މޫސުމަށް އަންނަ ބަދަލުތަކާ ދެކޮޅަށް މަސައްކަތްކުރެވޭނީ ދެމެހެއްޓެނިވި ގޮތެއްގައި ފައިސާ ލިބިގެން: ޝާހިދު
މޫސުމާ ގުޅިގެން އެންމެ ބޮޑަށް އަސަރުކުރާނެ ކުދި ޤައުމުތަކަށް ލިބޭ އެހީ މަދު
ފޮރިން މިނިސްޓަރ އަބްދުﷲ ޝާހިދު
މޫސުމަށް އަންނަބަދަލުތަކާއި ދެކޮޅަށް މަސައްކަތްކުރެވޭނީ، އެކަށީގެންވާ ދެމެހެއްޓެނިވި ގޮތެއްގައި އެކަމަށް ބޭނުންވާ ފައިސާ ހުރިހާ ޤައުމަކުންވެސް ލިބިގެންކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
އދ. ގެ އާއްމު މަޖިލީހުގެ ހަވާސާގައި ވަރޗުއަލްކޮށް ކުރިއަށްދިޔަ ކްލައިމެޓް ވަލްނަރަބަލް ފޯރަމްގެ ލީޑަރސް އިވެންޓްގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙްގެ ފަރާތްޕުޅުން މި އިވެންޓްގައި ބައިވެރިވެވަޑައިގެން މިނިސްޓަރ ޝާހިދު ވަނީ ބައްދަލުވުމުގެ ބައިވެރިންނާ މުހާތަބު ކުރައްވާ ވާހަކަ ދައްކަވާފައެވެ.
މިނިސްޓަރ ވަނީ މޫސުމަށް އަންނަ ބަދަލުތައް ވަކި އިމެއްގެ ތެރޭގައި ހިފެހެއްޓުމަށްޓަކައި ކޮންމެ ޤައުމަކަންވެސް ޤައުމީ ފެންވަރެއްގައި ކަނޑައަޅާ މިންވަރު އިތުރަށް ހަރުދަނާކޮށް، ޖައްވު ހޫނުވުމަށް މަގިފަހިކުރުވާ ގޭސްތައް މަދުކޮށް ދުނިޔެ ހޫނުވުން 1.5 ޑިގްރީޒްއަށް ވުރެ މަތިނުވާނެހެން ހިފަހައްޓަވަން ޖެހޭކަމުގައި ވިދާޅުވެފައެވެ.
އޭގެ އިތުރުން، ކްލައިމެޓް ވަލްނަރަބްލް ފޯރަމްގެ (ސީ.ވީ.އެފް.) މެމްބަރުންގެ މި މައްސަލައަށް ދޭ އަހައްމިއްޔަތުގެ ސަބަބުން މި ޤައުމުތައް، ބައިނަލްއަޤްވާމީ މަސްރަޙުގައި ވަކިން ޚާއްޞަގޮތެއްގައި ފާހަގަކޮށްލެވޭކަމަށާއި އަންނަ އަހަރު ގްލާސްގޯގައި ބޭއްވުމަށް ހަމަޖެހިފައިވާ ކޮޕް 26 ޖެހެންދެން މިހާރު މި އޮތް ބާރުމިނުގައި ކުރިއަށް ގެންދިޔުމަށް މިނިސްޓަރ ގޮވާލެއްވިއެވެ. އަދި، މިހާރަށްވުރެ ވަރުގަދަ އަޒުމެއްގައި މޫސުމަށް އަންނަބަދަލުތަކާއި ދެކޮޅަށް މަސައްކަތްކުރެވޭނީ، އެކަށީގެންވާ ދެމެހެއްޓެނިވި ގޮތެއްގައި އެކަމަށް ބޭނުންވާ ފައިސާ ހުރިހާ ޤައުމަކުން ވެސް ލިބިގެން ކަން ފާހަގަކުރައްވައި މިނިސްޓަރ ވަނީ މޫސުމާ ގުޅިގެން އެންމެ ބޮޑަށް އަސަރުކުރާނެ ކުދި ޤައުމުތަކަށް މި ފައިސާއިން ލިބޭ އެހީ މަދުމަކަން ފާހަގަކުރައްވާފައެވެ.
