ރަށްރަށުގެ ޕްރީސްކޫލްތައް ހުޅުވުމުގެ މަޝްވަރާތައް އެޑިއުކޭޝަން މިނިސްޓްރީން ފަށައިފި
މިނިސްޓްރީން ބޭނުންވާނީ ވީއެންމެ އަވަަހަކަށް ޕްރީސްކޫލުތަކުގައި ކިޔެވުން ފެށުމަށް
ހުޅުމާލޭގައި ހިންގަމުން އަންނަ ޖެމްސް ލިޓްސް ޕްރީ ސްކޫލުގައި ބޭއްވި ހަރަކާތެއްގެ ތެރެއިން އެ ސްކޫލުގެ ބައެއް ދަރިވަރުން
ރަށްރަށުގެ ޕްރީސްކޫލްތައް ހުޅުވުމުގެ މަޝްވަރާތައް ހެލްތް އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އާއެކު ކުރަމުންދާ ކަމަށް އެޑިއުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ ތައުލީމީ ގުޅޭ ހާއްސަ ޕްރޮގްރާމަށް ދެއްވި އިންޓަވިއުއެއްގައި އެ މިނިސްޓްރީގެ ސްޓޭޓް މިނިސްޓަރ އައިޝަތު އާތިޔާ ނަސީރު ވިދާޅުވީ މިހާރު ކުރިއަށްދަނީ ޕްރީސްކޫލްތައް ހުޅުވާނީ ކޮން ރަށްތަކެއްގައިތޯ ކަނޑައެޅުމަށް ކުރެވޭ މަޝްވަރާތަކެއް ކަމަށެވެ. އަދި މިނިސްޓްރީން ބޭނުންވާނީ ވީއެންމެ އަވަަހަކަށް ޕްރީސްކޫލުތަކުގައި ކިޔެވުން ފެށުމަށް ކަމަށްވެސް އާތިޔާ ވިދާޅުވިއެވެ.
ރަށްރަށުގެ ސްކޫލުތަކުގައި ތަފާތު ބަދަލުތަކެއް ގެންނަން މިނިސްޓްރީން މަސައްކަތް ކުރަމުންދާކަން ފާހަގަކުރައްވާ އާތިޔާ ވިދާޅުވީ ބައެއް ސްކޫލްތަކުގެ ޝެޝަންތައް ކުރު ކޮށްފައިވާ ކަމަށެވެ. އެހެންނަމަވެސް ޝެޝަންތައް ދިގު ކުރެވެން ހުރި ސްކޫލްތަކުގައި ސެޝަންތައް ދިގުކޮށް، އިތުރު ހަރަކާތްތައް ހިންގެން ހުރި ސްކޫލުގައި އެކަންވެސް ފަށަން ނިންމާފައިވާ ވިދާޅުވިއެވެ.
ރަށްރަށުގެ ޕްރީސްކޫލްތައް ހުޅުވުމުގެ މަޝްވަރާތައް އެޑިއުކޭޝަން މިނިސްޓްރީން ކުރަމުންދާއިރު މި މަހުގެ 4 ވަނަ ދުވަހުން ފެށިގެން މާލޭ ސިޓީގެ ސްކޫލްތަކުގައި ކީ ސްޓޭޖް 4 އަދި 5 (ގްރޭޑް 9ން 12ށް) ގެ ދަރިވަރުންގެ ކިޔެވުން ފެށުމަށް އެ މިނިސްޓްރީން ވަނީ ނިންމާފައެވެ. މި ދަރިވަރުންގެ ކިޔެވުން ފެށި ނަމަވެސް ކޮންމެ ހަފްތާއަކު މިނިސްޓްރީގެ ފަރާތުން ހާލަތަށް ރިޔާއަތްކޮށް ނިންމުންތައް ނިންމަމުންދާނެ ކަމަށް އާތިޔާ ވިދާޅުވިއެވެ.
އާތިޔާ އިތުރަށް ވިދާޅުވީ ކުދިން ގޭގައި ތިބެގެން އޮންލައިންކޮށް ކިޔަވާއިރު، ސްކްރީނަށް ބަލަހައްޓައިގެން އިންނަންވުމުން ފޫހިކަން އިހުސާސް ކުރެވި، ކިޔެވުމަށް އޮންނަ ޝައުޤުވެރިކަން ކުޑަވެގެންދާ ކަމަށެވެ. އަދި މިއީ އެ މިނިސްޓްރީގެ ފަރާތުން ދަރިވަރުންނާ އެކު ބޭއްވި ބައްދަލުވުންތަކުން ލިބުނު މައުލޫމާތު ކަމަށް ވިދާޅުވިއެވެ.
އެގޮތުން، ފުރަތަމަ ސްކޫލްތައް ބަންދުވިއިރު އެއީ ކިހާވަރެއްގެ ކަމެއްކަން އިހުސާސް ނުކުރެވުނު ނަމަވެސް މިހާރު އެކަން އެނގޭކަމަށާއި ގޭގައި ތިބެގެން ކިޔަވަން ޖެހުމުން ފިލާވަޅުތައް ހަދާ، ކިޔެވުމަށް ޝައުޤުވެރިނުވާ ކަމަށް އެ ކުދިން ވަނީ ބުނެފައިވާ ކަމަށް އާތިޔާ ވިދާޅުވިއެވެ.
އެހެން ގްރޭޑްތަކުގެ ކިޔެވުން ފެށުމާއި ގުޅޭގޮތުން ސުވާލުކުރުމުން ވިދާޅުވީ، 9 އަކުން ދަށުގެ ގްރޭޑްތަކުގެ ކިޔެވުން ފެށުމަަށްވެސް މަޝްވަރާތައް ކުރެވެމުންދާ ކަމަށެވެ. އެޑިއުކޭޝަން މިނިސްޓްރީން ބުނެފައިވާ ގޮތުގައި، އެ މިނިސްޓްރީގެ ހުރިހާ ނިންމުމެއްވެސް ނިންމާނީ ދަރިވަރުންގެ ސަލާމަތާއި ރައްކާތެރިކަން އިސްކޮށްގެންނެވެ.
