ޗައިނާގެ ސިނޯވެކް ވެކްސިން ބޭނުން ކުރުމުގެ ހުއްދައަށް ބްރެޒިލްގެ ސްޓޭޓަކުން އެދެފި

ޗައިނާގެ ސިނޯވެކުން ކޮވިޑް-19 އުފެއްދި ވެކްސިން ބޭނުންކުރުމުގެ ހުއްދަ ސިއްހީ ރެގިޔުލޭޓަރުން ދިނުމަށް ބްރެޒިލްގެ ސައު ޕައުލޯއިން އެދެފި އެވެ.

ސައު ޕައުލޯގެ ގަވަރުނަރު ހުކުރު ދުވަހު ވިދާޅުވެފައިވަނީ ސިނޯވެކް ވެކްސިން ރަޖިސްޓްރީ ކުރުމަށް އެދިފައިވާ ކަމަށެވެ. މިއީ ލެޓިން އެމެރިކާގެ ގައުމެއްގައި ކޮވިޑް-19 ވެކްސިންދޭ ފުރަތަމަ ފަހަރެވެ. އެސްޓޭޓްގެ ގަވަރުނަރު ޑޯރިއާ ވިދާޅުވީ ޑިސެމްބަރ މަހުގެ މެދު ތެރޭގައި އެސްޓޭޓްގެ ރައްޔިތުންނަށް ވެކްސިން ދިނުމަށް ޕްލޭން އެކުލަވާލާފައިވާ ކަމަށެވެ. އެކަން ކުރަން ފެށުމުގެ ކުރިން ހެލްތު އޮތޯރިޓީގައި ވެކްސިން ރަޖިސްޓްރީ ކުރަން ޖެހެއެވެ.

ޑޯރިއާ މިހެން ވިދާޅުވިތާ ކުޑަވަގުތުކޮޅެއްގެ ތެރޭގައި ހެލްތު ރެގިޔުލޭޓަރ އިން ބުނެފައިވަނީ ސިނޯވެކް ވެކްސިންގެ ޓްރެއަލްގެ ޑާޓާތައް ލިބިފައިވާ ކަމަށެވެ.

ސައު ޕައުލޯ އަކޫ ބްރެޒިލްގައި ދެވަނަ އަށް އެންމެ އާބާދީ ބޮޑު ސްޓޭޓެވެ. އަދި އެއީ ސިނޯވެކް ވެކްސިންގެ ފޭސް ތިނެއްގެ ކްލިނިކަލް ޓެރެއަލް ކުރިޔަށް ގެންގޮސްފައިވާ އެއް ސްޓޭޓެވެސް މެއެވެ.

ބުދަ ދުވަހު ސައު ޕައުލޯއިން ވަނީ ސިނޯވެކާއެކު 90 މިލިއަން ޑޮލަރުގެ އެގްރިމެންޓެއްގައި ސޮއިކޮށްފައެވެ. އެއީ 46 މިލިއަން ޑޯޒް ސިނޯވެކުން ދިނުމަށެވެ.

އަނެއްކޮޅުން އޮގަސްޓް މަހު ޗައިނާގެ ސިނޯވެކް ބައޮޓެކުން ކޮވިޑް-19 އަށް އުފައްދާ ވެކްސިން އެމަރޖެންސީކޮށް ހައިރިސްކު މީހުންނަށް ބޭނުން ކުުރުމުގެ ހުއްދަ ޗައިނާ ސަރުކާރުން ވަނީ ދީފައެވެ.

ޗައިނާގެ ހައިރިސްކް ކެޓަގަރީ މީހުންނަށް ވެކްސިން ދިނުމުގެ ޕްރޮގްރާމްގެ ދަށުން ސިއްހީ ދާއިރާގައި މަސައްކަތް ކުރާ މީހުންނަށް ވެކްސިން ދޭން ފަށާފައިވާ ކަމަށް އެކަން ދަންނަ މީހަކާއި ހަވާލާދީ ރޮއިޓަރސް އިން ވަނީ ރިޕޯޓްކޮށްފައެވެ.

މީގެއިތުރުން ޗައިނާ ސަރުކާރުގެ ފާރމަޝޫޓިކަލް ގްރޫޕްކަމުގައިވާ ސިނޯފަރމް އިން ވެސް ވަނީ އެ މީހުން އުފައްދަމުންދާ ވެކްސިން އެމަރޖެންސީކޮށް ބޭނުން ކުރުމުގެ ހުއްދަ ލިބިފައިވާ ކަމަށް ބުނެފައެވެ.

ސިނޯފަރމް އިން ކޮވިޑް-19 އަށް ދެ ވެކްސިނެއް އުފައްދަމުންދާއިރު މި ދެ ވެކްސިން ވެސް އުޅެނީ ފޭސް ތިނެއްގެ ކްލިނިކަލް ޓްރެއަލް ގައެވެ. ނަމަވެސް އެމަރޖެންސީކޮށް ބޭނުން ކުރުމުގެ ހުއްދަ ދީފައިވަނީ މިތަނުން ކޮން ވެކްސިނަކަށްކަމެއް އެކުންފުނިން ހާމައެއް ނުކުރެއެވެ.