އައު ސަރުކާރުންވެސް އަބުރުގެ ބިލެއް ފަރުމާކޮށް، މަޖިލީހަށް ހުށަހަޅަނީ
5 އޮކްޓޯބަރު 2020 | ހޯމަ 17:41ސަރުކާރުން އަލަށް ހުށަހަޅާ ބިލްތަކުގެ ތެރޭގައި މޯލްޑިވްސް މީޑިއާ އެންޑް ބްރޯޑްކާސްޓިން އެތޯރިޓީގެ ބިލްވެސް ހިމެނެ
އަބުރުގެ ބިލާއި ގުޅޭގޮޮތުން ރާއްޖެޓީވީ ކައިރީގައި ރައީސް ސޯލިހް ވާހަކަދައްކަވަނީ
ސަރުކާރުގެ ފަރާތުން ރައްޔިތުންގެ މަޖިލީހަށް "އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލް" ގެ ނަމުގައި ބިލެއް ހުށަހެޅުމަށް ނިންމާފައިވާކަން ބަންޑާރަ ނައިބްގެ އޮފީހުން ހާމަކޮށްފި އެވެ.
ރައްޔިތުންގެ މަޖިލީހުގެ މި އަހަރުގެ ފަހު ދައުރަށް ސަރުކަރުން ހުށަހަޅާ ބިލްތަކުގެ މައުލޫމާތު ބަންޑާރަ ނައިބްގެ އޮފީހުން ހާމަކޮށްފައިވާއިރު، އޭގައިވާގޮތުން މި ސަރުކާރުންވެސް އަބުރުގެ ބިލެއް މަޖިލީހަށް ހުށަހެޅުމަށް ނިންމާފައިވެއެވެ. އަދި އެ ބިލަށް ދީފައިވާ ނަމަކީ، "އަބުރާ ބެހުމުގެ ސަބަބުން ލިބޭ ގެއްލުމުގެ ބަދަލު ނަގައިދިނުމުގެ ބިލް" އެވެ. ނަމަވެސް ބިލް ފަރުމާކުރެވިފައިވާގޮތެއް ބަންޑާރަ ނައިބްގެ އޮފީހުން ހާމައެއް ނުކުރެ އެވެ.
މިވަގުތު ސަރުކަރު ހިންގާ ކޯލިޝަންގެ ބައިވެރިިންނަކީ ކުރީގެ ރައީސް އަބްދުﷲ ޔާމީންގެ ދައުރުގައި ފާސްކޮށް، އަމަލުކުރި އަބުރު ރައްކާތެރިކޮށް ހިޔާމަތްކުރުމުގެ ޤާނޫނާއި އެންމެ ދެކޮޅު ހެއްދެވި ބެފުޅުންނެވެ. އަދި އައު ސަރުކާރު އިންތިހާބުވެ، 18 ވަނަ ރައްޔިތުންގެ މަޖިލީހުން ކުރި އެންމެ ފަހު މަސައްކަތްތަކުގެ ތެރޭގައި ހިމަނާއި، އެ ބިލް ވަނީ އުވާލާފަ އެވެ.
އޭރު އިދިކޮޅު ޕާޓީތައް ގޮތުގައި މަސައްކަތްކުރި، އަދި މިވަގުތު ސަރުކާރު ހިންގާ ޕާޓީތަކުން ބުނެފައިވަނީ އަބްދުﷲ ޔާމިންގެ ސަރުކާރުގައި ފާސްކުރި އެ ބިލަކީ ނޫސްވެރިކަމާއި، ބަސްބުނުމާއި ހިޔާލު ފާޅުކުރުމުގެ މިނިވަންކަމުގެ ހައްޤު ހިފަހައްޓާ ބިލެއް ކަމަށެވެ. އަދި އެއީ މަދަނީ ކުށެއްގެ ގޮތުގައި އޭގެ ކުރީގައިވެސް އޮތްގޮތަށް އޮންނަންޖެހޭކަމަށް އެ ބޭފުޅުން ވިދާޅުުވަމުންގެންގޮސްފައިވެއެވެ.
އަބްދުﷲ ޔާމީންގެ ސަރުކާރުގައި ފާސްކުރި އަބުރުގެ ބިލުގެ ތެރެއިން އޭރުގެ ބްރޯޑްކާސްޓިން ކޮމިޝަނުން ވަނީ ރާއްޖެޓީވީ 4 މިލިއަނާއި ގާތްކުރާ އަދަދަކުން ޖޫރިމަނާކޮށްފަ އެވެ.
އަބުރުގެ ބިލްގެ އިތުރުން ސަރުކާރުން އަލަށް ހުށަހަޅާ ބިލްތަކުގެ ތެރޭގައި މޯލްޑިވްސް މީޑިއާ އެންޑް ބްރޯޑްކާސްޓިން އެތޯރިޓީގެ ބިލްވެސް ހިމެނެ އެވެ. އެ ބިލަކީ މިވަގުތު ދެ މުއައްސަސާއެއްގެ ގޮތުގައި އޮތް މީޑިއާ ކައުންސިލާއި، ބްރޯޑްކާސްޓިން ކޮމިޝަން އެއްކޮށްލުމުގެ ބިލެކެވެ.
