ތިމާވެށި ހިމާޔަތް ކުރަން ރާއްޖެއިން ވެފައިވާ ވައުދުތަކާއި މެދު ސީރިއަސް: ރައީސް ސޯލިހު
ގުދުރަތީ ވެށި ހިމާޔަތްކުރުމަށް ގުޅިގެން މަސައްކަތްކުރަން ރާއްޖެ އޮތީ ތައްޔާރަށް: ރައީސް ސޯލިހު
މިދިޔަ އަހަރު ބޭއްވި \"ބްލޫ ލީޑަރސް ކޯލް ފޯރ އެކްޝަން އޮން އޯޝަން ކްލައިމެޓް\" އިވެންޓުގައި ރައީސް ސޯލިހު ވާހަކަ ދައްކަވަނީ
ތިމާވެށި ރައްކާތެރިކުރުމާއި ގުޅޭގޮތުން ރާއްޖެއިން ވައުދުވެފައިވާ ކަންކަމާއި މެދު ސީރިއަސް ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ވަރޗުއަލްކޮށް ބޭއްވި އދ. ގެ ބަޔޯޑައިވަރސިޓީ ސަމިޓަށް ދެއްވި މެސެޖެއްގައި ރައީސް ސޯލިހު ވަނީ އެކުވެރި ގައުމުތަކާއި ގުޅިގެން ގުދުރަތީ ވެއްޓާއި ވެށީގައިވާ ދިރުންތައް ރައްކާތެރިކޮށް، ކްލައިމެޓް އިމަރޖެންސީއާ ގުޅޭ ކަންކަމުގައި ގުޅިގެން މަސައްކަތްކުރަން ތައްޔާރަށް ދިވެހިރާއްޖެ އޮތް ކަމުގެ ޔަގީންކަން ސަމިޓުގެ ބައިވެރިންނަށް ދެއްވާފައެވެ.
ރައީސްގެ ވާހަކަފުޅު ފައްޓަވަމުން ވިދާޅުވީ، ދުނިޔޭގެ ދުޅެހެޔޮކަމާ ގުޅިލާމެހިފައިވާ އިންސާނުން ހިންގާ ހަރަކާތްތައް ކަމަށެވެ. އެގޮތުން އިންސާނުންނަށް ލިބޭ ސައިންޓިފިކް އިލްމާއި ޓެކްނޮލޮޖީގެ ކުރިއެރުންތަކުގެ ބޭނުން ހިފާނީ ގެއްލުންދެނިވި ކަންކަން ކޮށްގެން ކުޑަ މަންފާއެއް ހޯދަންތޯ ނުވަތަ ދުރު މުސްތަގުބަލުގައި ވެސް ފައިދާކުރާނެހެން ދެމެހެއްޓެނިވި ތަރައްގީގެ ސްޓްރެޓެޖީތައް އެކުލަވާލުމައްތޯ ނިންމުމުގެ އިހުތިޔާރު އޮތީ އިންސާނުންގެ އަތްމަތީގައި ކަމަށް ވިދާޅުވިއެވެ.
މޫސުމަށް އަންނަ ބަދަލުތަކާއި ދެކޮޅަށާއި ތިމާވެށި ރައްކާތެރިކުރުމަށް ރާއްޖެއިން ކުރަމުން އަންނަ މަސައްކަތްތައް ވެސް ރައީސް ސޯލިހު ވަނީ އެ ސަމިޓުގެ ބައިވެރިންނާ ހިއްސާކުރައްވާފައެވެ. އެގޮތުން އދ. ގެ 74 ވަނަ އާންމު މަޖިލީހުގެ ހަވާސާގައި ބޭއްވެވި ބައްދަލުކުރެއްވުމެއްގައި، ދިވެހިރާއްޖޭގެ "ކްލައިމެޓް ރެޒިލިއެންޓް އައިލެންޑް އިނީޝިއޭޓިވް" ހުށައަޅާފައިވާ ކަމަށް ރައީސް ވިދާޅުވިއެވެ.
ރައީސް ސޯލިހު ވިދާޅުވީ، އެހެން ކުދި ޖަޒީރާ ގައުމުތަކަށް ވެސް މި އިނީޝިއޭޓިވްގެ ދަށުން ރާއްޖެއިން ތައާރަފުކުރި މޮޑެލްގައިވާ ގޮތުގެ މަތިން ގުދުރަތީ މުއްސަނދިކަން ލިބިފައިވާ ސަރަހައްދުތައް ރައްކާތެރިކޮށް، އެއް ފަހަރު ބޭނުންކޮށްފަ އުކާލާ ޕްލާސްޓިކް ބޭނުންކުރުން ހުއްޓާލާ އަދި އިޔާދަކުރަނިވި ހަކަތަ ބޭނުންކުރާ މިންވަރު އިތުރުކުރުމުން ދެމެހެއްޓެނިވި ތަރައްގީ ހާސިލުކުރުވޭނެ ކަމަށެވެ.
