އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑް (އައިބީއެމް) ހޮޓްލައިން ނަންބަރު ސޯޅަނަވާރަ ރަސްމީކޮށް ލޯންޗް ކޮށްފިއެވެ.
އައިލެންޑް ބެވަރޭޖަސް މޯލްޑިވްސް ޕްރައިވެޓް ލިމިޓެޑުން ހޯމަ ދުވަހު ލޯންޗް ކުރި ޝޯޓް ކޯޑް (1619) ނަންބަރަކީ ކަސްޓަމަރުން ތާޒާ ފެނަށް އޯޑަރު ކުރުން ފަސޭހަ ކޮށްދިނުމަށް ތަޢާރަފް ކޮށްފައިވާ ހޮޓްލައިނެއް ކަމަށް އެކުންފުނިން ބުނެއެވެ.
މި ހޮޓްލައިން ރަސްމީކޮށް ލޯންޗް ކޮށްދެއްވީ ހޯމަ ދުވަހު ބޭއްވި ޚާއްސަ ރަސްމިއްޔާތެއްގައި އައިބީއެމްގެ ޗެއާރމަން އަދި އެމްޑަބްލިޔުއެސްސީގެ މެނޭޖިންގ ޑިރެކްޓަރ ހަސަން ޝާހުއެވެ.
ތާޒާގެ ސޯޅަ ނަވާރަ ޝޯޓް ކޯޑް ތައާރަފު ކުރެވިގެން ދިއުމަކީ، ތާޒާ ފެން އޯޑަރު ކުރާ ހުރިހާ ފަރާތްތަކަށް ވެސް އިތުރު ފަސޭހަތަކެއް ލިބިގެންދާނެ ކަމެކެވެ.
އައިބީއެމް އިން ރައްޔިތުންނަށް ލުއި ފަސޭހަކޮށް ދިނުމަށް ގިނަ މަސައްކަތްތައް ދަނީ ކުރަމުންނެވެ. އެގޮތުން ކޮވިޑް-19 އާ ގުޅިގެން ތާޒާ ފެން އަވަހަށް ޑެލިވަރީ ކުރުމުގެ އިންތިޒާމުތައް ވަނީ ހަމަޖައްސާފައެވެ.
