ރާއްޖެ ބައިނަލްއަގްވާމީ މުޖުތަމައު އާއި އެކަހެރިކުރުމަށް ކެމްޕެއިނެއް ހިންގާ: ރައީސް ނަޝީދު
ރާއްޖެ ބައިނަލްއަގްވާމީ މުޖުތަމަޢުއާއި އެކަހެރި ކުރުމަށް ކުރަމުންދާ މަސައްކަތަކީ އެމަސައްކަތްކުރާ ފަރާތްތަކުގެ ފުރަތަމަ މަރުހަލާ
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ދިވެހިރާއްޖޭގައި ދީނީ ގޮތުން ހައްދު ފަހަނައަޅާފައި ތިބޭބަޔަކު ކެމްޕެއިނެއް ހިންގަމުން އަންނަކަމަށާއި, އޭގެ ބޭނުމަކީ ދިވެހިރާއްޖެ ބައިނަލްއަގްވާމީ ދުނިޔެއާއި އެކަހެރިކުރުން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާއަށް ނައިފަރު ދާއިރާގެ ޕީޕީއެމް މެމްބަރ އަޙްމަދު ޝިޔާމް ވަނީ އިންޑިޔާއާއެކު ވެފައިވާ އެއްބަސްވުންތަކާއި ގުޅިގެން ކުއްލި މައްސަލައެއް ހުށަހަޅުއްވާފައެވެ.
އެ މައްސަލަ ބަލައިނުގެންނެވި ސަބަބު ސާފުކޮށްދެއްވަމުން ރައީސް ނަޝީދު ވިދާޅުވީ ރާއްޖެއާއި އިންޑިޔާގެ ގުޅުން ބޭއްވުމަކީ ރައްޔިތުން އެދޭ ކަމެއްކަމަށާއި އެކަމާމެދު ކުޑަވެސް ޝައްކެއް ނުކުރައްވާ ކަމަށެވެ. އެހެންނަމަވެސް ރާއްޖެ ބައިނަލްއަގްވާމީ މުޖުތަމަޢުއާއި އެކަހެރި ކުރުމަށް ކުރަމުންދާ މަސައްކަތަކީ އެ މަސައްކަތްކުރާ ފަރާތްތަކުގެ ފުރަތަމަ މަރުހަލާކަމަށް ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އިންޑިޔާ ކަނޑުގެ ސަލާމަތާއި ރައްކާތެރިކަމަށް ގައުމުތަކާއި ދޭދޭ ގައުމުތަކާއެކު ގުޅުން ބޭއްވުމަކީ މުހިންމު ކަމެއް ކަމަށެވެ. މީގެ ކުރިން ރައީސް ނަޝީދު ކުރެއްވި ޓްވީޓެއްގައިވެސް ވަނީ "އިންޑިއާ އައުޓް" އޭ ކިޔާ ގޮވަނީ ރާއްޖޭގައި ހަރަކާތްތެރިވާ ދީނީ ހަރުކަށި ފިކުރުތަކަށް ތާއިދު ކުރާ އައިސިސް ނުވަތަ އިސްލާމިކް ސްޓޭޓް ޖަމާޢަތުގެ ސެލްތަކުން ކަމަށް ވިދާޅުވެފައެވެ. އަދި އެކަން ވަރަށް ގިނަ ބައިނަލްއަޤްވާމީ އިދާރާތަކަށް ސާފުވެފައިވާ ކަމަށްވެސް ނަޝީދު ވިދާޅުވެފައިވެއެވެ.
މި މައްސަލައާ ގުޅުވައި ޕީޕީއެމް ޕީއެންސީއަށް ނިސްބަތްކޮށް ރައީސް ނަޝީދު ވިދާޅުވިީ މި ޝިޔާރު ބޭނުން ކުރަން އެދެނީނަމަ އެ ބާރުދެވެނީ އައިސިސްއިން މި ރާއްޖެ ހިފުމަށް ކަމަށެވެ. އިދިކޮޅު ފަރާތްތަކުން އަންނަނީ މި ސަރުކާރުން އިންޑިޔާގެ އެހީގައި ގިނަ ކަންތައްތަކެއް ކުރަމުން އަންނާތީ އެކަމަށް ވަރަށް ބޮޑަށް ފާޑުކިޔަމުންނެވެ. އަދި އިދިކޮޅު ފަރާތްތަކުން އިސްވެ އޮވެ ސޯޝަލް މީޑިޔާގައި ވަނީ "އިންޑިޔާ އައުޓް" ހޭޝްޓެގް ބޭނުންކޮށްގެން ކެމްޕެއިނެއްވެސް ކޮށްފައެވެ.
