"އަޅުގަނޑަށް އެނގޭ އެން އުކަން، ރަނގަޅު އައިނެއްގައި އެން އުކަން އެނގޭ ކެޔޮޅެއް ހުރެއްޖެނަމަ މަސް ދަހިވާނެ"
އައްސަސާތައްވެސް މި ޤާނޫނަށް އަހުލުވެރި ވަމުންދާކަން ފާހަގަ ކުރެއްވި
އިންފޮރމޭޝަން ކޮމިޝަނަރު ހުސައިން ފިޔާޒް މޫސާ ރާއްޖެޓީވީގެ ފަލަސުރުޙީ ޕްރޮގްރާމަށް ދެއްވި އިންޓަރވިއުގެ ތެރެއިން
މައުލޫމާތު ހޯދާ ލިބިގަތުމުގެ ޙައްޤަށް ރައްޔިތުން އަހުލުވެރި ކުރުވައި، އެ ޤާނޫނު ފުރިހަމައަށް ތަންފީޒު ކުރައްވާނެ ގޮތް އެނގިވަޑައިގަންނަވާކަމަށް އިންފޮރމޭޝަން ކޮމިޝަނަރު ހުސައިން ފިޔާޒް މޫސާ ވިދާޅުވެއްޖެއެވެ.
ހޯމަ ދުވަހުގެރޭ ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ފިޔާޒް ވިދާޅުވީ، ޤާނޫނު އަސާސީގެ 29 ވަނަ މާއްދާގެ ދަށުން މައުލޫމާތު ހޯދައި ލިބިގަތުމުގެ ޙައްޤު ކަށަވަރު ކޮށްދީފައިވާ ކަމަށާއި، އެކަމުގައި ކުރިއެރުންތަކެއް ހާސިލު ކުރެވިފައިވާ ކަމަށެވެ. އެގޮތުން ރައްޔިތުން މި ޙައްޤުގެ ބޭނުން ކުރަމުންދާ މިންވަރުވެސް ފަހަކަށް އައިސް އިތުރުވެފައިވާކަން ފާހަގަކުރެވޭކަމަށް ފިޔާޒް ވިދާޅުވިއެވެ.
އޭގެ އިތުރުން، މި ޙައްޤަށް ރައްޔިތުން އަހުލުވެރި ކުރުވައި، ޤާނޫނު ފުރިހަމައަށް ތަންފީޒު ކުރައްވާނެ އުކުޅުތައް އެނގިވަޑައިގަންނަވާކަމަށް ފިޔާޒް ވިދާޅުވިއެވެ. އެގޮތުން ފިޔާޒް ވަނީ "ރަނގަޅު އައިނެއްގައި އެން އުކަން އެނގޭ ކެޔޮޅެއް ހުރެއްޖެނަމަ މަސް ދަހިވާނެ" ކަމަށް ވިދާޅުވެ، މިސާލު ޖައްސަވާފައެވެ.
މި ޤާނޫނުގެ ދަށުން މުއައްސަސާތަކުން ހުށައަޅާފައިވާ ރިޕޯޓުތަކަށް އަލިއަޅުވާލައްވާ ފިޔާޒް އިތުރަށް ވިދާޅުވީ، 2014 ވަނަ އަހަރުން ފެށިގެން 2018 ވަނަ އަހަރުގެ ނިޔަލަށް ހުށައަޅާފައިވާ އަދަދާއި ގާތްކުރާ އަދަދަކަށް މި ސަރުކާރު ވުޖޫދަށް އައިސް ފާއިތުވެގެން މިދިޔަ އެއް އަހަރު ތެރޭގައި ރިޕޯޓުތައް ހުށައަޅާފައިވާ ކަމަށެވެ. އަދި އެކަމުން ދޭހަވާ އެއްކަމަކީ މުއައްސަސާތައްވެސް މި ޤާނޫނަށް އަހުލުވެރިވަމުންދާކަން ކަމަށް ފިޔާޒް ވިދާޅުވިއެވެ.
މި ރިޕޯޓުތަކާއި ގުޅިގެން ކޮމިޝަނަށް މިދިޔަ އަހަރު 1567 މައްސަލަ ހުށައަޅާފައިވާއިރު އޭގެ ތެރެއިން 1456 މައްސަލައަށް މިހާރު ވަނީ ކޮމިޝަނުން ޖަވާބުދީފައެވެ.
މިއަދަކީ ބައިނަލްއަޤުވާމީ ގޮތުން ފާހަގަކުރާ މައުލޫމާތު ހޯދައި ލިބިގަތުމުގެ ޙައްޤުގެ ދުވަހެވެ.
މަޢުލޫމާތު ހޯދައި ލިބިގަތުމުގެ ޙައްޤުގެ ޤާނޫނު (1/2014) ގެ ދަށުން 13 ޖުލައި 2014 ގައި އިންފޮމޭޝަން ކޮމިޝަނަރުގެ އޮފީހެއް އުފެއްދިތާ 6 އަހަރު ވެފައިވާއިރު، ދައުލަތުގެ ބައެއް މުއައްސަސާތަކާއި އިދާރާތަކުން އެކަށީގެންވާ ގޮތެއްގައި މަޢުލޫމާތު ނުލިބޭ ކަމުގެ ޝަކުވާ މީގެ ކުރިން ގިނަ ބަޔަކު ކޮށްފައި ވެއެވެ.
އެހެން ނަމަވެސް، އުނގެނުމާއި، އުނގަންނައި ދިނުމާއި، މަޢުލޫމާތު ހޯދުމާއި، މަޢުލޫމާތު ލިބިގަތުމުގެ މިނިވަންކަން ކޮންމެ މީހަކަށްވެސް ލިބިގެންވާ ކަމަށް ޤާނޫނު އަސާސީގެ 29 ވަނަ މާއްދާގައި ބަޔާން ކޮށްފައިވާއިރު، މި ދާއިރާ ކުރިއަށް އޮތް ތަނުގައި އިތުރަށް ހަރުދަނާވެގެންދާނެ ކަމުގެ އުއްމީދު އެބައޮތް ކަމަށް ފިޔާޒް ވަނީ ވިދާޅުވެފައެވެ.
