ޕީޕީއެމް/ޕީއެންސީގެ ކޮމިޓީތަކުގެ އިންތިހާބު ބާއްވާ ތާރީހު ފަސްކޮށްފި
އޮންލައިންކޮށްވެސް ފޯމް ލިބޭނެ
އިދިކޮޅު ކޯލިޝަނުން ބޭއްވި ޕްރެސްކޮންފަރެންސް ގައި ޕީޕީއެމްގެ ސެކެރެޓަރީ ޖެނެރަލް ހީނާ ވަލީދު ވާހަކަ ދައްކަވަނީ
ސަރުކާރު ޖަވާބުދާރީ ކުރަން އިދިކޮޅު ޕީޕީއެމް/ޕީއެންސީ އިން ކުރަމުންދާ މަސައްކަތްތައް މިހާރަށްވުރެ ފުޅާ ކުރުމުގެ ގޮތުން ބާއްވާ ''ސްޓިއަރިން ކޮމިޓީގެ'' އިންތިހާބު ފަސްކޮށްފިއެވެ.
މީގެ ކުރިން އިންތިހާބު ބާއްވާ ގޮތަށް ތާވަލުކޮށްފައި އޮތީ އޮގަސްޓު މަހުގެ 16 ވަނަ ދުވަހުއެވެ.
އަންގާރަ ދުވަހު ޕްރޮގްރެސިވް ކޯލިޝަނުން ނެރެނު ބަޔާނެއްގައި ބުނީ، ރާއްޖޭގެ ހުރިހާ ރަށެއްގައި އިދިކޮޅުގެ ކޮމިޓީތައް ހޮވަން ބާއްވާ އިންތިހާބު ނޮވެމްބަރު މަހުގެ 13 ވަނަ ދުވަހަށް ފަސްކޮށްފައިވާ ކަމަށެވެ.
ކޮމިޓީގެ މެމްބަރު ކަމަށް ވާދަ ކުރާ ފަރާތްތަކުން އޮކްޓޫބަރު މަހުގެ 20 ގެ ކުރިން ފޯމް ހުށައެޅުމަށް ވަނީ އެދިފައެވެ. ރަށްރަށުގައިނަމަ ވަގުތީ އިންތިހާބީ ކޮމިޓީ އަށް، މާލޭގެ އަވަށްތަކަށް ކުރިމަތިލާ މެމްބަރުން ޕީޕީއެމްގެ އޮފީހަށް ފޯމް ހުށައެޅުމަށް ވަނީ އެދިފައެވެ.
އިންތިހާބަށް ކުރިމަތިލެވޭނީ އާންމު މެމްބަރުންނާއި، އަންހެން މެމްބަރުންގެ އިތުރުން އުމުރުން 35 އަހަރުނުވާ ޒުވާން މެންބަރުންނަށް ކަމަށް އިދިކޮޅުގެ ބަޔާނުގައި ބުންޏެވެ. ހިންގާ ކޮމިޓީގެ މެމްބަރު ކަމަށް ކުރިމަތިލުމަށް އެދޭ ފޯމް ކޮންމެ ރަށެއްގެ ވަގުތީ އިންތިހާބީ ކޮމިޓީންނާއި، ޕީޕީއެމްގެވެބްސައިޓްއަދި ޕްރޮގްރެސިވް ކޯލިޝަންގެ އޮފީހުން ލިބެން ހުންނާނެއެވެ.
ޕީޕީއެމް/ޕީއެންސީން ހުރިހާ ރަށެއްގައި ހިންގާ ކޮމިޓީތަކެއް އިންތިހާބު ކުރަނީ އިދިކޮޅުން ކުރަމުންދާ މަސައްކަތް މިހާރަށްވުރެ ފުޅާ ކުރުމުގެ ގޮތުންނެވެ. ކޮމިޓީތައް އިންތިހާބުވެގެން ދިޔުމުން ސިޔާސީ މަސައްކަތްތައް މިހާރަށް ވުރެ އެތައް ގުނައެއް ފުޅާވެގެން ދާނެ ކަމަށް އިދިކޮޅުން ވަނީ ބުނެފައެވެ.
