އައު ސީޒަނުގެ އިނގިރޭސި ޕްރިމިއާ ލީގުގައި މެންޗެސްޓާ ޔުނައިޓެޑުން ކުޅުނު ފުރަތަމަ މެޗުން ބަލިވެއްޖެއެވެ.

ލީގުގައި ޔުނައިޓެޑުން ކުޅުނު ފުރަތަމަ މެޗުން ބަލިވީ އަމިއްލަ ދަނޑުގައި ކްރިސްޓަލް ޕެލަސް އަތުން 3-1 ންނެވެ.

ހޮނިހިރު ދުވަހުގެރޭ ކުޅުނު މި މެޗުގައި ޕެލަސްއިން ރަނގަޅު ކުޅުމެއް ދެއްކިއިރު، މެޗުގެ ވަރަށް ކުރީކޮޅު އެޓީމުން ވަނީ ލީޑު ނަގާފައެވެ. މެޗުގެ ހަތްވަނަ މިނެޓުގައި ޖެފްރީ ޝްލުޕްގެ އެހީއާއެކު ޕެލަސްއަށް ލީޑު ނަގައިދިނީ އަންޑްރެސް ޓައުންސެންޑެވެ.

މި މެޗުގައި ޕެލަސްއިން ލީޑު ފުޅާކޮށްފައިވަނީ 74 ވަނަ މިނެޓުގައެވެ. ޔުނައިޓެޑުގެ ޑިފެންޑަރު ވިކްޓަ ލިންޑެލޯފްގެ އަތުގައި ބޯޅަ ޖެހުމުން ރެފުރީ ޕެލަސްއަށް ޕެނަލްޓީއެއް ދިންއިރު، ޖޯޑަން އަޔޫ ފޮނުވާލީ ޕެނަލްޓީ ޔުނައިޓެޑުގެ ގޯލްކީޕަރު ޑޭވިޑް ޑެހެއާ ވަނީ މަތަކޮށްފައެވެ. އެކަމަކު ޑެހެއާ އެ ޕެނަލްޓީ މަތަކުރީ މާކުރިއަށް ނުކުމެ ހުރުމުން ކަމަށް ނިންމާ ރެފުރީ ޕެލަސްއަށް އަލުން ޕެނަލްޓީއެއް ދިންއިރު، ފޯވާޑް ވިލްފްރިއެޑް ޒަހާ ވަނީ އެ ޕެނަލްޓީ ކާމިޔާބުކޮށްފައެވެ.

މި މެޗުގެ 80 ވަނަ މިނެޓުގައި ޔުނައިޓެޑުން ވަނީ ފަރަގު ކުޑަކޮށްފައެވެ. ބަދަލު ކުޅުންތެރިއެއްގެ ގޮތުގައި ކުޅެން އަރާ މި ލަނޑު އެޓީމަށް ކާމިޔާބުކޮށްދިނީ މި ފަހަރުގެ ޓްރާންސްފާ ބާޒާރުގައި އެޓީމާ އަލަށް ގުޅުނު ނެދަލެންޑްސްގެ މިޑްފީލްޑަރު ޑޮނީ ވެން ޑަ ބީކެވެ. އެކަމަކު އޭގެ ފަސް މިނެޓު ފަހުން ޒަހާ ވަނީ ޕެލަސްއަށް އަލުން ލީޑު ފުޅާކޮށްދީފައެވެ.

މީގެ އިތުރުން ލީގުގައި ކުޅުނު ދެވަނަ މެޗުން އާސެނަލް ވަނީ ވެސްޓް ހޭމް ޔުނައިޓެޑް އަތުން 2-1 ން މޮޅުވެފައެވެ.

ހޮނިހިރު ދުވަހުގެރޭ އާސެނަލްގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އެޓީމުންނެވެ. މެޗުގެ 25 ވަނަ މިނެޓުގައި ކެޕްޓަން ޕިއޭ-އެމެރިކް އޮބާމަޔަން ހުރަސްކޮށްދިން ބޯޅައަކުން މި ލަނޑު އާސެނަލަށް ކާމިޔާބުކޮށްދިނީ ފޯވާޑް އަލެކްސަންޑަ ލަކަޒޭޓެވެ.

އެކަމަކު ފުރަތަމަ ހާފުގެ ފަހު މިނެޓުގައި ވެސްޓް ހޭމުން ވަނީ ނަތީޖާ އެއްވަރުކޮށްފައެވެ. ރަޔާން ފްރެޑެރިކްސް ހުރަސްކޮށްދިން ބޯޅައަކުން މި ލަނޑު ވެސްޓް ހޭމަށް ކާމިޔާބުކޮށްދިނީ މިކައިލް އެންޓޯނިއޯއެވެ. މި މެޗުން އާސެނަލް މޮޅުވީ މެޗު ނިމެން ފަސް މިނެޓަށް ވެފައިވަނިކޮށް ޑެނިއެލް ސެބާޔޯސްގެ އެހީއާއެކު އެޑްވަޑް ނިކެޓިއާ ކާމިޔާބުކުރި ލަނޑުންނެވެ.

ލީގުގައި ހޮނިހިރު ދުވަހުގެރޭ ކުޅުނު އެހެން މެޗުތަކަށް ބަލާއިރު، އެވަޓަން ވަނީ އަމިއްލަ ދަނޑުގައި 5-2 ން ވެސްޓް ބްރޮމް އަތުން މޮޅުވެފައެވެ. އަދި ޕްރިމިއާ ލީގަށް އަލަށް ޕްރޮމޯޓްވި ލީޑްސް ޔުނައިޓެޑް ވަނީ ފުލަމް އަތުން 4-3 ން މޮޅުވެފައެވެ.