ގދ. ތިނަދޫގައި ގާއިމްކުރާ ކޮވިޑް ފެސިލިޓީގެ މަސައްކަތް ބާރު ސްޕީޑްގައި ކުރިއަށްދޭ
28 ސެޕްޓެމްބަރު 2020 | ހޯމަ 12:52މަސައްކަތް ފެށީ މިމަހުގެ 25 ގައި
ތިނަދޫގައި ހަދާ ކޮވިޑް ފެސިލިޓީ އިމާރާތް ކުރުމުގެ މަސައްކަތުގެ ތެރެއިން
ގދ.ތިނަދޫގައި ގާއިމްކުރާ ކޮވިޑް ފެސިލިޓީގެ މަސައްކަތް ބާރު ސްޕީޑްގައި ކުރިއަށްދާ ކަމަށް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)ން ބުނެފިއެވެ.
އެމްޓީސީސީން ބުނީ ތިނަދޫގައި 22 އެނދުގެ ކޮވިޑް ފެސިލިޓީ އެއް ގާއިމުކުރުމުގެ މަސައްކަތް 25 ސެޕްޓެމްބަރ ގައި ފަށާފައިވާ ކަމަށާއި، މަސައްކަތް ހަލުވިިމިނެއްގައި ކުރިއަށްދާ ކަމަށެވެ. އަދި މި މަޝްރޫއު 14 އޮކްޓޯބަރ 2020 ގައި ނިމޭނެ ކަމަށް ލަފާކުރެވޭ ކަމަށް އެމްޓީސީސީން ބުނެއެވެ.
ތިނަދޫގައި ކޮވިޑް ފެސިލިޓީއެއް ގާއިމް ކުރުމަށް ނިންމީ އެނ ރަށުން ކޮވިޑް-19 އަށް ޕޮޒިޓިވްވި މީހަކު، ގއ. ވިލިނގިލީގައި ހުންނަ ކޮވިޑް ފެސިލިޓީއަށް ފަރުވާ ހޯދުމަށް ގެންދިޔުމުން ރަށަށް ނޭރުވުމުންނެވެ. އެރަށުގެ ބަޔަކު ދެކޮޅު ހެދުމާ ގުޅިގެން އެންމެ ފަހުން އެމީހާއަށް ފަރުވާ ދިނުމަށް އެއަރޓެކްސީއެއްގައި ގެނައީ މާލެއަށެވެ.
މި ހާދިސާއާ ގުޅިގެން ގިނަ ބައެއް ފާޑު ކިޔުން ވެސް ވިލިނގިލީގެ ރައްޔިތުންނަށް ކުރިމަތިވެގެންދިޔައެވެ. އަދި މިހާރު ވިލިނގިލި ކޮވިޑް ފެސިލިޓީގައި ދަނީ ބައެއް މީހުންނަށް ފަރުވާ ދެމުންނެވެ.
ކޮވިޑް- 19 ގުޅިގެން އަތޮޅުތެރޭގެ 5 ސަރަހައްދެއްގައި މެޑިކަލް ފެސިލިޓީސް ސަރުކާރުން ގާއިމް ކުރިއެވެ. އެގޮތުން ގދ ޒޯނުގެ ކޮވިޑް މެނޭޖްމަންޓް ފެސިލިޓީ ގާއިމް ކުރެވިފައިވަނީ ވިލިނގިލީގައެވެ. ވިލިނގިލީ ކޮވިޑް ފެސިލިޓީގައި 23 އައިސީޔޫ އެނދާއި ވެންޓިލޭޓަރުގައި ފަރުވާ ދެވޭނެ އިންތިޒާމު ވަނީ ހަމަޖައްސައިފަ އެވެ.
