ފުލުހުން ޔުމްނާގެ ފިރިކަލުން ހޯދަނީ ހައްޔަރުކޮށްގެން ކޯޓަށް ހާޒިރުކުރަން!
ނަދީމްގެ މައްޗަށް ތުހްމަތުކޮށްފައިވަނީ ކޮން މައްސަލައެއް ކަމެއް ނޭނގޭ
ނަދީމް ހޯދަން ފުލުހުން މިއަދު އެނދެރިމާގޭ ކައިރީގައި
ޔުމްނާ މައުމޫނުގެ ފިރިކަލުން ފުލުހުން ހޯދަމުން ދަނީ، ކޯޓް އަމުރެއްގެ ދަށުން އޭނާ ހައްޔަރުކުރަން ކަމަށް، ރައީސް މައުމޫންގެ ފެކްޝަންގެ ނައިބު ލީޑަރު އައިމިނަތު ނާދިރާ ވިދާޅުވެއްޖެ އެވެ.
ޔުމްނާގެ ފިރިކަލުން މުހައްމަދު ނަދީމް ހޯދަން، އެ ބޭފުޅުން ދިރިއުޅުއްވާ މ. އެންދެރިމާގެ އަށް ފުލުހުން ވަނީބުދަ ދުވަހުގެ މެންދުރުގެ ވަގުތެއްގައި ގޮސްފަ އެވެ.
ނާދިރާ ވިދާޅުވީ އެންދެރިމާގެ އަށް ދިޔަ ފުލުހުން ކޯޓް އަމުރު ނުދައްކާ ކަމަށާއި، ނަމަވެސް ނަދީމް ހޯދަނީ ކޯޓް އަމުރުގެ ދަށުން ފުލުހުންގެ ބެލުމުގެ ދަށުގައި ބަހައްޓައިގެން ކޯޓަށް ހާޒިރުކުރަން ކަމަށް އެ ފުލުހުން ބުނި ކަމަށެވެ.
"އެއީ ކޮން މައްސަލައެއްގައި ކަމެއް ނޭނގޭ،" އޭނާ ވިދާޅުވި އެވެ.
މިކަމާ ގުޅޭ ގޮތުން ފުލުހުންގެ ބަހެއް އަދި ނުލިބެ އެވެ.
ނަދީމް ހޯދާއިރު، ފުލުހުން ވަނީ ރައީސް މައުމޫންގެ ދަރިކަލުން ފާރިސް މައުމޫންގެ މައްސަލައެއް ވެސް ބަލަން ފަށައިފަ އެވެ.
