ހޯމަ ދުވަހު އޮންނަ އޭލެވެލް އިމްތިހާނަށް އެޑިޔުކޭޝަން މިނިސްޓްރީ ތައްޔާރު
އިމްތިހާނަށް ތަމްރީންކުރަންޖެހޭ އޮފިޝަލުން ވަނީ ތަމްރީންކޮށްފައި
އެޗްޕީއޭއިން އަޅާފައިވާ ރައްކާތެރިކަމުގެ ފިޔަވަޅުތަކާއެކު ދަރިވަރުންތަކަކަށް ކިޔަވައިދެނީ
އަންނަ ހޯމަ ދުވަހު އޮންނަ އޭލެވެލް އިމްތިހާނަށް ވާންޖެހޭ ތައްޔާރީތައް ވެފައިވާކަމަށް އެޑިޔުކޭޝަން މިނިސްޓްރީން ބުނެފިއެވެ.
އޭ ލެވަލް އިމްތިހާނަށް ވަމުންދާ ތައްޔާރީތަކާއި ގުޅޭގޮތުން މައުލޫމާތު ހިއްސާކުރައްވަމުން އެޑިޔުކޭޝަން މިނިސްޓްރީގެ ޑެޕިޔުޓީ މިނިސްޓަރ މުހައްމަދު އިހުސާން ވިދާޅުވީ އަތޮޅުތެރޭގައި އިމްތިހާން އޮންނަ 33 ސެންޓަރަށް ބޭނުންވާ ސުވާލު ކަރުދާހާއި އެހެނިހެން ލިޔެކިޔުންތަކާއި ބޭނުންވާ ތަކެތި ފޯރުކޮށްދީފައިވާ ކަމަށެވެ. އަދި އިމްތިހާނަށް ތަމްރީންކުރަންޖެހޭ އޮފިޝަލުން ތަމްރީންކުރުމުގެ މަސައްކަތް ނިމިފައިވާ ކަމަށްވެސް ވިދާޅުވިއެވެ.
އެޑިއުކޭޝަން މިނިސްޓްރީން ވަނީ ކޮވިޑް-19 ގެ މިހާލަތުގައި އަމަލުކުރާނެ އެސްއޯޕީތަކާއި ގައިޑްލައިންތައް އެކުލަވާލާ ނިންމާ، އެކަމުގެ ތަފްސީލީ މައުލޫމާތު ކަމާބެހޭ ފަރާތްތަކާއި ހިއްސާކޮށްފައެވެ.
މީގެ އިތުރުން މާލެ ސަރަހައްދުގައި އޭލެވެލް އިމްތިހާން ކުރިޔަށްދާ ހަތަރު ތަނުގައި ވެސް ކޮވިޑް-19 އަށް ޕޮޒިޓިވްވާ ދަރިވަރުންނާއި ކަރަންޓީނުވާ ދަރިވަނުންނަށް ޚާއްސަކޮށް ވަކިން އިމްތިހާނުގައި ބައިވެރިވެވޭނެ އިންތިޒާމުތައް ހަމަޖައްސާފައިވާ ކަމަށް އިހުސާން ވިދާޅުވިއެވެ. އަދި އިމްތިހާނަށް ދާއިރު އެންމެ ރައްކާތެރި ގޮތަކީ ހުރިހާ ދަރިވަރުންވެސް މާސްކު އަޅައިގެން ތިބުން ކަމަށާއި، އިމްތިހާން ހޯލަށް ވަންނަ ކޮންމެ ކުއްޖަކުވެސް ކުޑަ ސެނެޓައިޒަރ ފުޅިއެއް ގެންދިޔުމަށް އިހުސާން ވަނީ އިލްތިމާސްކުރައްވާފައެވެ.
ކުދިންގެ ސަލާމަތާއި ރައްކާތެރިކަމަށްޓަކައި އަޅަންޖެހޭ ފިޔަވަޅުތައް ބެލެނިވެރިން އެޅުމަށާއި އެކަމަށް ޚާއްސަ ސަމާލުކަމެއް ދިނުމަށްވެސް ހިސާން ވަނީ އެދިވަޑައިގެންފައެވެ. އެގޮތުން ކުދިންނަށް އިތުރު ސްޓްރެސްތަކެއް ކުރިމަތިވާނެތީ، ކަރަންޓީނުވުމަށް މާލެ އިން ދާ އެއްވެސް މީހަކު އިމްތިހާން ހަދާ ކުއްޖަކު ހުރި ގެޔެއްގައި ނުހުރުމަށް އިހުސާން ވަނީ އެދިވަޑައިގެންފައެވެ. އަދި އިމްތިހާން ހަދާ ކުއްޖަކު ޕޮޒިޓިވްވިޔަސް އަދި ކަރަންޓީނުވާން ޖެހުނަސް، އެ ކުއްޖަކު އިމްތިހާން ހަދާ ސެންޓަރަކަށް ވަގުތުން އެކަން އެންގުމަށް އިހުސާން ވަނީ އެދިވަޑައިގެންފައެވެ.
އެޑިއުކޭޝަން މިނިސްޓްރީން ވަނީ ދަރިވަރުންގެ ސަލާމަތާއި ރައްކާތެރިކުރަން އަޅަންޖެހޭ ހުރިހާ ފިޔަވަޅުތަކެއް އަޅާފައިވާ ކަމުގެ ޔަގީންކަން ދީފައެވެ. ހޯމަ ދުވަހު ބާއްވާ އޭ ލެވަލް އިމްތިހާނަކީ ކޮވިޑް-19 އާލަމީވަބާގެ ސަބަބުން ސްކޫލްތަކުގެ ކިޔެވުން ހުއްޓާލަން ޖެހި، އިމްތިހާނުތައް ފަސްކުރި ފަހުން ރާއްޖޭގައި ބާއްވާ ފުރަތަމަ މަތީ ސާނަވީ އިމްތިހާނެވެ.
