މާލެ، ހުޅުލޭ އަދި ހުޅުމާލެ އެއް ގްރިޑަކުން ގުޅުވާލަން ސްޓެލްކޯއިން ފަށާފައިވާ ކަރަންޓު ފޯރުކޮށްދިނުމުގެ މަޝްރޫއުގެ ދަށުން، މާލެ އާއި ހުޅުމާލެ ގުޅުވާލަން ސިނަމާލެ ބްރިޖްގައި އަޅާ ކޭބަލް އެޅުމުގެ މަސައްކަތް މި މަހު ފަހުކޮޅު ފަށަން ނިންމައިފިއެވެ.

ސްޓެލްކޯގެ މީޑިއާ އޮފިޝަލް ރާއްޖެއެމްވީ އަށް ވިދާޅުވީ، މިހާރު ތައްޔާރުވަމުން ދަނީ މި މަސް ނިމުމުގެ ކުރިން ކޭބަލް އެޅުމުގެ މަސައްކަތް ނިންމާލެވޭތޯ ކަމަށެވެ.

މި ކޭބަލްތައް ގުޅާލުމަށް ހާއްސަ އިކުއިޕްމެންޓްތަކެއް ގެންނަން ޖެހޭއިރު، އެ ކޭބަލްތަކަކީ 400 ސްކޭއާ އެމްއެމްގެ ކޭބަލްތަކައެވެ. މި ކޭބަލްތަކަކީ ސްޓެލްކޯއިން މިހާތަނަށް ބޭނުން ކުރި ކޭބަލްތަކުގެ ތެރެއިން އެންމެ ފަލަ ކޭބަލްތަކެވެ. މީގެ އިތުރުން ހައިވޭ ހުރަސްކޮށް އަދި ބުރިޖް ހުރަސްކޮށް ކޭބަލް އަޅަން ޖެހޭ އިރު، ތާރަގަނޑު ކެނޑުމުގެ ބަދަލުގައި ސްޓެލްކޯއިން ވަނީ ބިމު އަޑިން ތޮރުފައިގެން އެކަން ކުރުމަށް ނިންމާފައެވެ.

ސްޓެލްކޯއިން ހިންގާ ކަރަންޓުގެ ބިޔަ މަޝްރޫއު ހިންގަނީ ޗައިނާގެ ޑޮންފެންގު ކުންފުންޏާއި ހަވާލުކޮށްގެންނެވެ. މި މަޝްރޫއު އަކީ ސްޓެލްކޯއިން 44 މިލިއަން ޑޮލަރު ހަރަދުކޮށްގެން ހިންގާ މަޝްރޫއުއެކެވެ. ކޮވިޑް-19 ގެ ހާލަތާއި ގުޅިގެން ޕްރޮޖެކްޓް އަށް ކޮންމެވެސް ވަރެއްގެ މެދުކެނޑުމެއް އައުމާއި ގުޅިގެން ސްޓެލްކޯއިން މިހާރު އަމާޒު ހިފާފައިވަނީ އަންނަ އަހަރުގެ ކުރީކޮޅު ނިންމާލާށެވެ.

މުޅި ޕްރޮޖެކްޓުގެ 70 އިންސައްތަ އެއްކޮށް ވަނީ ނިންމާލާފައެވެ. މި މަޝްރޫއު ނިމިގެން ދިޔުމާއެކު ކަރަންޓު ކަރަންޓު ކެނޑުމުގެ ފުރުސަތު ކުޑަވެގެންދާނެ ކަމަށް ސްޓެލްކޯއިން ވަނީ ބުނެފައެވެ. މިއީ މިހާތަނަށް އެ ކުންފުނިން ހިންގާ އެންމެ ބޮޑު މަޝްރޫއެވެ.