އޭގެ އިތުރުން، ބްލޫ ޕްރޮސްޕަރިޓީ ކޯލިޝަންއާ ގުޅިގެން ރާއްޖެއިން ކުރަމުން ގެންދާ މަސައްކަތްތަކަށް ވެސް ރައީސް ވަނީ އަލިއަޅުއްވާލައްވާފައެވެ. އެގޮތުން ރާއްޖޭގެ މެރިޓައިމް ސްޕޭޝަލް ޕްލޭނާއި ނޫ އިގްތިސާދުގެ ސިޔާސަތުތައް އެކުލަވާލާނީ، މިހާރު ރާއްޖޭގައި ކުރިއަށް ގެންދާ ސައިންޓިފިކް ދިރާސާތަކުގެ ހޯދުންތަކުގެ އަލީގައި ކަމަށް ވިދާޅުވިއެވެ.
ޕްލާސްޓިކުގެ ސަބަބުން ކަނޑުތައް ތަޢައްޔަރު ވުމާއި ގުޅިގެން ރާއްޖޭގެ ބޮޑެތި ކަންބޮޑުވުންތަކެއް ހުރިކަން ހިއްސާކުރައްވަމުން ރައީސް ވިދާޅުވީ،އަަހަރެއްގެ މައްޗަށް އަށް މިލިއަން ޓަނުގެ ޕްލާސްޓިކް ދުނިޔޭގެ ކަނޑުތަކަށް އެޅުމުންދާ ކަމަށެވެ. އަދި މިއީ "ގްރޫޕް އޮފް ފްރެންޑްސް ޓު ކޮމްބެޓް މެރިން ޕްލާސްޓިކް ޕޮލިއުޝަން" ގެ ފައުންޑިންގ މެމްބަރަކަށް އަދި ކޯ-ޗެއަރ އަކަށް ރާއްޖެ ވާން ދިމާވި އެއް ސަބަބުކަން ފާހަގަކުރައްވަމުން ރައީސް ވަނީ 2023 ވަނަ އަހަރުގެ ކުރިން ރާއްޖޭގައި އެއް ފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރުން ހުއްޓާލަން އެ މަނިކުފާނުގެ ސަރުކާރުން ވެފައިވާ ވައުދު ފުއްދަވައިދެއްވާނެ ކަމަށް ވިދާޅުވެފައެވެ.
ރައީސްގެ ވާހަކަފުޅު ނިންމަވާލައްވަމުން ވިދާޅުވީ، ގުދުރަތީ ނިޒާމަށް އިހުތިރާމު ކުރުމަށާއި ގޮވާލާފައެވެ. އަދި ކޮވިޑް-19 އާލަމީވަބާއަށް އިންސާނުން ހުށައެޅިގެން ދިޔައީ ގުދުރަތީ އިންތަކަށް ތަކުރާރުކޮށް ބޭއިހުތިރާމު ކުރުމުގެ ސަބަބުން ކަން އެނގިގެން ދިއުމަކީ ލިބުނު އެންމެ މުހިއްމު އެއް ފިލާވަޅު ކަމަށް ވިދާޅުވިއެވެ. ރައީސް ސޯލިހު އިތުރަށް ވިދާޅުވީ ވަށައިގެންވާ ވެށިން ލިބިފައިވާ ގުދުރަތީ ހަދިޔާތައް ރަނގަޅު ގޮތުގައި ނުބުލެހެއްޓޭ ކަމުގައި ވަނީނަމަ ހަމަ މިފަދަ ނުފަދަ އަދި މިއަށް ވުރެވެސް ނުރައްކާތެރި ހާލަތްތަކާ ކުރިމަތިލާން ޖެހޭނެ ކަމާމެދު ޝައްކު ނުކުރައްވާ ކަމަށެވެ.
މިފަހަރުގެ އދ. ގެ ބަޔޯޑައިވަރސިޓީ ސަމިޓުގައި ދިވެހިރާއްޖޭގެ އިތުރުން 149 ގައުމެއްގެ ލީޑަރުން ބައިވެރިވުމަށް ވަނީ ހަމަޖެހިފައެވެ. މި ސަމިޓުގައި މައިގަނޑު ގޮތެއްގައި މަޝްވަރާކުރުމަށް ހަމަޖެހިފައިވަނީ ގުދުރަތީ ވެއްޓާއި ވެށީގައިވާ ދިރުންތައް ހިމާޔަތްކުރުމަށް ގައުމުތަކުން ކުރަމުންދާ މަސައްކަތްތަކާއި ގުޅޭގޮތުންނެވެ.
