ބަނދަރުގެ މަސައްކަތް ފެށުމުގެ އުފަލުގައި ފޯކައިދޫ ރައްޔިތުން ދިނީ ފަރިވަޅެއް
29 ސެޕްޓެމްބަރު 2020 | އަންގާރަ 07:01ބަނދަރުގެ މަސައްކަތް ރަސްމީކޮށް ފަށާފައިވަނި މިދިޔަ ހަފްތާގައި
ބަނދަރުގެ މަސައްކަތް ފެށުމުގެ އުފަލުގައި ރަށުގެ ރައްޔިތުން ދިން ފަރިވަޅު ހިފައިގެން ބަނދަރަށް ދަނީ
ގިނަ ޒަމާންތަކެއް ވަންދެން ށ. ފޯކައިދޫ ރައްޔިތުން އިންތިޒާރުކުރަމުން ދިޔަ ބަނދަރުގެ މަސައްކަތް ފެށުމާއެކު އެކަން ފާހަގަ ކުރުމުގެ ގޮތުން އެ ރަށު ރައްޔިތުން މަސައްކަތް ކުރާ މީހުންނަށް ފަރިވަޅެއް ދިފީއެވެ.
ފޯކައިދޫގެ ބަނދަރު ހެދުމުގެ އަމަލީ މަސައްކަތް ނިމިގެން ދިޔަ ހަފްތާގައި ފަށާފައި ވީނަމަވެސް ބަނދަރު ކޮނުމުގެ މަސައްކަތް ފެށުމާއެކު މަސައްކަތްތެރިނަށް ރަށު ރައްޔިތުންގެ ފަރާތުން ފަރިވަޅު ދީފައިވަނީ އެކަމުގެ އުފަލުގައެވެ. ފޯކައިދޫ ކައުންސިލްގެ ރައީސް މުހައްމަދު ރާޝިދު "ރާއްޖެ ޓީވީ" އާއި ވާހަކަ ދައްކަވަމުން ވިދާޅުވީ ރަށުގެ ރައްޔިތުން ޝާމިލުވާ ގޮތަށް ފަރިވަޅު އަރުވާފައިވަނީ މަސައްކަތް ފެށުމުގެ އުފަލުގައި ކަމަށެވެ.
ލިބިފައިވާ ފޮޓޯ ވީޑިއޯތަކުން ފެންނަ ގޮތުން އެރަށުގެ ރައްޔިތުން ފަރިވަޅު ތައްޔާރު ކުރުމަށްފަހު ރަށުގެ އަންހެންވެރިން ވަނީ ފަރިވަޅު ހިފައިގެން މަސައްކަތްތެރިންނަށް ދިނުމަށް ބޮޑު ސަފެއް ހަދާލާފައެވެ.
ރަށުގެ ރައްޔިތުންގެ ފަރާތުން މީގެ ކުރިން ވެސް ވަނީ މިފަދަ ކަންކަން ފެނިގެން ގޮސްފައެވެ. އެގޮތުން ބަނދަރުގެ މަސައްކަތް ކުރުމަށް އެމްޓީސީސީން ސާމާނު ގެނައި ދުވަހު ސަގާފީ ހަރަކާތާއެކު މަރުހަބާ ކިޔާފައިވެއެވެ.
ފޯކައިދޫ ބަނދަރަކީ 17 އަހަރު ދުވަސް ވަންދެން އެރަށުގެ ރައްޔިތުން ދެކެމުން އައި ހުވަފެނެކެއެވެ. ރައީސް އިބްރާހިމް މުހައްމަދު ސޯލިހު ރިޔާސީ ކެމްޕޭންގެ ތެރެއިން އެރަށަށް ވަޑައިގެން ބަނދަރުގެ މަސައްކަތް ކޮށްދެއްވާނެ ކަމުގެ ވައުދާއެކު އެރަށުގައި ޒަމާނީ ބޮޑު ބަނދަރެއް ހެދުމުގެ މަސައްކަތް އެމްޓީސީސީއާއި ހަވާލުކުރެވި މަސައްކަތް ވަނީ ފަށާފައެވެ.
މި މަޝްރޫޢުގެ ދަށުން ކުރުމަށް ހަމަޖެހިފައިވާ މަސައްކަތްތަކުގެ ތެރޭގައި، 507 މީޓަރ ބޮޑުހިލައިގެ ބޭރުތޮށި ޖެހުމާއި، 464 މީޓަރ އެއްގަމުތޮށި ޖެހުމާއި، 2320 ސްކެއަރ މީޓަރ ޕޭވްމަންޓް ހެދުމާއި، 12 މޫރިން ބްލޮކްސް ޖެހުމާއި، 39,995 ކިއުބިކް މީޓަރ ބަނދަރު ފުންކުރުމާއި، 4,000 ކިއުބިކް މީޓަރ ނެރު ފުންކުރުމާއި، 100 މީޓަރ ރިވެޓްމަންޓް ޖެހުމާއި 2 ނެރުބައްތި ޖެހުމުގެ އިތުރުން 24 ބަނދަރު ބައްތި ޖެހުން ހިމެނެއެވެ.
55,974,940.88 ރުފިޔާ ހަރަދުކޮށްގެން ކުރިއަށްގެންދާ މި މަޝްރޫޢުއަކީ 500 ދުވަހުގެ ތެރޭގައި ނިންމުމަށް ހަވާލުކޮށްފައިވާ މަޝްރޫޢެކެވެ.
