ބަލަމުންދާ މައްސަލަ ސާފުކޮށްދިނުމަށް އަލިބެ ސަރުކާރުގެ އިދާރާތަކަށް ހުށަހަޅުއްވައިފި

ޓޭބަލް ޓެނިސް އެސޯސިއޭޝަން އޮފް މޯލްޑިވްސްއިން ބަލަމުންދާ މައްސަލަ ސާފުކޮށްދިނުމަށް ޓީޓީ އެސޯސިއޭޝަނުގެ ކުރީގެ ހިންގާ ކޮމިޓީގައި ހިމެނިވަޑައިގެންނެވި އަދި މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) ސަރުކާރުގެ އިދާރާތަކަށް ހުށަހަޅުއްވައިފިއެވެ.

އަލިބެގެ މައްސަލައެއް ބަލަމުންދާކަން ޓީޓީ އެސޯސިއޭޝަނުގެ ޖެނެރަލް ސެކްރެޓަރީ ވަނީ މިދިޔަ މަހުގެ 19 ވަނަ ދުވަހު މެސެޖަކުން އަލިބެއަށް އަންގާފައެވެ. އަދި މައްސަލަ ބަލައި ނިމެންދެން ޓީޓީ އެސޯސިއޭޝަނުގެ އެއްވެސް ކުޅިވަރު ކުޅޭ ތަނެއް ބޭނުންކުރުން އަލިބެއަށް މަނާކުރިއިރު، ޓީޓީ ހޯލުގައި ކުޑަކުދިންނަށް ކޯޗު ކޮށްދިނުންވެސް ވަނީ މަނާ ކޮށްފައެވެ.

މި މައްސަލައިގެ ތަފުސީލު ހޯދަން ޓީޓޯ އެސޯސިއޭޝަނުގައި އަލިބެ އެތައް ފަހަރަކު އެދިވަޑައިގަތް ނަމަވެސް، އަދި މިހާތަނަށްވެސް މައްސަލައިގެ ތަފުސީލު އެ އެސޯސިއޭޝަނުން ހާމަކޮށްފައެއް ނުވެއެވެ. މީގެ ކުރިން އަލިބެ ވަނީ މީހަކާ މެދު އެއްވެސް ރަސްމީ އިދާރާއަކުން ކުށެއްގެ ތުހުމަތު ކުރެވޭނަމަ، ނުވަތަ އިދާރީ ފިޔަވަޅެއް އަޅާނަމަ އޭގެ ސަބަބަކީ ކޮބައިކަން އެމީހަކަށް އެނގުމަކީ އެމީހަކަށް ލިބިދީފައިވާ އެންމެ އަސާސީ އެއް ހައްގު ކަމަށްވާއިރު، އެ މައްސަލައަކީ ކޮން މައްސަލައެއްކަންވެސް އަދިވެސް ސިއްރުކޮށްފައި އޮތުމުން ކަންބޮޑުވުން ފާޅުކުރައްވާފައެވެ.

އެއާއެކު ހުކުރު ދުވަހު އަލިބެ ވަނީ އިންފޮމޭޝަން ކޮމިޝަނުގެ "މަޢުލޫމާތު ހޯދައި ލިބިގަތުމުގެ ހައްގުގެ ޤާނޫނު" ގެ ދަށުން ސަރުކާރުގެ އިދާރާތަކަށް މައްސަލަ ސާފުކޮށްދިނުމަށް އެދި ހުށަހަޅުއްވާފައެވެ. އެގޮތުން ޓީޓީ އެސޯސިއޭޝަނުގެ އިތުރުން ކުޅިވަރާ ބެހޭ ވުޒާރާ އާއި، ސްޕޯޓްސް ކޮމިޝަން އަދި ސްޕޯޓްސް ކައުންސިލަށް އަލިބެ ވަނީ ލިޔުމުން ހުށަހަޅުއްވާފައެވެ.

