ޕާޓޭ އާސެނަލަށް، ޓޮރެއިރާ އެތުލެޓިކޯއަށް

އެތުލެޓިކޯ މެޑްރިޑަށް ކުޅެމުން އައި ގާނާގެ މިޑްފީލްޑަރު ތޯމަސް ޕާޓޭ އާސެނަލަށް ބަދަލުވެއްޖެއެވެ.

އުމުރުން 27 އަހަރުގެ މިޑްފީލްޑަރުގެ ސޮއި ހޯދުމަށް އާސެނަލުން ވަނީ 45 މިލިޔަން ޕައުންޑް އެތުލެޓިކޯއަށް ދައްކާފައެވެ. އަދި ޕާޓޭ ވަނީ އާސެނަލާއެކު ދިގު މުއްދަތެއްގެ އެއްބަސްވުމެއް ހަދާފައެވެ.

އެތުލެޓިކޯއިން ކެރިއަރު ފެށި ޕާޓޭ ވަނީ 2015 ވަނަ އަހަރުން ފަށައިގެން އެ ޓީމަށް ކުޅެދީފައެވެ. އެގޮތުން އޭނާ ވަނީ އެތުލެޓިކޯއަށް ކުޅެދިން 188 މެޗުގައި 16 ލަނޑު ޖަހާފައެވެ. ގާނާގެ ގައުމީ ފުޓްބޯޅަ ޓީމުންވެސް ޖާގަ ހޯދާފައިވާ ޕާޓޭ ވަނީ އެތުލެޓިކޯއާއެކު ޔުއެފާ ޔޫރޮޕާ ލީގާއި ޔުއެފާ ސުޕަ ކަޕް ކާމިޔާބުކޮށްފައެވެ.

އާސެނަލުން ޕާޓޭގެ ސޮއި ހޯދިއިރު، މި ޑީލުގެ ތެރެއިން އެ ކުލަބުން ވަނީ އުރުގުއޭގެ މިޑްފީލްޑަރު ލޫކަސް ޓޮރެއިރާ އެއް ސީޒަނުގެ ލޯނެއްގެ ދަށުން އެތުލެޓިކޯއަށް ދޫކޮށްލާފައެވެ. އެކަމަކު އެ އެއްބަސްވުން ދާއިމީ ކުރުމުގެ ފުރުސަތު އެތުލެޓިކޯއަށް އޮންނާނެއެވެ.

މީގެ އިތުރުން އާސެނަލުން ވަނީ ފްރާންސްގެ މިޑްފީލްޑަރު މަޓެއޯ ގެންޑޫޒީ ލޯނެއްގެ ދަށުން ޖަރުމަނުގެ ހާތާ ބާލިނަށް ދޫކޮށްފައެވެ. އާސެނަލުން މިޑްފީލްޑަރެއްގެ ދޮއި ހޯދިއިރު، އެ ޓީމުން މީގެ ކުރިން ވަނީ ޗެލްސީއަށް ކުޅެމުން އައި ބްރެޒިލުގެ ފޯވާޑް ވިލިއަން އާއި، ލިލްއަށް ކުޅެމުން އައި ބްރެޒިލުގެ ޒުވާން ޑިފެންޑަރު ގަބްރިއެލް މަގަލްހައެސްގެ ސޮއި ހޯދާފައެވެ. އަދި ވަނީ ސްޕެއިން މިޑްފީލްޑަރު ޑެނީ ސެބާޔޯސްގެ ލޯނު މުއްދަތުވެސް އިތުރުކޮށްފައެވެ.