އާސެނަލުގައި މަޑުކުރަން އޮބާމަޔަން ނިންމީ ބާސާއަށް ނޫނެކޭ ބުނުމަށްފަހު

އާސެނަލްގެ އެއްބަސްވުން އާކުރީ ބާސެލޯނާއިން ލިބުނު ހުށަހެޅުމައް ނޫނެކޭ ބުނުމަށްފަހު ކަމަށް ގޮބެނަށް އުފަން ޕިއޭ-އެމެރިކް އޮބާމަޔަން ބުނެފިއެވެ.

އުމުރުން 31 އަހަރުގެ އޮބާމަޔަން މީގެ ކުރިން އާސެނަލާއެކު ހަދާފައި އޮތް އެއްބަސްވުން ހަމަވަން އޮތީ އަންނަ އަހަރުގެ ހޫނު މޫސުމުގެ ނިޔަލަށެވެ. އަދި އާސެނަލްގައި އޮބާމަޔަންގެ ކުރިމަގެއް ނެތް ކަމަށް ބުނެ މީގެ ކުރިން ބައެއް ތަޖުރިބާކާރުން ވަނީ އޮބާމަޔަން އާސެނަލް ދޫކޮށް ދިޔުމަށް ގޮވާލާފައެވެ.

އެކަމަކު ގިނަ މަޝްވަރާތަކަކަށްފަހު އެންމެ ފަހުން އޮބާމަޔަން ވަނީ މި މަހުގެ 15 ވަނަ ދުވަހު އާސެނަލްގެ އެއްބަސްވުން އިތުރު ތިން އަހަރަށް އާކޮށްފައެވެ. އެހެންކަމުން އޭނާ އާސެނަލްގައި 2023 ވަނަ އަހަރުގެ ހޫނު މޫސުމުގެ ނިޔަލަށް މަޑުކުރާނެއެވެ. ރިޕޯޓުތައް ބުނާ ގޮތުން އައު އެއްބަސްވުމާއެކު އޮބާމަޔަންއަށް ހަފުތާއަކު 250،000 (ދެ ލައްކަ ފަންސާސް ހާސް) ޕައުންޑްގެ މުސާރާއެއް ލިބޭނެއެވެ.

ދާދި ފަހުން އޮބާމަޔަން ބުނީ އާސެނަލްގެ އެއްބަސްވުން އާކުރުމުގެ ކުރިން ބައެއް ކުލަބުތަކުން ހުށަހެޅުންތައް ލިބުނު ކަމަށާއި، އޭގެ ތެރޭގައި ބާސާވެސް ހިމެނޭ ކަމަށެވެ. އެކަމަކު އާސެނަލުގައި މަޑުކުރަން ނިންމީ މައިގަނޑު ދެ ސަބަބަކަށްޓަކައި ކަމަށާއި، އެތަނުން އެއް ސަބަބަކީ ކޯޗު މިކޭލް އާޓެޓާ ކަމަށެވެ. އެގޮތުން އެއްބަސްވުން އާކުރުމުގެ ކުރިން އާޓެޓާއާ މަޝްވަރާކުރި ކަމަށްވެސް އޮބާމަޔަން ބުންޏެވެ.

އާސެނަލްގައި މަޑުކުރަން ނިންމި ދެވަނަ ސަބަބަކަށް އޮބާމަޔަން ފާހަގަކުރީ އެ ކުލަބުގެ ސަޕޯޓަރުންނެވެ. އެގޮތުން އޮބާމަޔަން ބުނީ އެ ކުލަބުގެ ސަޕޯޓަރުން ދޭ ސަޕޯޓާއި އޭނާއާ ދޭތެރޭ އޮންނަ ގުޅުން ރަނގަޅު ކަމަށާއި، ބޭނުންވަނީ އާސެނަލުގެ ލެޖެންޑަކަށް ވުމަށް ކަމަށެވެ. އަދި އޮބާމަޔަން ވަނީ އާސެނަލާއެކު އިނގިރޭސި ޕްރިމިއާ ލީގު ކާމިޔާބުކުރަން ބޭނުންވާ ކަމަށްވެސް ބުނެފައެވެ.

އާސެނަލްގެ ކޯޗުގެ މަގާމާ މިދިޔަ އަހަރުގެ ޑިސެމްބަރު މަހު ހަވާލުވި އާޓެޓާގެ އިރުޝާދުގެ ދަށުން އެޓީމުން މޮޅު ކުޅުމެއް ދައްކަމުން އަންނައިރު، މިހާތަނަށް ވަނީ މިދިޔަ ސީޒަނުގެ އެފްއޭ ކަޕުގެ އިތުރުން މި ސީޒަނުގެ ކޮމިއުނިޓީ ޝީލްޑް ކާމިޔާބުކޮށްފައެވެ. މި ދެ ކާމިޔާބީގައިވެސް އޮބާމަޔަނުގެ ދައުރު ބޮޑެވެ.

ބޮރޫޝިއާ ޑޯޓްމުންޑް ދޫކޮށް 2018 ވަނަ އަހަރުގެ ޖެނުއަރީ މަހު 63 މިލިޔަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 112 މެޗުގައި 72 ލަނޑު ޖަހާފައެވެ.