މި އިވެންޓްގެ ރިޔާސަތު ބެލެހެއްޓެވީ ބަންގްލަދޭޝްގެ ބޮޑުވަޒީރު ޝެއިޚް ޙަސީނާއެވެ. އިވެންޓް އިންތިޒާމްކުރީ ސީ.ވީ.އެފްގެ ސެކްރެޓޭރިއެޓް ގްލޯބަލް ސެންޓަރ އޮން އެޑެޕްޓޭޝަން އިންނެވެ.
މިނިސްޓަރ ޝާހިދުގެ ވާހަކަފުޅުގައި، ސީ.ވީ.އެފްގެ ރިޔާސަތާއި ބަންގްލަދޭޝްގެ ބޮޑުވަޒީރު ޝައިޚް ޙަސީނާ ހަވާލުވެވަޑައިގަތުމާ ގުޅިގެން އެކަމަނާއަށް މަރުޙަބާ ވިދާޅުވެ، މޫސުމީ ބަދަލުތަކުގެ ކަންތައްތަކުގައި ބަންގްލަދޭޝްއިން އަދާކުރާ ދައުރު ފާހަގަކުރެއްވާފައިވެއެވެ. އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ސީ.ވީ.އެފް ގެ ތީމެޓިކް އެމްބެސެޑަރަކަށް ވެވަޑައިގަތުމާ ގުޅިގެން މަރުޙަބާ ވިދާޅުވެ، މޫސުމީ ބަދަލުތަކާ ގުޅޭ ގޮތުން ރައީސް ނަޝީދު އަދާކުރައްވާ އިސް ދައުރުގެ ސަބަބުން ސީ.ވީ.އެފް ގެ މަސައްކަތަށް އިތުރު ފުރިހަމަކަމެއް ލިބި، މޫސުމީ ބަދަލުތަކާ ދެކޮޅަށް އިތުރު މަސައްކަތް ކުރެވިގެންދާނެކަމަށް މިނިސްޓަރ ޝާހިދު ވިދާޅުވިއެވެ.
ވާހަކަފުޅު ނިންނަމަވާލައްވަމުން ސީ.ވީ.އެފް އިން އަދާ ކުރާ ދައުރު އިތުރަށް ފުޅާވާނެ ކަމަށާއި އަންނަން އޮތް ޖީލުތަކަށް ދިރިއުޅެވޭނެ ރައްކާތެރި ދުނިޔެއެއް ފޯރުކޮށްދިނުމަށް މި ފޯރަމުން މުހިންމު ދައުރެއް އަދާކުރާނެކަމަށާއި މިކަމަކީ، ފެހި، ނޫ އަދި ސާފު އިޤްތިޞާދަކާއި ދިމާލަށް އެޅޭ ފިޔަވަޅެއް ކަމުގައި ވެސް މިނިސްޓަރ ވިދާޅުވިއެވެ.
މި ފަހަރުގެ ސީ.ވީ.އެފް ލީޑަރސް އިވެންޓުގައި ޤައުމުތަކުގެ އިސްވެރިންނާއި، ވަޒީރުންގެ އިތުރުން، ކުރީގެ ރައީސް ނަޝީދު ހިމެނިވަޑައިގަންނަވާ މި ފޯރަމްގެ ސަފީރުންގެ ގޮތުގައި ހިމެނޭ ބޭބޭފުޅުންގެ ވީޑިއޯ ތަޤްރީރުތަކާއި ބިނާކުރުވަނިވި ފާޑުކިޔުންތައް ފާހަގަކުރެވުނެވެ.
ކްލައިމެޓް ވަލްނަރަބްލް ފޯރަމް އުފެދިގެންއައީ ދިވެހިރާއްޖޭގެ އިސްނެގުމުގެ މަތިން 2009 ވަނަ އަހަރު ޑެންމާކްގެ ކޯޕެންހޭގަންގައި ބޭއްވުނު އ.ދ. ގެ މޫސުމީ ބަދަލުތަކާ ބެހޭ މަހާސިންތާގެ (ކޮޕް 15) ތެރެއިންނެވެ. މޫސުމީ ބަދަލުތަކުގެ ސަބަބުން އެންމެ ނާޒުކު ފައްތަރެއްގައި އޮތް 48 ޤައުމުގެ އަޑު އުފުލައި ބައިނަލްއަޤްވާމީ ދުނިޔޭގައި ގުގުމާލަދޭ ތަފާތު ފޯރަމެއްގެ ގޮތުގައި ސީ.ވީ.އެފް. ފާހަގަކުރެވެއެވެ.
