އިނގިރޭސި ޕްރިމިއާ ލީގުގައި ހޮނިހިރު ދުވަހުގެރޭ ކުޅުނު މެޗުތަކުން ޗެލްސީ، މެންޗެސްޓާ ޔުނައިޓެޑް އަދި އާސެނަލްވެސް މޮޅުވެއްޖެއެވެ.

ހޮނިހިރު ދުވަހުގެރޭ ޗެލްސީން ވަނީ އަމިއްލަ ދަނޑުގައި 3-0 އިން ވަޓްފޯޑް ބަލިކޮށް، ތާވަލުގެ ހަތަރުވަނަ މަގާމު ދަމަހައްޓާފައެވެ.

މި މެޗުގައި ޗެލްސީގެ ފަރާތުން ރަނގަޅު ކުޅުމެއް ފެނިގެންދިޔައިރު، މެޗުގެ ފުރަތަމަ ހާފުގައި އެޓީމުން ވަނީ ދެ ލަނޑުގެ ލީޑެއް ނަގާފައެވެ.

މެޗުގެ 28 ވަނަ މިނެޓުގައި ރޮސް ބާކްލީ ދިން ޕާހަކުން އޮލިވިއޭ ޖިރޫޑް ޗެލްސީއަށް ލީޑު ނަގައިދިންއިރު، ފުރަތަމަ ހާފު ނިމެން ދެ މިނެޓަށް ވެފައި ވަނިކޮށް ލިބުނު ޕެނަލްޓީއަކުން ޗެލްސީއަށް ލީޑު ފުޅާކޮށްދިނީ ވިލިއަންއެވެ. މިއީ އޭރިއާ ތެރެއިން ޗެލްސީގެ މިޑްފީލްޑަރު ކްރިސްޓިއަން ޕުލިސިޗަށް ކުރި ފައުލަކާ ގުޅިގެން ރެފްރީ ދިން ޕެނަލްޓީއެކެވެ.

މި މެޗުގައި ޗެލްސީން ކާމިޔާބުކުރި ތިންވަނަ ލަނޑު މެޗުގެ އިތުރު ވަގުތުގައި ކެޕްޓަން ސެޒާ އަޒްޕިލިކުއޭޓާ ދިން ބޯޅައަކުން ކާމިޔާބުކޮށްދިނީ ރޮސް ބާކްލީއެވެ.

ގަދަ ހަތަރަކަށް ވާދަކުރަމުން އަންނަ ޔުނައިޓެޑް ހޮނިހިރު ދުވަހުގެރޭ ވަނީ އަމިއްލަ ދަނޑުގައި ބޯންމަތު އަތުން 5-2 ން މޮޅުވެފައެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބޯންމަތުންނެވެ. މެޗުގެ 15 ވަނަ މިނެޓުގައި ބޯންމަތަށް ލީޑު ޖޫނިއާ ސްޓަނިސްލާސްއެވެ.

އެކަމަކު ފުރަތަމަ ހާފު ނިމުމުގެ ކުރިން ޔުނައިޓެޑުން ވަނީ ތިން ލަނޑު ކާމިޔާބުކޮށް އެޓީމު ކޮޅަށް ނަތީޖާ އަނބުރާލާފައެވެ. މެޗުގެ 29 ވަނަ މިނެޓުގައި މޭސަން ގްރީންވުޑް ޔުނައިޓެޑަށް ނަތީޖާ އެއްވަރުކޮށްދިންއިރު، 35 ވަނަ މިނެޓުގައި ޕެނަލްޓީއަކުން ޔުނައިޓެޑަށް ލީޑު ނަގައިދިނީ މާކަސް ރެޝްފޯޑެވެ. އަދި ފުރަތަމަ ހާފުގެ އިތުރު ވަގުތުގައި ޔުނައިޓެޑަށް ލީޑު ފުޅާކޮށްދިނީ އެންތަނީ މާޝިއަލްއެވެ.

ދެވަނަ ހާފު ފަށައިގެން ހަތަރުވަނަ މިނެޓުގައި ޕެނަލްޓީއަކުން ޖޯޝުއާ ކިންގް ބޯންމަތަށް ފަރަގު ކުޑަކޮށްދިން ނަމަވެސް، ޔުނައިޓެޑުން ވަނީ އިތުރު ދެ ލަނޑު ޖަހާފައެވެ. މި ލަނޑުތައް އެޓީމަށް ކާމިޔާބުކޮށްދިނީ ގްރީންވުޑް އާއި ބްރޫނޯ ފެނާންޑޭސްއެވެ.

މި ނަތީޖާއާއެކު ޗެލްސީ ތާވަލުގެ ހަތަރުވަނައިގައި އޮތީ 33 މެޗުން 57 ޕޮއިންޓާއެކުއެވެ. ޗެލްސީގެ ފުލުގައި ވިއްދާފައި އޮތް ޔުނައިޓެޑް ތާވަލުގެ ފަސްވަނައިގައި އޮތީ 33 މެޗުން 55 ޕޮއިންޓާއެކުއެވެ. ލީގުގެ ތިންވަނައިގައި 33 މެޗުން 58 ޕޮއިންޓު ހޯދާފައިވާ ލެސްޓާ ވަނީ ހޮނިހިރު ދުވަހުގެރޭ 3-0 ން ކްރިސްޓަލް ޕެލަސް ބަލިކޮށްފައެވެ.

މީގެ އިތުރުން ޔޫރަޕްގެ މަގާމަކަށް ވާދަކުރަމުން އަންނަ އާސެނަލް ހޮނިހިރު ދުވަހުގެރޭ ވަނީ ވުލްވްސް އަތުން 2-0 ން މޮޅުވެފައެވެ.

ރަށުން ބޭރުގައި ކުޅުނު މި މެޗުގައި އާސެނަލުން ލީޑު ނެގީ ފުރަތަމަ ހާފު ނިމެން ދެ މިނެޓަށް ވެފައި ވަނިކޮށެވެ. މި ލަނޑު އެޓީމަށް ކާމިޔާބުކޮށްދިނީ ޒުވާން ކުޅުންތެރިޔާ ބުކާޔޯ ސަކާއެވެ. އަދި މެޗުގެ 86 ވަނަ މިނެޓުގައި ބަދަލު ކުޅުންތެރިއެއްގެ ގޮތުގައި ނުކުތް އަލެކްސަންޑަ ލަކަޒޭޓް ވަނީ އާސެނަލަށް ލީޑު ފުޅާކޮށްދީފައެވެ.

މި މޮޅާއެކު އާސެނަލް ވަނީ 33 މެޗުން 49 ޕޮއިންޓު ހޯދައިގެން ތާވަލުގެ ހަތްވަނައަށް ޖެހިލާފައެވެ.