ސިޔާސީ ޕާޓީތަކުގެ ޤާނޫނަށް ހުށަހަޅާ އިސްލާހުތަކާއި ގުޅޭގޮތުން އިލެކްޝަންސް ކޮމިޝަނުން ސިޔާސީ ޕާޓީތަކާއެކު މަޝްވަރާ ފަށައިފި
މި ޤާނޫނަށް 54 އިސްލާހެއް ވަނީ ހުށަހަޅާފައި
އީސީން މީގެކުރިން ކުރިޔަށް ގެންދިޔަ ބައްދަލުވުމެއްގެ ތެރެއިން
ސިޔާސީ ޕާޓީތަކުގެ ޤާނޫނު އިސްލާހް ކުރުމާއި ގުޅޭގޮތުން ސިޔާސީ ޕާޓީތަކާއެކު އިލެކްޝަންސް ކޮމިޝަން (އީސީ)ން މަޝްވަރާ ބައްދަލުވުން ފަށައިފިއެވެ.
މަޝްވަރާ ބައްދަލުވުމުގެ ފުރަތަމަ ބައި އަންގާރަ ދުވަހު ވަނީ ކުރިޔަށް ގެންގޮސްފައެވެ. ސިޔާސީ ޕާޓީތަކުގެ ޤާނޫނަށް އީސީން ވަނީ 54 އިސްލާހެއް ހުށަހަޅާފައެވެ. މި އިސްލާހުތަކާއި ގުޅޭގޮތުން ސިޔާސީ ޕާޓީތަކުން ދެކޭގޮތާއި މެދު ފުޅާ ދާއިރާއެއްގައި ވަނީ މަޝްވަރާކޮށްފައެވެ. މި މަޝްވަރާތަކަށް ފަހު "ރާއްޖެ އެމްވީ" އަށް މައުލޫމާތު ދެއްވަމުން އެ ކޮމިޝަންގެ ރައީސް އަހުމަދު ޝަރީފް ވިދާޅުވީ މަޝްވަރާ ބައްދަލުވުމަކީ ވަރަށް ކާމިޔާބު މަޝްވަރާ ބައްދަލުވުމެއް ކަމަށެވެ. ޤާނޫނަށް ގެންނަން ފެންނަ އިސްލާހުތަކާ ގުޅޭގޮތުން މިނިވަން ޚިޔާލުތަކެއް ސިޔާސީ ޕާޓީތަކުން ހުށަހަޅާފައިވާ ކަމަށާއި ހުށަހެޅުންތައް ހުށަހެޅުމުގައި އެއްވެސް ހުރަހެއް ނެތް ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ މިފަދަ ދަތި ދުވަސްވަރެއްގައި ވެސް މި މަޝްވަރާތައް ކުރިޔަށް ގެންދިޔުމަށް ނިންމީ މިކަމަކީ ވަރަށް ކުރިއްސުރެން ވެސް ކޮމިޝަނުން ކުރަމުން އައި ކަމަކަށް ވެފައި ޤާނޫނަށް އިސްލާހު ގެނައުމަކީ މުހިންމު ކަމެއް ކަމަށް ވާތީ ކަމަށެވެ. އަދި އަންގާރަ ދުވަހުގެ ބައްދަލުވުމުގައި އެންމެ މުހިންމު ކަމެއްގެ ގޮތުގައި ސިޔާސީ ޕާޓީތައް އުވާލުމާއި ބެހޭ ގޮތުން ހުރި ބައިތަކާއި ޕާޓީގެ ދަފްތަރާއި ބެހޭ ގޮތުން އަދި ޕާޓީގެ މެމްބަރޝިޕާޢި ބެހޭގޮތުން ފުޅާދާއިރާއެއްގައި ވާހަކަ ދެކެވިފައިވާ ކަމަށް ޝަރީފް ވިދާޅުވިއެވެ.
ޝަރީފް ވިދާޅުވީ ސިޔާސީ ޕާޓީތަކުން ހުށަހެޅި އިސްލާހުތައް ކޮމިޝަންގައި މަޝްވަރާ ކުރުމަށްފަހު އިތުރަށް ތަފްސީލު ކުުރައްވާނެ ކަމަށެވެ. އަދި މި އިސްލާހުތަކާއެކީގައި ވަރަށް އަވަހަށް އެޓަރނީ ޖެނެރަލް އޮފީހަށް ހުށަހަޅުއްވާނެ ކަަމަށް ޝަރީފް ވިދާޅުވި އެވެ.
ސިޔާސީ ޕާޓީތަކުގެ ޤާނޫނަށް ގެންނަ އިސްލާހުތަކާއި ގުޅޭގޮތުން ބުދަ ދުވަހު ފަހު ބައްދަލުވުން ކުރިޔަށް ގެންދިޔުމަށް ވަނީ ހަމަޖެހިފައެވެ. މި ބައްދަލުވުމުގައި ޕާޓީއަށް ދައުލަތުން ދޭ ފައިސާގެ އެހީ ބަހާނެ ގޮތްތަކާއި އަދި ޕާޓީތަކާ ދޭތެރޭގައި ޤާނޫނާއި ގަވާއިދާ ޚިލާފުވުމުން އަޅާނެ ފިޔަވަޅުތަކާއި ގުޅޭގޮތުން މަޝްވަރާތައް ކުރިޔަށްދާނެ އެވެ.