މިކަމާ ގުޅިގެން "ރާއްޖެ.އެމްވީ" އަށް މައުލޫމާތު ދެއްވަމުން އަލިބެގެ ޤާނޫނީ ވަކީލު، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީގެ ޗެއާޕާސަން ހަސަން ލަތީފް ވިދާޅުވީ މީހަކާ މެދު އިދާރާއަކުން ބަލަމުންދާ މައްސަލަ އަކީ ކޮން މައްސަލައެއްކަން އެ މީހަކަށް ބުނެދިނުމަކީ ޤާނޫން އަސާސީންވެސް އެމީހަކަށް ލިބިދީފައިވާ ހައްގެއް ކަމަށެވެ. އެހެންކަމުން މިހާތަނަށް އައިރު އަލިބެގެ މައްސަލައިގެ ތަފުސީލު ހާމަކޮށްފައިނުވާތީ ހަސަން ލަތީފް ވަނީ ކަންބޮޑުވުން ފާޅުކުރައްވާފައެވެ.

އަލިބެއާ ގުޅޭ ގޮތުން ބަލަމުންދާ މައްސަލައާ ގުޅިގެން މިދިޔަ ހޯމަ ދުވަހު ޓީޓީ އެސޯސިއޭޝަނުގެ ހިންގާ ކޮމިޓީގެ ބައްދަލުވުމަކަށް ހާޒިރުވުމަށް އަލިބެއަށް އެންގިއިރު، އެ ބައްދަލުވުމަކީ މައްސަލައާ ގުޅޭ ގޮތުން އެ ކޮމިޓީގެ ރަސްމީ ޖަލްސާއަކަށް ހާޒިރު ކުރައްވައިގެން ހިންގަވާ މުއާމަލާތަކަށްވާތީ، އެބައްދަލުވުމަށް އަލިބެ ހާޒިރުވެފައިވާނީ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ ވަކީލަކާ އެކުގައެވެ. އެހެންނަމަވެސް ވަކީލުގެ ހާޒިރުގައި މައްސަލައާ ގުޅޭ އެއްވެސް ވާހަކައެއް ދެއްކެވުމަށް އެ ކޮމިޓީގައި ތިއްބެވި ބޭފުޅުން އުޒުރުވެރިވެ ވަޑައިގަތް ކަމަށް އަލިބެ މީގެ ކުރިން ވަނީ ވިދާޅުވެފައެވެ.

އަލިބެގެ މައްސަލައާ ގުޅިގެން މީގެ ކުރިން "ރާއްޖެ.އެމްވީ" އަށް މައުލޫމާތު ދެއްވަމުން ޓީޓީ އެސޯސިއޭޝަންގެ ޖެނެރެލް ސެކްރެޓަރީ އިސްމާއިލް ސުޖާއު ވިދާޅުވީ އަލިބެގެ ޑިސިޕްލިނަރީ މައްސަލައެއް ބަލަމުން އަންނަ ކަމަށާއި، އެކަމަކު ހިންގާ ކޮމިޓީން ބަލަމުންދާ މައްސަލައަކަށް ވުމާއެކު، މައްސަލައިގެ ތަފުސީލު ހާމަކުރެވެން ނެތް ކަމަށެވެ. އެކަމަކު މައްސަލަ ބަލައި ނިމުމުން އެކަމުގެ ތަފުސީލު ހާމަކުރައްވާނެ ކަމަށްވެސް ވިދާޅުވިއެވެ.

އަލިބެގެ މައްސަލައެއް ބަލަމުން އަންނައިރު، އޭނާ އަކީ ވޭތިވެދިޔަ އެތައް އަހަރެއްގެ ގައުމީ ޓީޓީ ޓީމުގެ ކެޕްޓަންކަން ކުރައްވައި އަދި ފާއިތުވީ ދިގު މުއްދަތުގައި ގިނަ އަހަރުތަކެއްގެ ޗެމްޕިއަނުގެ އިތުރުން މިދިޔަ އަހަރުގެވެސް ފުރަތަމަ ޑިވިޝަނުގެ ޑަބަލްސް އަދި މިކްސް ޑަބަލްސްގެ ޗެމްޕިއަނެވެ. އަދި އަލިބެ އަންނަނީ ކުޑަކުދީންނަށް ކޯޗުކޮށްދެމުންވެސް މެއެވެ.