ހަނިމާދޫ މަގު ހެދުމުގެ މަސައްކަތް އަންނަ އަހަރުގެ މެދު ތެރޭގައި ނިމޭނެ: އާޒިމް
ފެން ހިންދާ ނިޒާމް ގާއިމް ކުރުމުގެ މަސައްކަތުގެ 80 އިންސައްތަ މަސައްކަތް ވަނީ ނިމިފައި
ހަނިމާދޫ މަގުތައް ތަރައްގީކުރުމުގެ މަސައްކަތުގެ ތެރެއިން ތާރު އެޅުމަށްޓަކައި މަގުތައް އެއްވަރު ކުރަނީ
ހދ. ހަނިމާދޫގެ މަގުތައް ތާރުއަޅައިގެން ޒަމާނި ފެންވަރަށް ހެދުމަށް ކުރަމުންދާ މަސައްކަތް އަންނަ އަހަރުގެ މެދުތެރޭގައި އެއްކޮށް ނިންމާލެވޭނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.
ރާއްޖެ ޓީވީގެ "ގައުމީ ތަރައްގީ ޕްރޮގްރާމުގައި ވާހަކަދައްކަވަމުން އާޒިމް ވިދާޅުވީ އަންނަ އަހަރުގެ މެދު ތެރޭގައި ޕްރޮޖެކްޓުގެ މަސައްކަތް ނިންމާ ރައްޔިތުންނަށް ވީހާވެސް ލުއި ގޮތެއްގައި ހަމަޖައްސައި ދެއްވާނެ ކަމަށެވެ. މިހާރު ކުރަމުންދާ މަސައްކަތްތަކާއި ގުޅޭ ގޮތުން އާޒިމް ވިދާޅުވީ މަގު ހެދުމުގެ މަޝްރޫއުގެ ތެރެއިން ފެން ހިންދާ ނިޒާމުގެ ހުރިހާ މަސައްކަތެއް ނިންމާލެވިފައިވާ ކަމަށާއި، ދުވާރު ހެދުމުގެ މަސައްކަތްތައް ކުރިއަށްދާ ކަމަށެވެ. އެގޮތުން އެ މަސައްކަތުގެ ވެސް 80 އިންސައްތަ މަސައްކަތް ނިމިފައިވާ ކަމަށާއި، ތާރު އެޅުމަށް ބޭނުންވާ ބެޑް ހެދުމަށް ވެސް މަސައްކަތް ކުރެވެމުންދާ ކަމަށެވެ.
މަގު ހެދުމުގެ މަސައްކަތުގައި ރައްޔިތުންގެ ހިޔާލާއި މަޝްވަރާ ހިމަނައިގެން މަސައްކަތް ކުރައްވާކަން ފާހަގަ ކުރައްވާ އާޒިމް ވިދާޅުވީ ހުރިހާ ޕްރޮޖެކްޓެއްގެ ވެސް މަސައްކަތް ކުރަމުންދާނީ އެގޮތަށް ކަމަށެވެ. މީގެ އިތުރުން ރަށު ކައުންސިލްގެ ހިޔާލާއި މަޝްވަރާ ވެސް މަސައްކަތް ކުރުމުގައި ބޭނުން ކުރަމުންދާ ކަމަށެވެ.
އާޒިމް ވިދާޅުވީ ޕްރޮޖެކްޓްތައް ކުރިއަށް ގެންދާއިރު ބަދަލުތައް ގެނައުމަކީ ފަސޭހަކަމެއް ނޫން ކަމަށާއި، އެހެންނަމަވެސް އުނދަގޫވި ނަމަވެސް އަދި އަގުބޮޑުވި ނަމަވެސް ސަރުކާރުގެ އަމާޒަކީ ރައްޔިތުންނަށް ލުއި ފަސޭހަވާނެ ގޮތަކަށް މަގުތައް ހެދިގެން ދިއުން ކަމަށެވެ. އެހެންކަމުން އެމްޓީސީސީގެ އަމާޒަކީ ވެސް ސަރުކާރުން ބޭނުންވާ ގޮތަށް ރައްޔިތުންނަށް އެންމެ ލުއިވާނެ ގޮތަކަށް އަދި އެންމެ ފަސޭހަވާނެ ގޮތަކަށް މަގުތައް ހަދާ ރައްޔިތުންނާއި ހަވާލު ކުރުން ކަމަށެވެ.
