''ރީޖަނަލް އެއަރޕޯޓްސް ކޮމްޕެނީ ލިމިޓެޑް''ގެ ނަމުގައި ރީޖަނަލް އެއާޕޯޓުތައް ހިންގުމަށް ކުންފުންޏެއް އުފައްދައިފި
30 ސެޕްޓެމްބަރު 2020 | ބުދަ 13:45ރައީސް ސޯލިހު މިކުންފުނި އުފެއްދެވީ ބުދަ ދުވަހު
ނ.މާފަރު އެއަރޕޯޓު، އެއަރޕޯޓު އިތުރަށް ތަރައްގީ ކުރުމަށް ވެސް ދަނީ މަސައްކަތްތައް ކުރަމުން
"ރީޖަނަލް އެއަރޕޯޓްސް ކޮމްޕެނީ ލިމިޓެޑް" ގެ ނަމުގައި ރީޖަނަލް އެއާޕޯޓުތައް ހިންގުމަށް ސަރުކާރުގެ ކުންފުންޏެއް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު އުފައްދަވައިފިއެވެ.
ރައީސް ސޯލިހު މި ކުންފުނި އުފެއްދެވީ ބުދަ ދުވަހެވެ.
މި ކުންފުންޏަކީ ސަރުކާރުން ހިންގަމުންދާ ސަރަހައްދީ އެއާޕޯޓްތައް ވިޔަފާރީގެ އުސޫލުން ހިންގުމަށާއި، ސަރުކާރުން ރީޖަނަލް އެއާޕޯޓްސް މެދުވެރިކޮށް ހިންގަމުން ގެންދާ ވައިގެ ބަނދަރުތައް ދެމެހެއްޓެނިވި ގޮތެއްގައި ތަރައްގީކޮށް ހިންގުމަށް އުފެއްދި ކުންފުޏެއް ކަމަށް ރައީސް އޮފީހުން ބުނެއެވެ.
ރީޖަނަލް އެއަރޕޯޓްސް ކޮމްޕެނީ ލިމިޓެޑަކީ ދަރަންޏަށް ޒިންމާވާން ޖެހޭ މިންވަރު ކަނޑައެޅިފައިވާ، ދިވެހި ސަރުކާރުގެ ސައްތައިން ސައްތަ ހިއްސާ އެކުލެވިގެންވާ ކުންފުންޏެކެވެ.
ވެލާނާ އިންޓަނޭޝަނަލް އެއާޕޯޓާއެކު ރާއްޖޭގެ އެކި ހިސާބުތަކުގައި 16 އެއާޕޯޓެއް އޮވެއެވެ. ބައެއް އެއަރޕޯޓުތައް ހިންގަމުންދަނީ އަމިއްލަ ކުންފުނިތަކުންނެވެ.
އެއަރޕޯޓުތައް ތަރައްގީކޮށް ދަތުރުފަތުރުގެ ނިޒާމު އިތުރަށް ހަރުދަނާ ކުރުމަކީ މިސަރުކާރުން ޚާއްސަ އިސްކަމެއްދީގެން ކުރަމުންދާ ކަމަކެވެ. އަދި އަތޮޅުތެރޭގެ އެއަރޕޯޓުތައް ތަރައްގީކޮށް ވަޒީފާގެ ފުރުސަތު އިތުރުކޮށް އަތޮޅުތަކަށް ތަރައްގީ ގެނެއުން ހިމެނެއެވެ. އެގޮތުން މިހާރު ވެސް ގިނަ އެއަރޕޯޓުތަކެއް ގާއިމް ކުރުމުގެ މަސައްކަތްތައް ދަނީ ކުރަމުންނެވެ.
