމްޕަލް ނަގަނީ
ރާއްޖޭގައި ކޮވިޑް-19 ޖެހުނު މީހުންގެ ތެރެެއިން 89 ޕަސެންޓު މީހުންގެ ބަލި ފަސޭހަވެއްޖެއެވެ.
ހެލްތު މިނިސްޓްރީގެ ޑޭޝްބޯޑުން ދައްކާގޮތުގައި ރާއްޖޭގައި ކޮވިޑު ޖެހުނު 10,656 މީހުންގެ ތެރެއިން 9,547 މީހުން ވަނީ ބަލިން ފަސޭހަވެފައެވެ. ޑޭޝްބޯޑުން އިތުރަށް ފެންނަން ހުރި ތަފާސް ހިސާބުތަކަށް ބަލާލާއިރު މިހާތަނަށް ރާއްޖެއިން 10,600ށް ވުރެ ގިނަ މީހުން ކޮވިޑް-19 އަށް ޕޮޒިޓިވްވެފައިވާއިރު އޭގެތެރެއިން 6,770 މީހުންނަކީ ދިވެހިންނެވެ. އެއީ ރާއްޖެއިން ރިޕޯޓުކޮށްފައިވާ ކޭސްތަކުގެ 63.53 އިންސައްތައެވެ.
ބާކީ 36.47 އިންސައްތައަކީ ބިދޭސީންނެވެ. އެގޮތުން 2,866 ބަންގްލަދޭޝް ރައްޔިތުން ކޮވިޑަށް ޕޮޒިޓިވްވެފައިވާއިރު އެއީ ރާއްޖެއިން ރިޕޯޓުކޮށްފައިވާ ކޭސްތަކުގެ 26.90 އިންސައްތައެވެ. މިހާތަނަށް ރާއްޖެއިން އިންޑިއާގެ 651 މީހަކު ކޮވިޑަށް ޕޮޒިޓިވްވި ކަމަށް އެޗްޕީއޭގެ ތަފާސްހިސާބުތަކުން ދައްކާއިރު އެއީ 6.11 އިންސައްތަ މީހުންނެވެ. ރާއްޖެއިން މިހާތަނަށް ޕޮޒިޓިވްވި މީހުންގެ ތެރެއިން 7,400 މީހުންނަކީ ފިރިހެނުންނެވެ. އަދި 3,236 މީހުންނަކީ އަންހެނުންނެވެ.
މާލެ ސަރަހައްދުން ބަލި ފެންނަވަރު ކޮންމެވެސް ވަރަކަށް ކޮންޓްރޯލް ކުރެވުނު ނަމަވެސް، އަދިވެސް އެޗްޕީއޭއިން ބޭނުންވާ އަދަދަށް ކޭސްތަކުގެ އަދަދު ދަށަށް ގޮސްފައެއް ނުވެއެވެ. ހެލްތް މިނިސްޓްރީ ހިންގެވުމާ ހަވާލުވެ ހުންނެވި މުހައްމަދު އަސްލަމް ވިދާޅުވީ، މި އަދަދަށް ކޭސްތަކުގެ އަދަދު މަދުވާން ދޮޅު މަހެއްހާ ދުވަސް ނަގާނެ ކަމަށް ލަފާކުރެވޭ ކަމަށެވެ.
