ފުލުހަކު ޕޮޒިޓިވްވުމުން އުތުރުގެ 6 ރަށެއް މޮނިޓަރިންނަށް
ފުލުސް އޮފިސަރު ކޮވިޑަށް ޕޮޒިޓިވްވިކަން އެނގިފައި ވަނީ އޭނާ ކުޅުދުއްފުށީގައި ހުއްޓައި
ހދ. ކުޅުދުއްފުށި
ހދ. ކުޅުދުއްފުށީގައި ހުންނަ ފުލުހުންގެ އިދާރާގައި މަސައްކަތްކުރާ ފުލުހަކު ކޮވިޑް-19 އަށް ޕޮޒިޓިވްވުމާއި އެކު އުތުރުގެ ހަ ރަށެއް މޮނިޓަރިންގެ ހާލަތަށް ގެންގޮސްފިއެވެ.
ހެލްތު އެމަޖެންސީ އޮޕަރޭޝަންސް ސެންޓަރ، (އެޗްއީއޯސީ) ގެ ތަރުޖަމާން ޑޮކްޓަރު ނަޒްލާ ރަފީގު ވިދާޅުވީ، ފުލުހަކު ޕޮޒިޓިވްވުމުން، ހދ. ކުޅުދުއްފުށީގެ އިތުރުން، ހއ. ބާރަށް، ހއ. ދިއްދޫ، ހއ. ހޯރަފުށި، ހދ. ކުރިނބީ އާއި ށ. ފުނަދޫ މިހާރު ވަނީ މޮނިޓަރިންގެ ހާލަތައް ގެންގޮސްފައި ކަމަށެވެ.
ކުޅުދުއްފުށީގައި ހުންނަ ސްޓޭޝަންގައި މަސައްކަތްކުރާ ފުލުސް އޮފިސަރު ކޮވިޑަށް ޕޮޒިޓިވްވިކަން އެނގިފައި ވަނީ އޭނާ ކުޅުދުއްފުށީގައި ހުއްޓައެވެ. އެހެން ނަމަވެސް އެ ސަރަހައްދުގެ އިތުރު ރަށްތަކަކަށް އޭނާ ދަތުރުކޮށްފައި ވުމުން އެ ރަށްތައް މޮނިޓަރިންގެ ހާލަތައް ގެންގޮސްފައިވާ ކަމަށް ޑޮކްޓަރު ނަޒްލާ ވަނީ ވިދާޅުވެފައެވެ.
މި ކޭސް އަކީ އެހެން ކޭސް އަކާއި ގުޅުން ހުރި ކޭސްއެއް ކަމަށް އަދި ފާހަގަވެފައި ނުވާ ކަމަށާއި މި މީހާ އަކީ މާލެ ދަތުރުކޮށްފައިވާ މީހެއް ނޫން ކަމަށްވެސް ޑރ. ނަޒްލާ ވިދާޅުވިއެވެ. އަދި އެހެން ރަށްތަކަށް އެ އޮފިސަރު ދަތުރުކޮށްފައި ވަނީ އެކި މަސައްކަތްތަކުގައި ކަމަށް ޑރ. ނަޒްލާ ފާހަގަކުރެއްވިއެވެ.
