ދެ އަހަރުގެ ލޯނު އެއްބަސްވުމެއްގެ ދަށުން ފިއޮރެންޓީނާއަށް ކުޅެމުން އައި އިޓަލީގެ ފޯވާޑް ފެޑެރިކޯ ކިއެސާ އިޓަލީގެ ޗެމްޕިއަން ޔުވެންޓަސްއަށް ސޮއިކޮށްފިއެވެ.

އުމުރުން 22 އަހަރުގެ ފޯވާޑް ޔުވެންޓަސްއަށް ލޯނު އުސޫލުން ބަދަލުވިއިރު، ޔުވެންޓަސްއިން މި ސީޒަނުގައި ފިއޮރެންޓީނާއަށް ތިން މިލިޔަން ޔޫރޯ ދައްކާނެއެވެ. އަދި އަންނަ ސީޒަނުގައި ހަތް މިލިޔަން ޔޫރޯ ދައްކަން ޖެހޭއިރު، ލޯނު އެއްބަސްވުމުގެ ޖުމްލަ 10 މިލިޔަން ޔޫރޯއަށް އަރައެވެ.

ރިޕޯޓުތައް ބުނާ ގޮތުން ދެ އަހަރު ފަހުން ލޯނު އެއްބަސްވުން ހަމަވުމާއެކު 40 މިލިޔަން ޔޫރޯއަށް ކިއެސާ ގަތުމުގެ ފުރުސަތު ޔުވެންޓަސްއަށް އެބައޮތެވެ. އަދި ބޯނަހުގެ ގޮތުގައި އިތުރު 10 މިލިޔަން ޔޫރޯ ދައްކަން ޖެހޭއިރު، ކިއެސާގެ ސޮއި ހޯދުމަށް ޔުވެންޓަސްއިން ޖުމްލަ 60 މިލިޔަން ޔޫރޯ ޚަރަދުކުރަން ޖެހޭނެ ކަމަށްވެސް ރިޕޯޓުތައް ބުނެއެވެ.

އޭސީ މިލާނުންވެސް ފާރަލަމުން އައި ކިއެސާ އޭނާގެ ކެރިއަރު ފެށީ 2016 ވަނަ އަހަރު ފިއޮރެންޓީނާއިންނެވެ. އެގޮތުން އޭނާ ފިއޮރެންޓީނާއަށް ކުޅެދިން ފުރަތަމަ މެޗަކީ އިޓާލިއަން ލީގުގައި ޔުވެންޓަސްއާ ދެކޮޅަށް އެ ޓީމުން ކުޅުނު މެޗެވެ. އޭގެ ފަހުން ފިއޮރެންޓީނާއަށް ކުޅެދިން 153 މެޗުގައި ކިއެސާ ވަނީ 34 ލަނޑު ޖަހާފައެވެ.

ޔުވެންޓަސްއިން ކިއެސާގެ ސޮއި ހޯދިއިރު، އެ ޓީމުން ވަނީ ޓްރާންސްފާ ބާޒާރުގެ ފަހު ވަގުތު ތިން ކުޅުންތެރިއަކު ދޫކޮށްލާފައެވެ. އެގޮތުން ފޯވާޑް ޑަގްލަސް ކޮސްޓާ ވަނީ ލޯނު އުސޫލުން އޭނާގެ ކުރީގެ ޓީމު ބަޔާން މިއުނިކަށް ދޫކޮށްލާފައެވެ. އަދި ޑިފެންޑަރު މަޓިއާ ޑި ސިގްލިއޯ އޮލިމްޕިކް ލިޔޯނާ ގުޅުނުއިރު، ޑިފެންޑަރު ޑެނިއަލީ ރުގާނީ ބަދަލުވީ ރެނެސްއަށެވެ.