ބީ ލައިސަންސް ކޯޗިންގ ކޯސް ހިންގުމުގެ ހުއްދަ ޝާޒްލީ އާއި ޑުންގާއަށް

އޭއެފްސީ ބީ ލައިސަންސް ކޯޗިންގ ކޯސް ހިންގުމުގެ ހުއްދަ ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް) އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޑެޕިއުޓީ ޓެކްނިކަލް ޑިރެކްޓަރު އަދި ހެޑް އޮފް ގްރާސްރޫޓްސް އަޙްމަދު ޝަރީފް (ޑުންގާ) އަށް ލިބިއްޖެއެވެ.

މިއާއެކު ޝާޒްލީ އާއި ޑުންގާ ވެފައިވަނީ އޭއެފްސީ ބީ ލައިސަންސް ކޯޗިންގ ކޯސް ހިންގުމުގެ ހުއްދަ ލިބުނު ރާއްޖޭގެ ފުރަތަމަ ދެ އިންސްޓްރަކްޓުންނަށެވެ.

އެފްއޭއެމުން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ އޭއެފްސީ ކޯޗިންގ ކޮންވެންޝަނުގެ ދަށުން "އޭއެފްސީ ބީ ސެޓްފިކެޓް ކޯޗިންގ ކޯސް" ހިންގުމުގެ ހުއްދަ އެފްއޭއެމަށް ލިބިފައިވާ ކަމަށެވެ. އަދި މި ހުއްދައާއެކު "އޭއެފްސީ ބީ ސެޓްފިކެޓް ކޯޗިންގ ކޯސް" ގެ އިންސްޓްރަކްޓަރުކަން ކުރުމުގެ ހުއްދަ ޝާޒްލީ އާއި ޑުންގާއަށް ދީފައިވާ ކަމަށާއި، މިއީ ރާއްޖޭގެ ކޯޗަކަށް މި ފުރުސަތު ލިބުނު ފުރަތަމަ ފަހަރުކަންވެސް ވަނީ ފާހަގަކޮށްފައެވެ.

ޝާޒްލީއަށް އޭއެފްސީ ބީ ލައިސަންސް ކޯޗިންގ ކޯސް ހިންގުމުގެ ހުއްދަ ލިބުނުއިރު، އޭނާ މީގެ ކުރިން ވަނީ ފުޓްބޯޅައިގެ އެންމެ މަތީ ފެންވަރުގެ ކޯޗިންގ ސަނަދު ކަމަށްވާ އޭއެފްސީ ޕްރޯ ލައިސަންސް ހާސިލުކޮށްފައެވެ. އަދި ޝާޒްލީ އަކީ ޕްރޯ ލައިސަންސް ހާސިލުކުރި ފުރަތަމަ ދިވެހި ކޯޗެވެ.

މީގެ ކުރިން ޝާޒްލީ އެފްއޭއެމުގައިވެސް މަސައްކަތް ކޮށްފައިވާއިރު، އޭގެ ކުރިން ވަނީ ބީޖީ ސްޕޯޓްސް ކުލަބާއި ވިކްޓަރީ ސްޕޯޓްސް ކުލަބަށްވެސް އިރުޝާދު ދީފައެވެ. އަދި ޝާޒްލީ ވަނީ މިދިޔަ އަހަރުގެ ސެޕްޓެމްބަރު މަހު ނޭޕާލުގެ ވެރިރަށް ކަތަމަންޑޫގައި ކުރިއަށްދިޔަ 18 އަހަރުން ދަށުގެ ސާފް ޗެމްޕިއަންޝިޕުން ރާއްޖެއަށް ލޯ މެޑަލްވެސް ހޯދައިދީފައެވެ.

މީގެ އިތުރުން އޭއެފްސީ ބީ ލައިސަންސް ކޯޗިންގ ކޯސް ހިންގުމުގެ ހުއްދަ ލިބުނު ޑުންގާގެ އަތުގައި އޭއެފްސީ ކޯޗިންގ "އޭ" ލައިސަންސާއި، ފީފާ ގްރާސްރޫޓް އިންސްޓްރަކްޓާ ލައިސަންސް އަދި އޭއެފްސީ "ބީ" އިންސްޓްރަކްޓާ ލައިސަންސް އޮވެއެވެ. އަދި ޑުންގާ އަކީ އެފްއޭއެމުގެ ޔޫތު ޑިވެލޮޕްމަންޓް ކޯޗެއްގެ ގޮތުން 2000 ވަނަ އަހަރުން ފެށިގެން އައްޑޫ ސިޓީގައި ކުޅުންތެރިން ބިނާކުރުމުގެ މަސައްކަތުގައި އެންމެ އިސް ދައުރެއް އަދާކުރި ކޯޗެވެ.

އައްޑޫ ސިޓީގައި "ޑުންގާ ފުޓްބޯލް އެކެޑަމީ" ގެ ނަމުގައި އޭނާ އެކެޑަމީއެއް ހިންގަމުން އަންނައިރު، ދާދި ފަހުން އެފްއޭއެމުން ވަނީ އެ އިދާރާގެ ޓެކްނިކަލް ޑައިރެކްޓަރުގެ މަގާމު ވަގުތީ ގޮތުން ޑުންގާއާ ހަވާލުކޮށްފައެވެ.