ބާގިރުގެ މައްޗަށް ދައުވާ ކުރަނީ އެއްވެސް އަސާސެއް، އަސްލެއް ނެތް މައްސަލައެއްގައި: ޕީޕީއެމް/ޕީއެންސީ
ޕީޕީއެމް/ޕީއެންސީން ތުހުމަތުކޮށްފަިއވަނީ ސަރުކާރުން ކަންކަން އޮޅުވާލަން އުޅޭކަމަށް
ކުރީގެ އިސްލާމިކް މިނިސްޓަރ
އިސްލާމިކް މިނިސްޓްރީން ޒިކުރާ މިސްކިތް އިމާރާތްކުރުމަށް އެސްޖޭ ކޮންސްޓްރަކްޝަން އާއެކު ވެފައިވާ އެއްބަސްވުމުގައި ކޮރަޕްޝަނަށް މަގުފަހިވާ ކަންތައްތަކެއް އެކުލެވޭތީ އެމައްސަލާގައި ކުރީގެ އިސްލާމިކް މިނިސްޓަރު ޑރ. އަހުމަދު ޒިޔާދު ބާގިރުގެ ދައުވާ ކުރުމަށް ހުށަހެޅުމުން، ބާގިރުގެ ދިފާއުގައި ޕީޕީއެމް/ޕީއެންސީން ތެދުވެއްޖެއެވެ.
ޒިކުރާ މިސްކިތު ޕްރޮޖެކްޓަށް ހިޔާނަތްތެރިވެވަޑައިގެންނެވިކަމުގެ ތުހުމަތުކުރޭ ބާގިރުގެ ދިފާއުގައި ޕީޕީއެމް/ޕީއެންސީން ނެރުނު ބަޔާނެއްގައި ބުނެފައިވަނީ ބާޤިރުގެ މައްޗަށް ކޮރަޕްޝަންގެ ތުހުމަތުކޮށް ދައުވާ ކުރުމަށް ސަރުކާރުގެ ފަރާތުން ފޮނުވާފައިވާ މައްސަލަ އަކީ އެއްވެސް އަސާސެއް އަދި އަސްލެއް ނެތް މައްސަލައެއް ކަމަށެވެ. އަދި ހުރިހާގޮތަކުން ވެސް ސަރުކާރު ފެއިލްވެ، ހެދޭ ނުހެދޭ ނޭނގޭ ހިސާބަށް ކަންކަން ގޮސް، ރައްޔިތުންގެ ނުރުހުން ސަރުކާރަށް އަމާޒުވާން ފެށުމުން، ރައްޔިތުންނަށް ކަންކަން އޮޅުވާލާ، މަތި ޖެހުމަށްޓަކައި ރައީސް ޔާމީން ނުވަތަ އެމަނިކުފާނުގެ ވެރިކަމުގައި އިސް މަޤާމެއް އަދާ ކުރައްވާފައިވާ ކޮންމެވެސް ބޭފުޅަކާއި ގުޅުވައިގެން މައްސަލައެއް އުފައްދާ ދައުވާ ކުރުމަށް ފޮނުވުމަކީ މި ސަރުކާރުން ކުޅެމުން އަންނަ ސިޔާސީ ޑްރާމާއެއް ކަމަށް ބަޔާނުގައި ބުނެފައިވެއެވެ.
ޕީޕީއެމްގެ ބަޔާނުގައި އެގޮތަށް ބުނެފައިވީނަމަވެސް، އޭސީސީގެ ރިޕޯޓާއި، އޮޑިޓަރ ޖެނެރަލްގެ ރިޕޯޓުގައިވާ ފާހަގަކޮށްފައިވާ އެއްވެސް ކަމަކަށް އެ ބަޔާނުގައި ރައްދެއް ދީފައި ނުވެއެވެ. އޭސީސީގެ ރިޕޯޓާއި، އޮޑިޓަރ ޖެނެރަލްގެ ރިޕޯޓުގައި ވާގޮތުން އެ ޕްރޮޖެކްޓަކީ ދައުލަތަށް އެއްވެސް ފައިދާއެއް ވާގޮތަށް ފަރުމާކޮށްފައިވާ ޕްރޮޖެކްޓެއް ނޭނެވެ. މި އެއްބަސްވުމުގައި ސޮއިކުރުމުގެ ސަބަބުން އެސްޖޭ ކޮންސްޓްރަކްޝަންއަށް އިކުއިޓީގެ ގޮތުގައި 30 މިލިއަން ރުފިޔާ ދައްކާފައިވާއިރު އެކަމުން އެއްވެސް ފައިދާއެއް ދައުލަތަށް ނުލިބި އެސްޖޭ ކޮންސްޓްރަކްޝަން އަށް ނާޖާއިޒު ފައިދާއެއް ހޯދާދީފައިވެއެވެ.
ޒިކުރާ މިސްކިތް އަލުން އިމާރާތްކޮށް އެތަނުގައި 10 ބުރީގެ އިމާރާތެއް އެޅުމަށް އެސްޖޭ ކޮންސްޓްރަކްޝަން ކުންފުންޏާ ހަވާލު ކޮށްފައި ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި 2018 ވަނަ އަހަރުގެ ޖުލައި މަހުއެވެ. އެ މިސްކިތް އިމާރާތް ކުރުމުގެ މަޝްރޫއުއަށް 130 މިލިއަން ރުފިޔާ އަރާނެ ކަމަށް އޭރުގެ ސަރުކާރުން ވަނީ ބުނެފައެވެ. އޭގެ ތެރެއިން 30 މިލިއަން ރުފިޔާ ސަރުކާރުން ވަނީ ދީފައެވެ.
މަނީ ލޯންޑަރ ކުރެއްވުމުގެ ކުށް ސާބިތުވެ، ޖަލު ގޮޅީގައި އޮންނެވި ކުރީގެ ރައީސް އަބްދުﷲ ޔާމީންގެ ޕީޕީއެމުން، އެ މަނިކުފާނުގެ ސަރުކާރުގެ އިސްލާމިކް މިނިސްޓަރުގެ މައްޗަށް ކުރެވޭ ކޮރަޕްޝަންގެ ތުހުމަތުތަކުގެ ދިފާއުގައި ތެދުވެފައިވާއިރު، އެ ދެ ޕާޓގެ ލީޑަރޝިޕްގައި ތިއްބެވި ގިނަ ބޭފުޅުންނަކީ ވައްކަމާއި ހިޔާނާތުގެ ތުހުމަތުތައް ކުރެއްވޭ ބޭފުޅުންނެވެ. އެގޮތުން ޕާޓީގެ ލީޑަރޝިޕްގައި ތިއްބެވި ބޭފުޅުންގެ ތެރޭގައި ނުހައްޤު މުއްސަނދިކަމެއް ކުއްލި ގޮތަށް ލިބިވަޑައިގެންނެވި ބޭފުޅުން ވެސް ހިމެނިވަޑައިގަންނަވައެވެ.
